ନୂଆଦିଲ୍ଲୀ,୯।୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାର୍ଲାମେଣ୍ଟରେ ପୂର୍ବତନ କଂଗ୍ରେସ ମୁଖ୍ୟ ରାହୁଲ ଗାନ୍ଧୀଙ୍କୁ ସିଧାସଳଖ ଟାର୍ଗେଟ କରିଛନ୍ତି। ଗୁରୁବାର ରାଜ୍ୟ ସଭାରେ ସେ ପୂର୍ବତନ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ବିଷୟରେ କହି କଂଗ୍ରେସକୁ କଟାକ୍ଷ କରିଛନ୍ତି। କୌଣସି କାର୍ଯ୍ୟକ୍ରମରେ ନେହେରୁଙ୍କ ନାମ ନ ନିଆଗଲେ କିଛି ଲୋକ ବର୍ଷି ଯାଇଥାନ୍ତି। ତାଙ୍କ ରକ୍ତ ଗରମ ହୋଇଯାଇଥାଏ। ଏହି ଭୁଲ ଆମେ ଠିକ୍ କରିନବୁ। ହେଲେ ବୁଝିପାରୁନାହିଁ ତାଙ୍କ ପୀଢ଼ିର କେହି ବି ନେହେରୁ ସର୍ନେମ ରଖିବାକୁ କାହିଁକି ଡରୁଛନ୍ତି ବୋଲି ସେ ପ୍ରଶ୍ନ କରିଛନ୍ତି।
ମୋଦି କହିଛନ୍ତି, କେତେକ ଲୋକଙ୍କୁ ସରକାରୀ ଯୋଜନା ନାମ ଏବଂ ନାମରେ ସଂସ୍କୃତ ଶବ୍ଦର ବ୍ୟବହାର ସହିତ ସମସ୍ୟା ଥିଲା। ଏକ ରିପୋର୍ଟରେ ପଢ଼ିଥିଲି ଯେ ଗାନ୍ଧୀ-ନେହେରୁ ପରିବାର ନାମରେ ୬୦୦ ସରକାରୀ ଯୋଜନା ରହିଛି। ତଥାପି ତାଙ୍କ ନାମ କାହିଁକି ନିଆଯାଉନାହିଁ। କୌଣସି କାର୍ଯ୍ୟକ୍ରମରେ ନେହେରୁଙ୍କ ନାମ ନିଆ ନ ଗଲେ କିଛି ଲୋକ ରାଗରେ ନିଆଁବାଣ ହୋଇଥାନ୍ତି। ହେଲେ ମୁଁ ବୁଝିପାରୁନାହିଁ ତାଙ୍କ ପୀଢ଼ିର ଲୋକମାନେ ନିଜର ସର୍ନେମ୍ରେ ନେହେରୁ କାହିଁକି ବ୍ୟବହାର କରନ୍ତି ନାହିଁ। ସେମାନେ କାହାକୁ ଭୟ କରନ୍ତି ଏବଂ ଲଜ୍ଜିତ ଅନୁଭବ କରନ୍ତି ବୋଲି ମୋଦି ପଚାରିଛନ୍ତି। ଏତେ ବଡ଼ ମହାନ ବ୍ୟକ୍ତିତ୍ୱ ସତ୍ତ୍ୱେ ଆପଣ ଏହାକୁ ମଞ୍ଜୁର କରୁନାହାନ୍ତି, ପରିବାର ତାହା କରୁନାହିଁ ଏବଂ ଆମକୁ ହିସାବ ମଗାଯାଉଛି ବୋଲି ସେ ମଧ୍ୟ କହିଛନ୍ତି।
ସେହିଭଳି ମୋଦି ଆଦାନୀ ଗ୍ରୁପ ସହ ଜଡ଼ିତ ମାମଲାରେ ବିରୋଧୀଙ୍କ ଅଭିଯୋଗକୁ ନେଇ ମଧ୍ୟ ଜବାବ ଦେଇଛନ୍ତି। ଯେତେ କାଦୁଅ ତାଙ୍କ ଉପରେ ଫିଙ୍ଗାଯିବ, ସେତେ ପଦ୍ମ ଫୁଟିବ ବୋଲି ସେ କହିଛନ୍ତି। ଏପରିକି ଗୁରୁତ୍ୱପୂର୍ଣ୍ଣ ଗୃହରେ କିଛି ଲୋକଙ୍କ ଆଚରଣ ଦୁର୍ଭାଗ୍ୟଜନକ, କିଛି ଲୋକଙ୍କ କଥା କେବଳ ଗୃହ ନୁହେଁ ବରଂ ଦେଶ ପାଇଁ ମଧ୍ୟ ନିରାଶାଜନକ ବୋଲି ସେ କହିଛନ୍ତି।