ନୂଆଦିଲ୍ଲୀ,୨୭।୮: ସୋସିଆଲ ମିଡିଆ ଟୁଇଟରେ କେବେ, କ’ଣ କେମିତି ଟ୍ରେଣ୍ଡ କରିବ ତା’ର ଅନୁମାନ ଲଗାଇବା ମୁସ୍କିଲ। ଏବେ ଯେମିତି ୨୬।୧୧ ମୁମ୍ବାଇ ମାମଲାରେ ଗିରଫ ହୋଇ ଫାଶୀ ପାଇଥିବା ପାକିସ୍ତାନ ଆତଙ୍କବାଦୀ ଆମିର ଅଜମଲ କଶାବ ଅଚାନକ ଟ୍ରେଣ୍ଡ କରିବାରେ ଲାଗିଛି। ଏହାପରେ ଏବେ ସମସ୍ତଙ୍କ ମନରେ ଗୋଟିଏ ପ୍ରଶ୍ନ ଏବେ କାହିଁକି କଶାବ ଟ୍ରେଣ୍ଡରେ ଆସିଲା। ପ୍ରକୃତରେ #kasab ଟ୍ରେଣ୍ଡିଙ୍ଗ ଉପରେ ବଲିଉଡ୍ ନାୟିକା ସ୍ବରା ଭାସ୍କରଙ୍କର ଏକ ଟୁଇଟ୍ ରହିଛି। ଏଥିରେ ସେ ଅଭିନେତା ସୁଶାନ୍ତ ସିଂ ରାଜପୁତ ମାମଲାରେ ଅଭିଯୁକ୍ତ କୁହାଯାଉଥିବା ଅଭିନେତ୍ରୀ ରିୟା ଚକ୍ରବର୍ତ୍ତିଙ୍କ ତୁଳନା କଶାବ ସହ କରି ଦେଇଛନ୍ତି। ସ୍ବରା କହିଛନ୍ତି ଦେଶର ଗଣମାଧ୍ୟମ ରିୟାଙ୍କ ପଛରେ ଯେମିତି ଲାଗିଯାଇଛନ୍ତି, ମୋତେ ଲାଗୁଛି କଶାବ ଉପରେ ମଧ୍ୟ ଏମିତି ମିଡିଆ ଟ୍ରାଏଲ ହୋଇ ନ ଥିଲା। ସ୍ବରା ଏବେ ରିୟାଙ୍କ ତୁଳନା କଶାବ ସହ କରିଥିବାରୁ ଟୁଇଟରରେ ତାଙ୍କୁ କିଛି ପ୍ରଶ୍ନ ମଧ୍ୟ କରାଯାଇଛି। ଜଣେ ୟୁଜର ଲେଖିଛନ୍ତି, ହଁ ଆମେ ଏମିତି ଏକ ସମାଜରେ ରହୁଛୁ ଯେଉଁଠି ଲୋକେ କଶାବକୁ ଆତଙ୍କବାଦୀ କହିବାକୁ ଲାଜ କରୁଛନ୍ତି। ଏହାସହ ଆହୁରି ମଧ୍ୟ କିଛି ଜବାବ ମିଳିଛି ସ୍ବରାଙ୍କୁ।