କୋଲକାତା,୨୭।୯: କିଡନୀ ଚିକିତ୍ସା ପାଇଁ ଚାଇନା ଯାଉଥିବା ଇରାକର ଜଣେ ନାବାଳିକା ବିମାନରେ ଅସୁସ୍ଥ ହୋଇ ମୃତ୍ୟୁ ବରଣ କରିଥିବା ଜଣାପଡିଛି। ତେବେ ବାଟରେ ଯେତେବେଳେ ଝିଅର ସ୍ବାସ୍ଥ୍ୟ ଅବସ୍ଥା ଖରାପ ହେଲା, ସେତେବେଳେ ଇରାକ ଏୟାରୱେଜ ବିମାନ କୋଲକାତାକୁ ପଠାଗଲା ଏବଂ ଜରୁରୀକାଳୀନ ଅବତରଣ ମଧ୍ୟ କରାଯାଇଥିଲା। ଡାକ୍ତରମାନେ ମଧ୍ୟ ତାଙ୍କୁ ପରୀକ୍ଷା କରିଥିଲେ, କିନ୍ତୁ ସେତେବେଳେକୁ ତାଙ୍କର ହୃଦସ୍ପନ୍ଦନ ବନ୍ଦ ହୋଇ ଯାଇଥିଲା।
ଖବର ଅନୁଯାୟୀ, ସହରର ଏକ ଘରୋଇ ଡାକ୍ତରଖାନାରେ ୧୬ ବର୍ଷର ବାଳିକାକୁ ମୃତ ଘୋଷଣା କରାଯାଇଥିଲା। ମୃତ ଡେକାନ ଅହମ୍ମଦ ତାଙ୍କ ମାତାପିତାଙ୍କ ସହ ଗୁଆଙ୍ଗଜୋକୁ ଚିକିତ୍ସା ପାଇଁ ଯାଉଥିଲେ। ସେହି ସମୟରେ ଏହି ଦୁର୍ଘଟଣା ଘଟିଥିଲା । ଇରାକ ଏୟାରୱେଜ ଏବଂ ବିମାନବନ୍ଦର ଅଧିକାରୀଙ୍କ ସମସ୍ତ ଉଦ୍ୟମ ସତ୍ତ୍ୱେ ଝିଅଟିକୁ ବଞ୍ଚାଇବା କଷ୍ଟକର ହୋଇଥିଲା। ବିମାନବନ୍ଦର ଅଧିକାରୀ କହିଛନ୍ତି ଯେ ଯେତେବେଳେ ପାଇଲଟ ବିମାନବନ୍ଦର ଟ୍ରାଫିକ କଣ୍ଟ୍ରୋଲ (ଏଟିସି) ରେଡିଓ କଲ୍ କରି ଜରୁରୀକାଳୀନ ଚିକିତ୍ସା ଅବତରଣ ପାଇଁ ଅନୁମତି ମାଗିଥିଲେ, ସେତେବେଳେ ବିମାନଟି କୋଲକାତା ବିମାନବନ୍ଦରଠାରୁ ପ୍ରାୟ ୩୦ମିନିଟ ଦୂରରେ ଥିଲା। ବିମାନ ବନ୍ଦରର ଜଣେ ଅଧିକାରୀ କହିଛନ୍ତି ଯେ ବିମାନଟି ରାତି ପ୍ରାୟ ୧୦ଟା ୧୨ରେ ନିରାପଦରେ ଅବତରଣ କରିଥିଲା ଏବଂ ତୁରନ୍ତ ବିମାନବନ୍ଦର ସ୍ବାସ୍ଥ୍ୟ ଅଧିକାରୀଙ୍କ ଦ୍ୱାରା ଯାଞ୍ଚ କରାଯାଇଥିଲା।
ପରେ ସହରର ଘରୋଇ ଡାକ୍ତରଖାନାର ଅଧିକାରୀମାନେ ଝିଅର ମୃତ୍ୟୁ ସମ୍ପର୍କରେ ପୋଲିସକୁ ସୂଚନା ଦେଇଥିଲେ। ପୋଲିସ ମୃତକଙ୍କ ପରିବାରକୁ ରାତିରେ ରହିବା ପାଇଁ ଏକ ହୋଟେଲରେଚେକ୍ ଇନ୍ ବ୍ୟବସ୍ଥା କରିଥିଲା। ନାବାଳିକାଙ୍କ ମୃତଦେହକୁ ମେଡିକାଲ କଲେଜ ଏବଂ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ଗୁରୁବାର ସେଠାରେ ପୋଷ୍ଟ ମର୍ଟମ କରାଯାଇଥିଲା। ପୋଲିସ କହିଛି ଯେ ଝିଅର ମୃତଦେହକୁ ଏକ କଫିନରେ ରଖାଯିବ ଏବଂ ଶୁକ୍ରବାର ଦିଲ୍ଲୀ ଦେଇ ବାଗଦାଦକୁ ଫେରାଇ ନିଆଯିବ।