ନୂଆଦିଲ୍ଲୀ,୯।୧୧: ଜଷ୍ଟିସ ସଞ୍ଜୀବ ଖାନ୍ନା ଦେଶର ପରବର୍ତ୍ତୀ ପ୍ରଧାନ ବିଚାରପତି ହେବେ। ସେ ନଭେମ୍ବର ୧୧ରେ ୫୧ ତମ ମୁଖ୍ୟ ବିଚାର ପତି ବା ସିଜେଆଇ ଭାବରେ ଶପଥ ଗ୍ରହଣ କରିବେ। ସୂଚନାଯୋଗ୍ୟ ଯେ ବିଦାୟୀ ସିଜେଆଇ ଡି ଓ୍ବାଇ ଚନ୍ଦ୍ରଚୂଡ ନଭେମ୍ବର ୧୦ରେ ତାଙ୍କ ପଦରୁ ଅବସର ନେଉଛନ୍ତି। ଶୁକ୍ରବାର ତାଙ୍କର ଶେଷ କାର୍ଯ୍ୟ ଦିବସ ଥିଲା ।
ତେବେ ସିଜେଆଇ ଭାବରେ ଶପଥ ଗ୍ରହଣ କରିବା ପୂର୍ବରୁ ମଧ୍ୟ ଜଷ୍ଟିସ ସଞ୍ଜୀବ ଖାନ୍ନାଙ୍କ ପାଇଁ ସମସ୍ୟା ଉପୁଜିଛି। ବର୍ତ୍ତମାନ ସେ ସକାଳ ବୁଲିବାକୁ ବା ମର୍ଣ୍ଣିଂ ଓ୍ବାକ ଯାଇପାରୁ ନାହାଁନ୍ତି । ଖବର ଅନୁଯାୟୀ, ଜଷ୍ଟିସ ଖାନ୍ନାଙ୍କର ପ୍ରତିଦିନ ୧୦କିଲୋମିଟର ଚାଲିବାର ଅଭ୍ୟାସ ଅଛି। ସେ ସବୁବେଳେ ସକାଳ ଚାଲିବା ସମୟରେ ଏକୁଟିଆ ବାହାରକୁ ଯାଉଥିଲେ ଏବଂ ଲୋଧି ଗାର୍ଡନ ପରିଦର୍ଶନ କରୁଥିଲେ।
ଘଟଣା ହେଲା ସିଜେଆଇ ହେବା ପରେ ତାଙ୍କୁ ପ୍ରୋଟୋକଲ ଅନୁସରଣ କରିବାକୁ ପଡିବ, ଯାହା ଅଧୀନରେ ତାଙ୍କୁ ସୁରକ୍ଷା କର୍ମୀଙ୍କ ସହ ବୁଲିବାକୁ ପଡିବ। ଏଭଳି ପରିସ୍ଥିତିରେ ସେ ଚାଲିବା ଛାଡି ଦେଇଛନ୍ତି। ଯଦି ରିପୋର୍ଟକୁ ବିଶ୍ୱାସ କରାଯାଏ, ଜଷ୍ଟିସ ଖାନ୍ନାଙ୍କୁ ସିଜେଆଇ ନୋଟିଫିକେଶନ ପ୍ରକାଶ ପାଇବା ପରେ ଏକାକୀ ବୁଲିବାକୁ ନୁହେଁ ବରଂ ସୁରକ୍ଷା କର୍ମୀଙ୍କ ସହିତ ଯିବାକୁ ପରାମର୍ଶ ଦିଆଯାଇଥିଲା। ଏହାକୁ ନଜରରେ ରଖି ସେ ସୁରକ୍ଷା କର୍ମୀଙ୍କ ସହ ବୁଲିବାକୁ ଯିବେ ନାହିଁ ବୋଲି ନିଷ୍ପତ୍ତି ନେଇଥିଲେ।
ଖବର ଅନୁଯାୟୀ, ଜଷ୍ଟିସ ଖାନ୍ନା ଏକାକୀ ବୁଲିବାକୁ ପସନ୍ଦ କରନ୍ତି ଏବଂ ନିଜ ବନ୍ଧୁମାନଙ୍କୁ ଭେଟିବା ପାଇଁ ଅନେକ ସମୟରେ ନିଜ କାର୍ ଚଳାନ୍ତି। ଜଷ୍ଟିସ ଖାନ୍ନା ଦିଲ୍ଲୀରେ ସ୍କୁଲରୁ କଲେଜ ପର୍ଯ୍ୟନ୍ତ ଅଧ୍ୟୟନ କରିଛନ୍ତି, ତେଣୁ ସେ ସହରର ପ୍ରତ୍ୟେକ କୋଣ ଅନୁକୋଣରେ ପରିଚିତ। ସେ ସରଳ ଏବଂ ଶାନ୍ତ ପ୍ରକୃତିର ବୋଲି ବିବେଚନା କରାଯାଏ, ଯିଏ ପବ୍ଲିସିଟିରୁ ଦୂରରେ ରହିବାକୁ ପସନ୍ଦ କରନ୍ତି।