ଦୁବାଇ, ୨୦।୧୦: ଆଇପିଏଲ୍ ତ୍ରୟୋଦଶ ସଂସ୍କରଣରେ ରବିବାର ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଓ କିଙ୍ଗ୍ସ ଇଲେଭେନ ପଞ୍ଜାବ ମଧ୍ୟରେ ଐତିହାସିକ ମ୍ୟାଚ୍ ଅନୁଷ୍ଠିତ ହୋଇଥିଲା। ସ୍ଥାନୀୟ ଦୁବାଇ ଇଣ୍ଟରନ୍ୟାଶନାଲ କ୍ରିକେଟ୍ ଷ୍ଟାଡିୟମରେ ଖେଳାଯାଇଥିବା ଏହି ମୁକାବିଲାରେ ପଞ୍ଜାବ ୨ୟ ସୁପର୍ ଓଭରରେ ମୁମ୍ବାଇକୁ ପରାସ୍ତ କରିଥିଲା। ମ୍ୟାଚ୍ରେ ପ୍ରଥମେ ବ୍ୟାଟିଂ କରି ମୁମ୍ବାଇ ୬ ଉଇକେଟ୍ରେ ୧୭୬ ରନ୍ ସଂଗ୍ରହ କରିଥିଲା। ଜବାବରେ କିଙ୍ଗ୍ସ ଇଲେଭେନ (୧୭୬/୬) ମଧ୍ୟ ସମାନ ସ୍କୋର କରିବାକୁ ସକ୍ଷମ ହୋଇଥିଲା। ତେବେ ମ୍ୟାଚ୍ର ରୋମାଞ୍ଚ ଏତିକିରେ ଶେଷ ହୋଇ ନ ଥିଲା। ଫଳାଫଳ ପାଇଁ ସୁପର୍ ଓଭର ଖେଳାଯାଇଥିଲା। ସୁପର ଓଭରରେ ମଧ୍ୟ ଆହୁରି ରୋମାଞ୍ଚ ଦେଖିବାକୁ ମିଳିଥିଲା। ମୁମ୍ବାଇ ଇଣ୍ଡିଆନ୍ସ ଓ ପଞ୍ଜାବ ପକ୍ଷରୁ ଯଥାକ୍ରମେ ଯଶପ୍ରୀତ୍ ବୁମ୍ରା ଓ ମହମ୍ମଦ ସାମି ବୋଲିଂ କରି ୫-୫ ରନ୍ ବ୍ୟୟ କରିଥିଲେ। ଫଳରେ ସୁପର୍ ଓଭର ମଧ୍ୟ ଟାଇ ରହିଯାଇଥିଲା। ଏହାପରେ ୨ୟ ସୁପର୍ ଓଭର ଖେଳାଯାଇଥିଲା। ଏଥିରେ କିନ୍ତୁ ପଞ୍ଜାବ ବାଜିମାତ୍ କରିନେଇଥିଲା। ତେବେ ଦ୍ୱିତୀୟ ସୁପର୍ ଓଭରରେ ବୁମ୍ରା ଓ ସାମିଙ୍କୁ ବୋଲିଂ କରିବାର ସୁଯୋଗ ମିଳି ନ ଥିଲା। ସୁପର୍ ଓଭର ସହ ଜଡ଼ିତ ଥିବା କିଛି ନିୟମ ସମ୍ପର୍କରେ ଆସନ୍ତୁ ଜାଣିବା।
ବୋଲର ସୁପର୍ ଓଭରରେ ଥରେ ବୋଲିଂ କଲେ ତାଙ୍କୁ ୨ୟ ସୁପର୍ ଓଭରରେ ବୋଲିଂ କରିବାର ସୁଯୋଗ ଦିଆଯାଇ ନ ଥାଏ। ଏହି ନିୟମ କାରଣରୁ ବୁମ୍ରା ଓ ସାମି ୨ୟ ସୁପର୍ ଓଭରରେ ବୋଲିଂ କରିବାରୁ ବଞ୍ଚିତ ରହିଥିଲେ। ସେହିଭଳି ପ୍ରଥମ ସୁପର୍ ଓଭରରେ ଆଉଟ୍ ହୋଇଥିବା ବ୍ୟାଟ୍ସମ୍ୟାନମାନେ ୨ୟ ସୁପର୍ ଓଭରରେ ମଧ୍ୟ ବ୍ୟାଟିଂ କରିବାର ସୁଯୋଗ ପାଇ ନ ଥାନ୍ତି। ଅପରପକ୍ଷରେ ସୁପର୍ ଓଭରରେ ସେହି ଟିମ୍ ପ୍ରଥମେ ବ୍ୟାଟିଂ କରିବାର ସୁଯୋଗ ପାଇଥାଏ, ଯିଏ ମ୍ୟାଚ୍ ଶେଷ ହେଲାବେଳକୁ ବ୍ୟାଟିଂ କରୁଥାଏ। ଏହି କାରଣରୁ ପଞ୍ଜାବ ପ୍ରଥମ ସୁପର୍ ଓଭରରେ ପ୍ରଥମେ ବ୍ୟାଟିଂ କରିବାର ସୁଯୋଗ ପାଇଥିଲା। ସେହିଭଳି ପ୍ରଥମ ସୁପର୍ ଓଭର ଶେଷରେ ମୁମ୍ବାଇ ବ୍ୟାଟିଂ କରୁଥିଲା। ତେଣୁ ମୁମ୍ବାଇକୁ ୨ୟ ସୁପର୍ ଓଭରରେ ପ୍ରଥମେ ବ୍ୟାଟିଂ କରିବାର ସୁଯୋଗ ଦିଆଗଲା।
