ପ୍ରାୟତଃ ଖେଳାଳିମାନେ ନିଜ ହେୟାରଷ୍ଟାଇଲ୍, ବିଳାସପୂର୍ଣ୍ଣ କାର୍, ପୋଷାକ ସାଙ୍ଗକୁ ଶରୀରରେ ବିଭିନ୍ନ ପ୍ରକାର ଟାଟୁକୁ ନେଇ ଚର୍ଚ୍ଚାରେ ରହିଥାନ୍ତି। ହେଲେ ସର୍ବଶ୍ରେଷ୍ଠ ଫୁଟବଲ ଖେଳାଳି ମଧ୍ୟରେ ଗଣନା କରାଯାଉଥିବା କ୍ରିଷ୍ଟିଆନୋ ରୋନାଲ୍ଡୋଙ୍କ ଦେହରେ ଗୋଟିଏ ମଧ୍ୟ ଟାଟୁ ଦେଖିବାକୁ ମିଳେନାହିଁ। କାରଣ ରୋନାଲ୍ଡୋ ରକ୍ତଦାନ କରନ୍ତି। ଅଧିକ ଥର ରକ୍ତଦାନ କରିପାରିବା ନେଇ ସେ ଦେହରେ ଗୋଟିଏ ବି ଟାଟୁ କରିନାହାନ୍ତି। ଆତ୍ମବିଶ୍ୱାସୀ ରୋନାଲ୍ଡୋଙ୍କୁ କେହି କେହି ଅହଙ୍କାରୀ ମନେ କରନ୍ତି। ହେଲେ ବାସ୍ତବିକ ଜୀବନରେ ସେ ଜଣେ ପରୋପକାରୀ ମଣିଷ। ସର୍ବଦା ଅନ୍ୟର ସାହାଯ୍ୟ କରିବା ପାଇଁ ପ୍ରସ୍ତୁତ ଥାନ୍ତି।
୨୦୧୧ରେ ରୋନାଲ୍ଡୋଙ୍କ ପର୍ତ୍ତୁଗୀଜ ସାଥୀ କାର୍ଲୋସ ମାର୍ଟିନ୍ସଙ୍କ ପୁଅ ଲୁକେମିଆ ରୋଗରେ ପୀଡ଼ିତ ହୋଇଥିଲା। ଏହା ଏକ ବିରଳ ପ୍ରକାରର ରକ୍ତଜନିତ ରୋଗ ବୋଲି ରୋନାଲ୍ଡୋ ଜାଣିବାକୁ ପାଇଥିଲେ। ସେତେବେଳେ ୩ ବର୍ଷ ଶିଶୁର ଏଭଳି ଅବସ୍ଥା ଦେଖି ସେ ପ୍ରଥମେ ରକ୍ତଦାନ କରିବାକୁ ନିଷ୍ପତ୍ତି ନେଇଥିଲେ।
ଏହାଛଡ଼ା ରୋନାଲ୍ଡୋ ଜଣେ ବୋନ୍ ମ୍ୟାରୋ ଡୋନର ଭାବେ ପଞ୍ଜିକରଣ କରିଛନ୍ତି। ଅନ୍ୟଜଣଙ୍କ ଜୀବନ ବଞ୍ଚାଇବା ତାଙ୍କୁ ଖୁସି ଦେଇଥାଏ। ଏଣୁ ଏହି ଗୁରୁତର ରୋଗୀଙ୍କୁ ସାହାଯ୍ୟ କରିବାକୁ ସେ ବୋନ୍ ମ୍ୟାରୋ ଦାନ କରିଥାନ୍ତି। ଗୋଟିଏ ପଟେ ରୋନାଲ୍ଡୋ କୋଟିପତି ଫୁଟବଲ୍ ଖେଳାଳି ଭାବେ ନିଜକୁ ଲୋକପ୍ରିୟ କରିଥିବା ବେଳେ ତାଙ୍କ ପରୋପକାରୀ ଗୁଣ ଉଦାହରଣ ସାଜିଛି।
