ରସୁଲପୁର,୨୧ା୬(ରଞ୍ଜିତ ରାଉତ):ଯାଜପୁର ଜିଲା କୋରେଇ ନିର୍ବାଚନମଣ୍ଡଳୀରେ ରସୁଲପୁର ବ୍ଲକରୁ ସାମିଲ ହୋଇଥିବା ୯ ପଞ୍ଚାୟତର ସରପଞ୍ଚ, ସମିତି ସଭ୍ୟାସଭ୍ୟ, ବିଜେଡିର ଛାମୁଆ କର୍ମୀଙ୍କୁ ନେଇ ଗୁରୁବାର କୁଆଖିଆ ଏସ୍କେ ସମ୍ମିଳନୀ କକ୍ଷରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଛି। ସାଧାରଣ ନିର୍ବାଚନରେ କୋରେଇ ବିଜେଡି ବିଧାୟିକା ପ୍ରାର୍ଥୀ ସନ୍ଧ୍ୟାରାଣୀ ଦାସ ପରାଜୟ ବରଣ କରିଛନ୍ତି। ନିର୍ବାଚନ ଫଳ ପ୍ରକାଶର ୧୫ଦିନ ପରେ ଦଳ ପକ୍ଷରୁ ପ୍ରଥମଥର ପାଇଁ ବୈଠକ କରାଯାଇଛି। ପରାଜୟର କାରଣ ପାଇଁ ଦଳୀୟ ଗୋଷ୍ଠୀ କନ୍ଦଳକୁ ଦାୟୀ କରାଯାଇଛି। ଆଗକୁ ଭାଜପାର ସାଂଗଠନିକ ସ୍ଥିତିକୁ କିପରି ବଳ ନ ମିଳିବ, ସେଥିପ୍ରତି ଦଳର ପ୍ରତିଟି କର୍ମୀ ଧ୍ୟାନ ଦେବାକୁ ଆହ୍ବାନ ଦିଆଯାଇଛି।
ଉକ୍ତ ୯ ପଞ୍ଚାୟତରେ ସମସ୍ୟା, ସାଂଗଠନିକ ସ୍ଥିତି ସଜାଡ଼ିବା, ଉନ୍ନୟନ କାର୍ଯ୍ୟକୁ ତ୍ୱରାନ୍ବିତ କରିବା, ଆସନ୍ତା ଦିନରେ ସମସ୍ତ ନିର୍ବାଚନକୁ ସଫଳତାର ସହ ସମ୍ମୁଖୀନ ହେବା ପାଇଁ ଯାହାସବୁ ପଦକ୍ଷେପ ଆବଶ୍ୟକ ତାର ଦାୟିତ୍ୱ ବିଜେଡିର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ନେବେ ବୋଲି ବୈଠକରେ ମୁଖ୍ୟଅତିଥି ଭାବରେ ଯୋଗଦେଇ ପ୍ରଣବଙ୍କ ସାନଭାଇ ଭବପ୍ରକାଶ ଦାସ ଏକଥା ପ୍ରକାଶ କରିଛନ୍ତି। ସେହିପରି ଆଗାମୀ ଦିନରେ ପଞ୍ଚାୟତୱାରୀ ରହିଆସୁଥିବା ସମସ୍ୟାକୁ ସମାଧାନ ପାଇଁ ପଦକ୍ଷେପ ନିଆଯିବ। କୁଆଖିଆ ବଜାରରେ ଦଳୀୟ କାର୍ଯ୍ୟାଳୟ ଖୋଲାଯିବା ସହ ପ୍ରତ୍ୟେକ ସପ୍ତାହରେ ବିଭିନ୍ନ ପଞ୍ଚାୟତର ସମସ୍ୟାକୁ ନେଇ ଆଲୋଚନା କରାଯାଇ ପଦକ୍ଷେପ ନିଆଯିବ। ବ୍ଲକ, ତହସିଲ, ଥାନା ଆଦି କାର୍ଯ୍ୟାଳୟରେ ବିଭିନ୍ନ ସମସ୍ୟାକୁ କିଭଳି ସୂଚାରୁରୂପେ ନିର୍ବାହ କରାଯିବ ତା’ ଉପରେ ଗୁରୁତ୍ୱ ଦିଆଯିବ ବୋଲି ଦାସ ପ୍ରକାଶ କରିଛନ୍ତି। ବୈଠକରେ ଉପସ୍ଥିତ ଥିବା ବିଭିନ୍ନ ପଞ୍ଚାୟତର ସରପଞ୍ଚ ଓ ସମିତିସଭ୍ୟମାନେ ବିଜେଡି ସମର୍ଥତ୍ତ ହୋଇଥିବାରୁ ସମସ୍ତେ ଏକଜୁଟ ହୋଇ କାମ କରିବାକୁ ବୈଠକରେ ସମ୍ମାନିତ ଅତିଥିଭାବେ ଯୋଗ ଦେଇଥିବା ରସୁଲପୁର ପଞ୍ଚାୟତ ସମିତି ଅଧ୍ୟକ୍ଷ ଅରୁଣ ରାଉତ ନିବେଦନ କରିଛନ୍ତି। ବୈଠକରେ ଯାଜପୁର ଜିଲା ଯୁବ ବିଜେଡି ସଭାପତି ପ୍ରତାପ ମହାନ୍ତି, ବିଜେଡି ନେତା ଆଲେକଜାଣ୍ଡର ଦାସ, ରସୁଲପୁର ବ୍ଲକ ଯୁବ ବିଜେଡି ସଭାପତି ମନୋଜ ରାଉତ, ଛାତ୍ର ବିଜେଡି ସଭାପତି ଚନ୍ଦ୍ରଶେଖର ସାମଲ, ପୂର୍ବତନ ସରପଞ୍ଚ ଅଶ୍ୱିନୀ ଦାସ ଓ ପରମାନନ୍ଦ ସାହୁଙ୍କ ସମେତ ବିଭିନ୍ନ ପଞ୍ଚାୟତର ଜନପ୍ରତିନିଧି ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ। ଯୁବନେତା ପ୍ରଶାନ୍ତ ପଣ୍ଡା ବୈଠକ ପରିଚାଳନା କରିଥିଲେ।