ରାୟଗଡ଼ା,୭।୧୨(ଆଶିଷ ରଞ୍ଜନ ପଣ୍ଡା): ମିଗ୍ଜୋମ୍ ପ୍ରଭାବରେ ରାୟଗଡ଼ା ଜିଲାର ପ୍ରତ୍ୟେକ ଅଞ୍ଚଳରେ ବୁଧବାର ଦିନସାରା ବର୍ଷା ଲାଗି ରହିଛି । ମଙ୍ଗଳବାର ସକାଳୁ ପାଗ କୋହଲା ରହିଥିବା ବେଳେ ସନ୍ଧ୍ୟାରୁ ଆରମ୍ଭ ହୋଇଯାଇଥିଲା ବର୍ଷା । ଅମଳ ସମୟରେ ଏଭଳି ଅଦିନିଆ ବର୍ଷା ଯୋଗୁ ଜିଲାରେ ବ୍ୟାପକ ଫସଲ ନଷ୍ଟ ହୋଇଥିବା ଦେଖିବାକୁ ମିଳିଛି। ଆଖି ସାମ୍ନାରେ ଅମଳ ଫସଲ ଉଜୁଡ଼ିଯାଉଥିବାରୁ ଚାଷୀକୁଳ ହତାଶ ହୋଇପଡ଼ିଛନ୍ତି।
ବିଭାଗୀୟ ତଥ୍ୟ ଅନୁସାରେ ବୁଧବାର ପ୍ରାୟ ସ୍ଥାନରେ ୧୦ ମି.ମି.ରୁ ଅଧିକ ପରିମାଣରେ ବର୍ଷା ରେକର୍ଡ ହୋଇଛି । ଚନ୍ଦ୍ରପୁର ବ୍ଲକରେ ସର୍ବନିମ୍ନ ୪.୨ ମି.ମି. ବର୍ଷା ରେକର୍ଡ଼ ହୋଇଥିବା ବେଳେ କଲ୍ୟାଣସିଂହପୁର ବ୍ଲକରେ ସର୍ବାଧିକ ୨୭ ମି.ମି. ଏବଂ ମୁନିଗୁଡ଼ାରେ ୨୩.୬ ମି.ମି. ବର୍ଷା ରେକର୍ଡ ହୋଇଥିବା ଜଣାପଡ଼ିଛି । ସେହିଭଳି ରାୟଗଡ଼ା ବ୍ଲକରେ ୧୬.୮ ମି.ମି., କୋଲନରା ବ୍ଲକରେ ୧୪.୮ମି.ମି. କାଶୀପୁର ବ୍ଲକରେ ୧୩.୭ ମି.ମି., ଗୁଣପୁର ବ୍ଲକରେ ୧୪ ମି.ମି., ପଦ୍ମପୁର ବ୍ଲକରେ ୪.୩ ମି.ମି., ଗୁଡ଼ାରି ବ୍ଲକରେ ୭.୮ ମି.ମି., ରାମନାଗୁଡ଼ାରେ ୧୯.୮ ମି.ମି.ଏବଂ ବିଷମକଟକରେ ୧୬.୬ ମି.ମି. ବର୍ଷା ରେକର୍ଡ଼ ହୋଇଛି । ତେବେ ଏହି ଅଦିନିଆ ବର୍ଷା ଯୋଗୁ ଜିଲାର ଧାନ, ମାଣ୍ଡିଆ ଓ କପା ଚାଷ ଉପରେ ବିଶେଷ ପ୍ରଭାବ ପକାଇଛି । ଚଳିତ ବର୍ଷ ୪୦ହଜାରରୁ ଊର୍ଦ୍ଧ୍ୱ ହେକ୍ଟର ଜମିରେ ଧାନ, ୧୮ହଜାର ହେକ୍ଟରରୁ ଅଧିକ ଜମିରେ ମାଣ୍ଡିଆ ଏବଂ ୪୯ ହଜାରରୁ ଅଧିକ ହେକ୍ଟରରେ କପାଚାଷ ହୋଇଥିବା ବେଳେ ଅଦିନିଆ ବର୍ଷା ଯୋଗୁ ଚାଷୀ ସେ ସବୁ ଅମଳ କରିପାରିନାହାନ୍ତି । ଯେତିକି ପରିମାଣରେ ଅମଳ କରିଛନ୍ତି ବର୍ତ୍ତମାନ ସେଗୁଡ଼ିକର ସୁରକ୍ଷା ଚିନ୍ତାରେ ଚିନ୍ତିତ ରହିଛନ୍ତି । ବର୍ଷା ଯୋଗୁ କପାଚାଷ ନଷ୍ଟ ହେବାର ଅଧିକ ଆଶଙ୍କା ରହିଛି। ଜିଲାରେ କପା ମଣ୍ଡି ଆରମ୍ଭ ହୋଇଥିବା ବେଳେ ବୁଧବାର କେବଳ ୧୧ କ୍ୱିଂଟାଲ କପା ମଣ୍ଡିକୁ ଆସିଥିବା ନିୟନ୍ତ୍ରିତ ବଜାର କମିଟି ପକ୍ଷରୁ ସୂଚନା ମିଳିଛି। ଡିସେମ୍ବର ୨୦ ତାରିଖରୁ ଧାନ ଓ ମାଣ୍ଡିଆ ମଣ୍ଡି ଆରମ୍ଭ ହେବ ା ତେବେ ବର୍ତ୍ତମାନ ଅମଳ ହୋଇଥିବା ଏବଂ ହୋଇ ନ ଥିବା ଧାନ, ମାଣ୍ଡିଆ ଓ କପା ବର୍ଷା ଯୋଗୁ ନଷ୍ଟ ହୋଇଯାଇଥିବା ଚାଷୀମାନେ ଦୁଃଖର ସହ ପ୍ରକାଶ କରିଛନ୍ତି । ତେଣୁ ସେମାନଙ୍କ ପାଇଁ ରାଜ୍ୟ ସରକାର କିଛି ସ୍ବତନ୍ତ୍ର ସହାୟତା ଘୋଷଣା କରିବାକୁ ଚାଷୀ ମହଲରେ ଦାବି ହୋଇଛି ।