ନୂଆଦିଲ୍ଲୀ,୧ା୧: ହତ୍ୟା ଅଭିଯୋଗରେ ୟେମେନ୍ରେ ମୃତ୍ୟୁ ଦଣ୍ଡାଦେଶର ସମ୍ମୁଖୀନ ହୋଇଥିବା ଜଣେ ଭାରତୀୟ ନର୍ସଙ୍କୁ ଏହି ଦଣ୍ଡରୁ ମୁକୁଳାଇବା ପାଇଁ ସମସ୍ତ ସମ୍ଭାବ୍ୟ ସହାୟତା ଯୋଗାଇ ଦିଆଯିବ ବୋଲି କେନ୍ଦ୍ର ସରକାର ମଙ୍ଗଳବାର କହିଛନ୍ତି। ୟେମେନ୍ ନାଗରିକ ତଲାଲ ଅବ୍ଡୋ ମେହଦିଙ୍କୁ ହତ୍ୟା ଅଭିଯୋଗରେ କେରଳ ପାଲାକ୍କାଡ୍ ଜିଲା ଅନ୍ତର୍ଗତ କୋଲେଙ୍ଗୋଡ୍ ଅଞ୍ଚଳର ନର୍ସ ନିମିଶା ପ୍ରିୟାଙ୍କୁ ୨୦୨୦ରେ ସେଠାର ଏକ ତଳକୋର୍ଟ ମୃତ୍ୟୁ ଦଣ୍ଡାଦେଶ ଶୁଣାଇଥିଲେ। ୟେମେନ୍ ସୁପ୍ରିମକୋର୍ଟ ନ୍ୟାୟିକ ପରିଷଦ ୨୦୨୩ ନଭେମ୍ବରରେ ଉକ୍ତ ଦଣ୍ଡାଦେଶକୁ କାଏମ ରଖିଥିଲେ। ୟେମେନ୍ ରାଷ୍ଟ୍ରପତି ରଶଦ ଅଲ୍-ଅଲିମି ସୋମବାର ପ୍ରିୟାଙ୍କ ମୃତ୍ୟୁଦଣ୍ଡକୁ ଅନୁମୋଦନ କରିଛନ୍ତି। ଏହି ମାମଲାରେ ପ୍ରିୟାଙ୍କ ପାଇଁ ନୂଆଦିଲ୍ଲୀ ପକ୍ଷରୁ ସମସ୍ତ ସହାୟତା ଯୋଗାଇ ଦିଆଯିବ ବୋଲି ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ରଣଧୀର ଜୟସ୍ବାଲ ଗଣମାଧ୍ୟମକୁ କହିଛନ୍ତି।
୨୦୧୭ ଜୁଲାଇରୁ ପ୍ରିୟା ଗିରଫ ହୋଇ ୟେମେନ୍ର ଏକ ଜେଲରେ ରହିଛନ୍ତି। ତାଙ୍କ ମୁକ୍ତି ମୃତକଙ୍କ ପରିବାରର କ୍ଷମା ଉପରେ ନିର୍ଭର କରୁଛି। ଯଦି ଉକ୍ତ ପରିବାର କ୍ଷମା ନ ଦିଅନ୍ତି, ତେବେ ମାସେ ମଧ୍ୟରେ ପ୍ରିୟାଙ୍କୁ ଫାଶୀ ଦିଆଯିବ। ସାନାସ୍ଥିତ ଟ୍ରାଏଲ୍ କୋର୍ଟଙ୍କ ମୃତ୍ୟୁ ଦଣ୍ଡାଦେଶ ରାୟ ବିରୋଧରେ ପ୍ରିୟାଙ୍କ ଆବେଦନକୁ ୨୦୨୩ ନଭେମ୍ବରରେ ୟେମେନ୍ ସୁପ୍ରିମକୋର୍ଟ ଜୁଡିସିଆଲ୍ କାଉନ୍ସିଲ ଖାରଜ କରିଦେଇଥିଲେ। ଏବେ ମୃତ୍ୟୁଦଣ୍ଡରୁ ମୁକୁଳିବାର ଗୋଟିଏ ବିକଳ୍ପ ହେଲା ମୃତକଙ୍କ ପରିବାରକୁ ପ୍ରିୟାଙ୍କ ପରିବାର ପକ୍ଷରୁ ଆବଶ୍ୟକ କ୍ଷତିପୂରଣ ପ୍ରଦାନ କରାଯିବା। କ୍ଷତିପୂରଣ ପାଇବା ପରେ ମେହଦିଙ୍କ ପରିବାର ଓ ସେମାନଙ୍କ ସମ୍ପ୍ରଦାୟର ନେତା ପ୍ରିୟାଙ୍କୁ କ୍ଷମା ପ୍ରଦାନ କରିବେ। ଏହା ପରେ ତାଙ୍କ ମୃତ୍ୟୁ ଦଣ୍ଡାଦେଶକୁ ଖାରଜ କରାଯାଇପାରିବ।
କ୍ଷତିପୂରଣ ଦେଇ ମାମଲାର ଆପୋସ ସମାଧାନ ପାଇଁ ବୁଝାମଣା ଚାଲିଥିଲା। ତେବେ ପ୍ରିୟାଙ୍କ ତରଫରୁ ନିଯୁକ୍ତ ଓକିଲଙ୍କୁ ଦେୟ ପୈଠ କରିବାରେ ବିଳମ୍ବ ହେବାରୁ ବୁଝାମଣା ଅଟକି ଯାଇଥିଲା। ପ୍ରାକ୍ ବୁଝାମଣା ଦେୟ ବାବଦରେ ଓକିଲ ଜଣକ ୨ କିସ୍ତିରେ ୪୦,୦୦୦ ଆମେରିକୀୟ ଡଲାର ଦାବି କରିଥିଲେ। ସମ୍ପୂର୍ଣ୍ଣ ଦେୟ ପୈଠ କରା ନ ଗଲେ, ସେ ବୁଝାମଣା ପ୍ରକ୍ରିୟାକୁ ଆଗେଇବେ ନାହିଁ ବୋଲି କହିଥିଲେ। ପ୍ରିୟାଙ୍କ ମା’ ପ୍ରେମକୁମାରୀ ଗତ ଏପ୍ରିଲରେ ୟେମେନ୍ ଯାଇ ଝିଅଙ୍କୁ ଜେଲରେ ଦେଖାକରିଥିଲେ। ସେବେଠାରୁ ପ୍ରେମକୁମାରୀ ସେଠାରେ ରହି ଝିଅଙ୍କ ମୁକ୍ତି ପାଇଁ ଉଦ୍ୟମ ଚଳାଇଛନ୍ତି।
ସୂଚନାଯୋଗ୍ୟ, ୨୦୦୮ରେ ପ୍ରିୟା ୟେମେନ୍ ଯାଇ ସେଠାର କେତେକ ହସ୍ପିଟାଲରେ କାମ କରିବା ପରେ ୨୦୧୫ରେ ନିଜସ୍ବ କ୍ଲିନିକ୍ ଆରମ୍ଭ କରିଥିଲେ। ୟେମେନି ଆଇନର ବ୍ୟବସ୍ଥା ଅନୁଯାୟୀ ସେ କ୍ଲିନିକ୍ରେ ମେହଦିଙ୍କୁ ସ୍ଥାନୀୟ ସହଯୋଗୀ ରଖିଥିଲେ। ତେବେ ମେହଦି କ୍ଲିନିକ୍ରୁ ଅର୍ଥ ହଡ଼ପ କରୁଥିବା ଅଭିଯୋଗ ସମ୍ପର୍କରେ ପ୍ରିୟା ତାଙ୍କୁ ପଚାରିବାରୁ, ଉଭୟଙ୍କ ମଧ୍ୟରେ ମତଭେଦ ସୃଷ୍ଟି ହୋଇଥିଲା। ମେହଦିଙ୍କ ପାଖରେ ରହିଥିବା ନିଜ ପାସ୍ପୋର୍ଟ ଫେରିପାଇବା ପାଇଁ ପ୍ରିୟା ତାଙ୍କୁ ସଂଜ୍ଞହୀନ କରିବା ଉଦ୍ଦେଶ୍ୟରେ ନିଶା ଇଞ୍ଜେକ୍ଶନ ଦେଇଥିଲେ। ତେବେ ନିଶାର ମାତ୍ରା ଅଧିକ ହେବାରୁ ମେହଦିଙ୍କର ମୃତ୍ୟୁ ଘଟିଥିଲା। ପ୍ରିୟା ସେହି ସମୟରେ ୟେମେନ୍ ଛାଡ଼ି ପଳାଇଆସିବାକୁ ଉଦ୍ୟମ କରୁଥିବାବେଳେ ତାଙ୍କୁ ଗିରଫ କରାଯାଇଥିଲା।