ମୁମ୍ବାଇ,୧୩ା୮: ମହାରାଷ୍ଟ୍ରର ଔରଙ୍ଗାବାଦର ଏକ ହୋଟେଲ ବାହାରେ ଜଣେ ମହିଳା ହଙ୍ଗାମା କରିଛନ୍ତି। କାରଣ ତାଙ୍କ ସ୍ବାମୀ ଗର୍ଲଫ୍ରେଣ୍ଡଙ୍କ ସହ ହୋଟେଲ ଯାଇଥିବା ଜାଣିବା ପରେ ସେ ସିଧା ଯାଇ ହୋଟେଲ ସାମ୍ନାରେ ପହଞ୍ଚତ୍ଥିଲେ। ସ୍ବାମୀଙ୍କୁ ପ୍ରେମିକାଙ୍କ ସହ ଦେଖି ରାଗ ମୁଣ୍ଡକୁ ଚଢ଼ି ଯାଇଥିଲା। ଫଳରେ ଯୁବତୀଙ୍କର ଚୁଟି ଧରି ପ୍ରବଳ ମାରିଥିଲେ ମହିଳା। ଏହା ପରେ ହୋଟେଲ ସମ୍ମୁଖରେ ଭିଡ଼ ଜମିଥିଲା। ଏହି ହାଇଡ୍ରାମାର ଭିଡିଓ କେହି ଜଣେ ପ୍ରସ୍ତୁତ କରି ସୋସିଆଲ ମିଡିଆରେ ଛାଡ଼ି ଦେଇଛନ୍ତି। ଯାହା ଏବେ ଖୁବ୍ ଭାଇରାଲ ହେଉଛି।
ମହିଳା ଜଣକ ତାଙ୍କ ସ୍ବାମୀ ସବୁବେଳେ କାହା ସହ ଗପୁଥିବାର ସନ୍ଦେହ କରୁଥିଲେ। ତେଣୁ ସେ ପୂରା ନଜର ରଖିଥିଲେ ସ୍ବାମୀଙ୍କ ଉପରେ। ଏକଥା ବି ତାଙ୍କର ସନ୍ଦେହ ହେଉଥିଲା କୌଣସି ଯୁବତୀଙ୍କୁ ଧରି ତାଙ୍କ ସ୍ବାମୀ ବୁଲିବାକୁ ଯାଉଛନ୍ତି। ଏନେଇ ସେ ପତ୍ତା ଲଗାଇବା ଆରମ୍ଭ କରିଦେଲେ। ଯେତେବେଳେ ସ୍ବାମୀ ଘରୁ ବାହାରି ଗଲେ ସେ ତାଙ୍କ ପିଛା କରିଥିଲେ। ପିଛା କରି କରି ଔରଙ୍ଗାବାଦର ହୋଟେଲ କାର୍ତ୍ତିକରେ ପହଞ୍ଚତ୍ଥିଲେ। ସେଠାରେ ସ୍ବାମୀଙ୍କୁ ତାଙ୍କ ପ୍ରେମିକାଙ୍କ ସହ ଦେଖିଥିଲେ। ଏହା ଦେଖିବା ପରେ ରାଗିପାଚି ଲାଲ୍ ହୋଇଯାଇଥିଲେ। ଆଉ ସ୍ବାମୀଙ୍କ ସାମ୍ନାରେ ପ୍ରେମିକାଙ୍କ ଉପରେ ହଙ୍ଗାମା ଆରମ୍ଭ କରିଦେଇଥିଲେ। ଯୁବତୀଙ୍କ ଚୁଟି ଘୋଷାଡ଼ି ବିଧା, ଚାପୁଡ଼ା, ଗୋଇଠା ମାରି ଚାଲିଲେ। କିଛି ସମୟ ଧରି ହୋଟେଲ ବାହାରେ ଏହି ଡ୍ରାମା ଚାଲିଥିଲା। ମହିଳା ଜଣକ ପୋଲିସରେ କହିବେ ବୋଲି ବାରମ୍ବାର କହୁଥିବା ବେଳେ ତାଙ୍କ ସ୍ବାମୀ ନ କହିବା ପାଇଁ ବୁଝାଉଥିଲେ। ଏହି ପୂରା ଘଟଣା ଦେଖୁଥିବା ଦେଖଣାହାରୀଙ୍କ ମଧ୍ୟରୁ କେହି ଜଣେ ଭିଡିଓ ପ୍ରସ୍ତୁତ କରି ସୋସିଆଲ ମିଡିଆରେ ଭାଇରାଲ କରିଦେଇଛନ୍ତି।
