ନୂଆଦିଲ୍ଲୀ,୩୧।୮: ୧୯୮୩ ବିଶ୍ୱକପ୍ ବିଜେତା ଭାରତୀୟ ଟିମ୍ର ସଦସ୍ୟ ମଦନ ଲାଲ ଏସିଆ କପ୍ରେ ମହମ୍ମଦ ଶାମିଙ୍କ ଚୟନ କରା ନ ଯିବାକୁ ନେଇ ପ୍ରଶ୍ନ ଉଠାଇବା ସହ ଚୟନକର୍ତ୍ତାଙ୍କ ଉପରେ ବର୍ଷିଛନ୍ତି। ଶାମିଙ୍କୁ ନିଶ୍ଚିତ ଭାବେ ଆସନ୍ତା ବିଶ୍ୱକପ୍(ଟି୨୦) ଲାଗି ଚୟନ କରାଯିବା ଉଚିତ। କାରଣ ବୁମ୍ରାଙ୍କ ପରେ ସେ ହିଁ ସର୍ବଶ୍ରେଷ୍ଠ ବୋଲର ବୋଲି ସେ କହିଛନ୍ତି।
୨୦୨୧ରେ ଭାରତ ପକ୍ଷରୁ ଶେଷ ଟି୨୦ ମ୍ୟାଚ୍ ଖେଳିଥିଲେ ଶାମି। ଏହାପରଠାରୁ ସେ ଜାତୀୟ ଦଳରୁ ବାଦ୍ ପଡ଼ିଛନ୍ତି। ଆଇପିଏଲ୍ ୨୦୨୨ରେ ଦ୍ରୁତ ବୋଲର ଗୁଜରାଟ ଟାଇଟନ୍ସ ପାଇଁ ସ୍ମରଣୀୟ ପ୍ରଦର୍ଶନ କରିଥିଲେ ହେଁ ତାଙ୍କୁ ଭାରତୀୟ ଟି୨୦ ଦଳରେ ସ୍ଥାନ ମିଳିନାହିଁ। ଜସପ୍ରିତ ବୁମ୍ରାଙ୍କ ଅନୁପସ୍ଥିତିରେ ତାଙ୍କୁ ଚୟନ କରାଯିବ ବୋଲି କୁହାଯାଇଥିଲା। ହେଲେ ଆବେଶ ଖାଁ, ଅର୍ଶଦୀପ ସିଂ ଏବଂ ଭୁବନେଶ୍ୱର କୁମାରଙ୍କୁ ଟୁର୍ନାମେଣ୍ଟରେ ସୁଯୋଗ ମିଳିଛି। ଏହାକୁ ନେଇ ଅନେକ ଅସନ୍ତୋଷ ବ୍ୟକ୍ତ କରିଛନ୍ତି। ଏହି ତାଲିକାରେ ଯୋଡ଼ି ହୋଇଛନ୍ତି ମଦନ।
ମଦନ କହିଛନ୍ତି, ଟି୨୦ ବିଶ୍ୱକପ୍ ଲାଗି ଶାମିଙ୍କୁ ନିଶ୍ଚିତ ଭାବେ ଜାତୀୟ ଦଳରେ ସୁଯୋଗ ମିଳିବା ଉଚିତ। ସେ ବୁମ୍ରାଙ୍କ ପରେ ଭାରତର ସର୍ବଶ୍ରେଷ୍ଠ ବୋଲର। ମୁଁ ଏଭଳି ବୋଲର୍ ଚାହିଁବି ଯିଏ ଉଇକେଟ ବାହାର କରିବ। ମୁଁ ଏଭଳି ବୋଲର୍ ଚାହିଁବି ନାହିଁ ଯିଏ ରନ୍ ରୋକିବା ଉପରେ କେବଳ ଧ୍ୟାନ ଦେଉଛି। ଏହି ଫର୍ମାଟରେ ବ୍ୟାଟ୍ସମ୍ୟାନ୍ ତ ରନ୍ କରିବେ। ରନ୍ ରୋକିବାର ଗୋଟିଏ ମାତ୍ର ଉପାୟ ହେଉଛି ଉଇକେଟ ନେବା। ଏସବୁକୁ ଦେଖିଲେ ଶାମିଙ୍କ ଚୟନ ନ ହେଲେ ଚୟନକର୍ତ୍ତା ବଡ଼ ଭୁଲ କରିବେ। ସେ ବହୁତ ଭଲ ବୋଲର୍। ପୂର୍ବରୁ ମଧ୍ୟ ଭଲ ପ୍ରଦର୍ଶନ କରିଛନ୍ତି। ତାଙ୍କୁ କାହିଁକି ଟି୨୦ ଖେଳାଯାଉନାହିଁ ତାହା ଆଶ୍ଚର୍ଯ୍ୟ ଲାଗୁଛି। ଶାମି ଦୁନିଆର ସର୍ବଶ୍ରେଷ୍ଠ ଦ୍ରୁତ ବୋଲରଙ୍କ ମଧ୍ୟରୁ ଜଣେ ବୋଲି ସେ କହିିଛନ୍ତି।