ଚଣ୍ଡିଗଡ଼, ୨୨।୮: ଜବରଦସ୍ତି ଘରେ ପଶି ୨ଜଣ ମହିଳାଙ୍କ ସହ ଖରାପ ବ୍ୟବହାର କରିବା ଅଭିଯୋଗରେ ହରିୟାଣା ପୋଲିସର ଜଣେ ବରିଷ୍ଠ ଆଇଜି ଗିରଫ ହୋଇଛନ୍ତି। ସୂଚନା ମୁତାବକ ହରିୟାଣା ପୋଲିସର ଇନ୍ସପେକ୍ଟର ଜେନେରାଲ (ଆଇଜି) ହେମନ୍ତ କଲସନ ଶୁକ୍ରବାର ପଞ୍ଚକୁଲାର ପିଞ୍ଜୋର ଅଞ୍ଚଳରେ ଘରେ ପ୍ରବେଶ କରି ୨ଜଣ ମହିଳାଙ୍କୁ ର୍ଦୁବ୍ୟବହାର କରିଥିଲେ। ଏପରିକି ଜଣେ ଯୁବକଙ୍କୁ ପିଟିଥିବା ଅଭିଯୋଗ ହୋଇଥିଲା। ଏହାପରେ ମହିଳାଙ୍କ ଅଭିଯୋଗ ଆଧାରରେ ହେମନ୍ତଙ୍କ ନାମରେ ମାମଲା ରୁଜୁ ହେବା ସହ ଶନିବାର ତାଙ୍କୁ ଗିରଫ କରାଯାଇଛି। ହରିୟାଣା ପୋଲିସର ପ୍ରବକ୍ତା କହିଛନ୍ତି, ‘୫୫ ବର୍ଷୀୟ ହେମନ୍ତ ୨୧ ଅଗଷ୍ଟ ରାତିରେ ଜଣେ ମହିଳାଙ୍କ ଘରେ ପଶି ତାଙ୍କୁ ଓ ତାଙ୍କ ଝିଅଙ୍କୁ ଖରାପ ବ୍ୟବହାର କରିଥିଲେ। ଏହାପରେ ମହିଳାଙ୍କ ପୁଅକୁ ମାଡ଼ ମାରିଥିଲେ। ପିଞ୍ଜୋର ଥାନାରେ ମହିଳାଙ୍କ ଅଭିଯୋଗ ଆଧାରରେ ହେମନ୍ତଙ୍କ ନାମରେ ଆଇପିସିର ବିଭିନ୍ନ ଧାରାରେ ମାମଲା ରୁଜୁ କରାଯାଇ ଶନିବାର ତାଙ୍କୁ ଗିରଫ କରାଯାଇଥିଲା।’ ଏଠାରେ ଉଲ୍ଲେଖଯୋଗ୍ୟ, ବର୍ତ୍ତମାନ ପଞ୍ଚକୁଲା ଆଇଜି (ହୋମଗାର୍ଡ) ଥିବା ହେମନ୍ତ ପୂର୍ବରୁ ମଧ୍ୟ ଅନେକ ଘଟଣାରେ ବିବାଦ ଘେରରେ ରହିଥିଲେ। ଏପରିକି ପୂର୍ବରୁ ତାଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ହୋଇସାରିଛି। ଗତବର୍ଷ ଏପ୍ରିଲରେ ତାମିଲନାଡ଼ୁ ନିର୍ବାଚନ ଡ୍ୟୁଟିରେ ଥିବାବେଳେ ହେମନ୍ତ ଶୂନ୍ୟକୁ ଫାୟାରିଂ କରି ବିବାଦକୁ ଆସିଥିଲେ। ଏହାପରେ ତାଙ୍କୁ ନିଲମ୍ବିତ କରାଯାଇଥିଲା। ୨୦୧୮ ସେପ୍ଟେ୍ମ୍ବରରେ ମଧ୍ୟ ଗାଡ଼ି ଓଭରଟେକ୍ କରିବାକୁ ନେଇ ହେମନ୍ତ ଜଣେ ବ୍ୟକ୍ତିଙ୍କୁ ପିଟିଥିଲେ।