ଅଯୋଧ୍ୟା,୯।୨: ଜାନୁଆରୀ ୨୨ ଦେଶବାସୀଙ୍କ ଲାଗି ଐତିହାସିକ ଦିନ ଥିଲା। ଏହି ଦିନ ଅଯୋଧ୍ୟାରେ ରାମଲାଲାଙ୍କ ପ୍ରାଣ ପ୍ରତିଷ୍ଠା କରାଯାଇଥିଲା। ବଡ଼ ବଡ଼ ସେଲିବ୍ରିଟିମାନେ ନିମନ୍ତ୍ରିତ ହୋଇ କାର୍ଯ୍ୟକ୍ରମରେ ଯୋଗଦେଇଥିଲେ। ସେମାନଙ୍କ ମଧ୍ୟରୁ ଜଣେ ଥିଲେ ଭେଟେରାନ ଅଭିନେତା ଅମିତାଭ ବଚ୍ଚନ। ଏବେ ପ୍ରାଣ ପ୍ରତିଷ୍ଠାର ୧୭ ଦିନ ପରେ ପୁଣିଥରେ ଅମିତାଭ ଅଯୋଧ୍ୟା ପହଞ୍ଚି ଭଗବାନଙ୍କ ଦର୍ଶନ କରିଥିବା ଦେଖାଯାଇଛି।
ରାମଲାଲାଙ୍କୁ ଦର୍ଶନ କରିବା ସମୟର ଫଟୋ ସାମ୍ନାକୁ ଆସିବା ପରେ ଲୋକଙ୍କ ମନରେ ପ୍ରଶ୍ନ ଉଠିଥିଲା କି କ’ଣ ପାଇଁ ଅମିତାଭ ପୁଣିଥରେ ଅଯୋଧ୍ୟା ଯାଇଛନ୍ତି। ତେବେ କଲ୍ୟାଣ ଜୁଏଲର୍ସର ନୂଆ ଶୋ’ ରୁମ୍ ଉଦ୍ଘାଟନ କରିବା ଲାଗି ଅମିତାଭ ଅଯୋଧ୍ୟା ଯାଇଛନ୍ତି। ସେଠାରେ ପହଞ୍ଚିବା ପରେ ଅଭିନେତା ପ୍ରଥମେ ଯାଇ ଭଗବାନଙ୍କ ଦର୍ଶନ କରିଥିବା ଜଣାପଡ଼ିଛି।
କହିରଖୁଛୁ, ଅମିତାଭ ବିଗ୍ବି ଅଯୋଧ୍ୟାର କମିଶନରଙ୍କୁ ମଧ୍ୟ ଭେଟିବାର କାର୍ଯ୍ୟକ୍ରମ ରହିଛି। ଏହାପରେ ସେ କଲ୍ୟାଣ ଜୁଏଲର୍ସର ଶୋ’ ରୁମ୍କୁ ଉଦ୍ଘାଟନ କରିବେ। ଏହି ସମୟରେ ଅଧିକ ସଂଖ୍ୟକ ପ୍ରଶଂସକ ପହଞ୍ଚିବାର ଅନୁମାନ କରାଯାଉଛି। ଏଣୁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।