ପଲମ,୩।୪(ଡି.ଏନ.ଏ.): କଳାହାଣ୍ଡି ଜିଲା ନର୍ଲା ବ୍ଲକ୍ ରୁପ୍ରା ପଞ୍ଚାୟତସ୍ଥିତ ଟୁଟିଙ୍ଗ ଗ୍ରାମରେ ଅସହାୟ ଅବସ୍ଥାରେ ରହୁଛନ୍ତି ବିଧବା ମଞ୍ଜୁ ଦୁର୍ଗା(୫୦)ଙ୍କ ପରିବାରବର୍ଗ। ପରିବାର ପ୍ରତିପୋଷଣ କରିବା ପାଇଁ ରାଜ୍ୟ ବାହାରୁ କାମ କରିବାକୁ ଯାଇଥିଲେ ମଞ୍ଜୁଙ୍କ ସ୍ବାମୀ ସାଧୁରାମ ଦୁର୍ଗା। କିନ୍ତୁ ରୋଜଗାର ଅର୍ଥ ଆଣିବା ବଦଳରେ ତାଙ୍କର ମୃତଦେହ ଘରକୁ ଆସିଥିଲା। ସ୍ବାମୀଙ୍କ ମୃତ୍ୟୁ ପରଠାରୁ ବିଧବା ମଞ୍ଜୁଙ୍କ ଦୁଃଖଦ କାହାଣୀ ଆରମ୍ଭ ହୋଇଛି। ପରିବାର କହିଲେ ୨ ଝିଅ। ବଡ଼ କାଜଲ ୧୩ ବର୍ଷ ଓ ଅନ୍ୟ ଝିଅି ଅନିତା ଦୁର୍ଗା ବୟସ ୮ବର୍ଷ। ସ୍ବାମୀ ପରିବାର ଛାଡି ଆରପାରିକୁ ଚାଲିଗବା ପରେ ସ୍ତ୍ରୀ ଅନେକ କଷ୍ଟ ବିଡମ୍ବନା ସହି ଆସୁଛନ୍ତି। ହେଲେ ତାଙ୍କୁ ନା ମିଳୁଛି ବିଧବା ଭତ୍ତା ନା ମିଳୁଛି ପ୍ରଧାନମନ୍ତ୍ରୀ ଆବାସ ଗୃହ କିମ୍ବା ଟଙ୍କିକିଆ ଚାଉଳ। ଏମିତି ଦୁର୍ଦ୍ଦିନରେ ଜିବନ ଯାପନ କରୁଥିବା ବେଳେ ଓଳିଏ ଖାଇ ଓଳିଏ ଉପବାସ ରହୁଥିବା ବେଳେ ପାଖ ପଡୋଶୀଙ୍କ ସହଯୋଗରେ ଜୀବନ ବଞ୍ଚାଇ ରହିଛନ୍ତି। ଝିଅ କାଜଲ ଅଷ୍ଟମ ଶ୍ରେଣୀରେ ପାଠ ପଢୁଥିବା ବେଳେ ଅନୀତା ତୃତୀୟ ଶ୍ରେଣୀରେ ପାଠ ପଢୁଛନ୍ତି। ଏହି ପରିପ୍ରେକ୍ଷୀରେ ଜଣେ ଅସହାୟ ଗରିବ ବିଧବା ସ୍ତ୍ରୀଙ୍କ ସାହା ହେବାକୁ କେହି ନାହାନ୍ତି। ୨ ଝିଅମାନଙ୍କର ପାଠ ପଢାରୁ ଆରମ୍ଭ କରି ଅନ୍ୟାନ୍ୟ ଖର୍ଚ୍ଚ କିପରି ପରିପୋଷଣ କରିବେ ତାହା ଭଗବାନଙ୍କ ଉପରେ ଭରସା କରି ରହିଛନ୍ତି ବିଧବା ମଞ୍ଜୁ। ବର୍ତ୍ତମାନ ବିଧବା ସ୍ତ୍ରୀ ଜଣକ ମାନସିକ ଚାପରେ ପଡିରହୁଛନ୍ତି। ନର୍ଲା ବିଡିଓ ତଥା କଳାହାଣ୍ଡି ଜିଲାପାଳ ଏହି ପରିବାରକୁ ସହାୟତ ଯୋଗାଇ ଦେବା ପାଇଁ ଗ୍ରାମବାସୀ ଦାବି କରିଛନ୍ତି।