ବ୍ରହ୍ମପୁର,୨୫ା୧୦(ସୁବାସ ଚନ୍ଦ୍ର ପାଢ଼ୀ): ଦାମ୍ପତ୍ୟ ଜୀବନରେ ଫାଟ ସୃଷ୍ଟି ହେବା ପରେ ସ୍ବାମୀଙ୍କ ପୁରୁଣା ଫଟୋ ସୋସିଆଲ୍ ମିଡିଆରେ ଛାଡି ସ୍ତ୍ରୀ ବ୍ଲାକ୍ମେଲ କରୁଥିବା ନେଇ ନିମଖଣ୍ଡି ଥାନାରେ ଅଭିଯୋଗ ହୋଇଛି। ଯୁବକ ଜଣଙ୍କ ଏତଲାରେ ଦର୍ଶାଇଛନ୍ତି, ତାଙ୍କ ସହ କେତେଜଣ ଯୁବତୀଙ୍କ ଫଟୋ ମଧ୍ୟ ସୋସିଆଲ୍ ମିଡିଆରେ ଅପ୍ଲୋଡ୍ କରାଯାଇଛି। ଫଳରେ ସମାଜରେ ତାଙ୍କର ସମ୍ମାନ ହାନି ହେବା ସହ ପରିବାରର ମର୍ଯ୍ୟାଦାରେ ଆଞ୍ଚ ଆସିଛି। ପୂର୍ବରୁ ମଧ୍ୟ ଏଭଳି ବ୍ଳାକମେଲ କରିବାରୁ ଯୁବକ ଜଣକ ସାଇବର ଥାନାରେ ଏତଲା ଦେଇଥିଲେ। ତଥାପି ପୁଣି ତାଙ୍କର ପୁରୁଣା ଫଟୋ ସୋସିଆଲ୍ ମିଡିଆରେ ଛାଡି ତାଙ୍କ ସ୍ତ୍ରୀ ଏଭଳି କରୁଛନ୍ତି। ଯୁବକ ଜଣକ ସେଲୁନ ଓ ଟାଟୋରେ କାମ କରିବା ସମୟର କିଛି ଫଟୋ ଥିଲା। ସେ ସବୁ ତାଙ୍କ ଲାପଟପରେ ଥିବା ବେଳେ ତାଙ୍କ ସ୍ତ୍ରୀ ଜବରଦସ୍ତ ସେହି ଫଟୋ ନେଇଯାଇଥିଲେ। ବର୍ତ୍ତମାନ ସେହି ଫଟୋକୁ ସୋସିଆଲ୍ ମିଡିଆରେ ଛାଡୁଛନ୍ତି ଏବଂ ପରିବାର ଲୋକଙ୍କୁ ମଧ୍ୟ ପଠାଉଛନ୍ତି। ଯାହାକୁ ନେଇ ବ୍ୟବସାୟିକ କ୍ଷେତ୍ର ଓ ପରିଚିତ ଲୋକଙ୍କ ପାଖରେ ଅପମାନିତ ହେବାକୁ ପଡୁଛି। ବାରମ୍ବାର ଏଭଳି ତାଙ୍କୁ ଅପମାନିତ କରି ଆତ୍ମହତ୍ୟା କରିବାକୁ ବାଧ୍ୟ କରୁଛନ୍ତି ବୋଲି ସେ ଏତଲାରେ ଉଲ୍ଲେଖ କରିଛନ୍ତି। ତାଙ୍କ ସ୍ତ୍ରୀ ବର୍ତ୍ତମାନ ଫୁଲବାଣୀରେ ରହୁଥିବା ବେଳେ କିଛି ବର୍ଷ ହେଲା ଉଭୟଙ୍କ ଭିତରେ ଫାଟ ସୃଷ୍ଟି ହୋଇଥିଲା। ତା’ପରଠୁ ସେ ଏଭଳି କରୁଥିବା ଯୁବକ ଜଣକ କହିଛନ୍ତି। ଏ ସଂକ୍ରାନ୍ତରେ ପୋଲିସ ନଂ. ୩୪୨/୨୩ ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।