ବମ୍ବେ: ବଲିଉଡର ଲୋକପ୍ରିୟ କୋରିଓଗ୍ରାଫର ସରୋଜ ଖାନ୍ଙ୍କ ହୃଦଘାତରେ ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୭୨ ବର୍ଷ ହୋଇଥିଲା। ୨୦୦ରୁ ଅଧିକ ଫିଲ୍ମରେ ସେ କୋରିଓଗ୍ରାଫି କରିଛନ୍ତି। ତାଙ୍କ ମୃତ୍ୟୁକୁ ନେଇ ବଲିଉଡ୍ରେ ଶୋକର ଛାୟା ଖେଳିଯାଇଛି। ସମସ୍ତ କଳାକାର ସରୋଜଙ୍କ ସହ ସ୍ମୃତିକୁ ମନେପକାଉଥିବା ଦେଖାଯାଉଛି।
୧୯୪୮ ନଭେମ୍ବର ୨୨ ତାରିଖରେ ଜନ୍ମିତ ସରୋଜ କିଶନଚନ୍ଦ ସାନ୍ଧୁ ସିଂହ ଏବଂ ନୋନି ସାନ୍ଧୁ ସିଂହଙ୍କ କନ୍ୟା। ଜନ୍ମ ବେଳେ ତାଙ୍କ ନାମ ଥିଲା ନିର୍ମଳା। ହେଲେ ପରବର୍ତ୍ତୀ ସମୟରେ ନାମ ବଦଳାଇ ସରୋଜ ଖାନ୍ ରଖିଥିଲେ। ଦେଶ ବିଭାଜନ ସମୟରେ ତାଙ୍କ ପରିବାର ଭାରତ ଆସିଥିଲେ। ସେ ଶିଶୁ କଳାକାର ଭାବେ ନିଜ କ୍ୟାରିୟର ଆରମ୍ଭ କରିଥିଲେ। ୧୯୫୦ ମସିହାରେ ସେ ବ୍ୟାକ୍ଗ୍ରାଉଣ୍ଡ ଡ୍ୟାନ୍ସର ଭାବେ କାମ କରିଥିଲେ।
ମାତ୍ର ୧୩ ବର୍ଷ ବୟସରେ ସରୋଜ ସୋହନଲାଲଙ୍କୁ ବିବାହ କରିଥିଲେ। ତାଙ୍କଠାରୁ ସରୋଜ ନୃତ୍ୟ ଶିକ୍ଷା କରିଥିଲେ। ଏହାପରେ ସେ କୋରିଓଗ୍ରାଫି ଜଗତରେ ପାଦ ଥାପିଥିଲେ। ପ୍ରଥମେ ଆସିଷ୍ଟାଣ୍ଟ କୋରିଓଗ୍ରାଫର ରହିଥିଲେ। ପରେ ୧୯୭୪ରେ ଗୀତା ମେରା ନାମରୁ କୋରିଓଗ୍ରାଫର ହୋଇଥିଲେ।
ସ୍ବାମୀ ସୋହନଲାଲ ପୂର୍ବରୁ ବିବାହିତ ଥିବା ସରୋଜ ଜାଣି ନ ଥିଲେ। ବିବାହ ପରେ ତାଙ୍କର ଏକ ପୁଅ ରାଜୁ ଜନ୍ମ ହୋଇଥିଲା। ଏହାପରେ ସେ ସ୍ବାମୀଙ୍କ ବିବାହ ବିଷୟରେ ଜାଣିବାକୁ ପାଇଥିଲେ। ପରେ ସୋହନଲାଲ ତାଙ୍କ ପୁଅଙ୍କୁ ଆପଣାଇବାକୁ ମନା କରିଥିଲେ। ଶେଷରେ ଉଭୟଙ୍କ ମଧ୍ୟରେ ମନୋମାଳିନ୍ୟ ସୃଷ୍ଟି ହୋଇଥିଲା।
ପରେ ସରୋଜ ବ୍ୟବସାୟୀ ସରଦାର ରୋଶନ ଖାନଙ୍କୁ ବିବାହ କରିଥିଲେ। ଏସବୁ ମଧ୍ୟରେ ସରୋଜ ନିଜ ଇଚ୍ଛା ଅନୁସାରେ ଇସ୍ଲାମ ଧର୍ମ ଗ୍ରହଣ କରିଥିଲେ। ମୃତ୍ୟୁ ପର୍ଯ୍ୟନ୍ତ ସେ ଏହି ଧର୍ମ ପାଳନ କରୁଥିଲେ।
ଶ୍ରୀଦେବୀ ଅଭିନୀତ ଫିଲ୍ମ ମିଷ୍ଟର ଇଣ୍ଡିଆର ଗୀତ ହବା ହବାଇରୁ ତାଙ୍କୁ ଖ୍ୟାତି ମିଳିଥିଲା। ଏହାପରେ ସେ ପଛକୁ ଚାହିଁ ନ ଥିଲେ।