ଲକ୍ଷ୍ମୀପୁର,୨୦ା୧୧(ଅନନ୍ତ ନାୟକ): ରାୟଗଡ଼ା ଜିଲା ଲକ୍ଷ୍ମୀପୁର ଷ୍ଟେଶନ ନିକଟସ୍ଥ ୧ କି.ମି. ଦୂର ଏକ ଗ୍ରାମକୁ ବ୍ୟବସାୟ କରିବାକୁ ଯାଇ ଫେରୁଥିବା ଦମ୍ପତିଙ୍କ ଟ୍ରେନ୍ ଧକ୍କାରେ ମୃତ୍ୟୁ ହୋଇଛି। ସେମାନେ ହେଲେ ବୁର୍ଜା ଗ୍ରାମର ବୁରୁସ ଖରା(୬୦) ଓ ତାଙ୍କ ସ୍ତ୍ରୀ ଯମୁନା ଖରା(୫୫)।
ସୂଚନାଯୋଗ୍ୟ, ଉଭୟେ ଲକ୍ଷ୍ମୀପୁର ଷ୍ଟେଶନ ନିକଟସ୍ଥ ଭୁଇପାଟଣା ଗ୍ରାମକୁ ବ୍ୟବସାୟ କରିବାକୁ ଯାଇଥିଲେ। ଗାଁ ଗାଁ ବୁଲି ଶୁଖୁଆ ଓ ଅନ୍ୟାନ୍ୟ ସାମଗ୍ରୀ ବିକ୍ରି କରୁଥିଲେ। ବୁରୁସ ଏବଂ ଯମୁନା କାମ ସାରି ରାସ୍ତାରେ ପଡୁଥିବା ଟ୍ରେନ୍ ଲାଇନ୍ ପାର ହୋଇ ଘରକୁ ଫେରୁଥିବା ସମୟରେ କୋରାପୁଟ-ବିଶାଖାପାଟଣା ପାସେଞ୍ଜର ଉଭୟଙ୍କୁ ଧକ୍କା ଦେଇଥିଲା। ଖବର ପାଇ ଆର୍ପିଏଫ୍ ପୋଲିସ ଘଟଣାସ୍ଥଳରେ ପହଞ୍ଚିବା ପୂର୍ବରୁ ଗ୍ରାମବାସୀ ମୃତଦେହକୁ ଉଠାଇ ନେଇଯାଇଥିବା ଜିଆର୍ପି ଏସ୍ଆଇ ସନ୍ତୋଷୀ ମହନ୍ତ କହିଛନ୍ତି। ଏ ନେଇ କୌଣସି ମାମଲା ରୁଜୁହୋଇ ନ ଥିବା ଜଣାପଡ଼ିଛି। ବାରମ୍ବାର ଦୁର୍ଘଟଣା ଘଟୁଥିବାରୁ ଦୁଇ ପାର୍ଶ୍ୱରେ ବ୍ରିଜ କିମ୍ବା ତାର ବାଡ଼ କରିବାକୁ ଦାବି ହୋଇଛି।
