ବାଲେଶ୍ୱର ଅଫିସ,୨୦।୨: ସ୍ବାମୀର ଏସିଡ୍ ମାଡ଼ରେ ସ୍ତ୍ରୀ ଓ ତାଙ୍କ ଭଉଣୀ ସମେତ ଦୁଇ ଶିଶୁ ଗୁରୁତର ଆହତ। ବାଲେଶ୍ୱର ଜିଲା ନୀଳଗିରି ସନ୍ତରା ଗାଡିଆ ଅଞ୍ଚଳରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି। ସୂଚନାନୁସାରେ, ନୀଳଗିରି ସନ୍ତରା ଗାଡିଆ ଅଞ୍ଚଳର ଚନ୍ଦନ ରଣା ଗତ ଦେଢ ମାସ ତଳେ ରେମୁଣା ବ୍ଲକ ଭୀମପୁରା ଅଞ୍ଚଳର ବନିତା ସିଂକୁ ବିବାହ କରିଥିଲେ। ତେବେ ବିବାହ ପରେ ଜଣାପଡିଥିଲା ଯେ ଚନ୍ଦନ ପୂର୍ବରୁ ବିବାହ କରିଥିବା ବେଳେ ତାଙ୍କର ୨ଟି ସନ୍ତାନ ରହିଛି।ତେବେ ବନିତାଙ୍କ ପରିବାର ଏସବୁ କଥା ଜାଣିବା ପରେ ବିବାଦ ସୃଷ୍ଟି ହୋଇଥିଲା। ଏହି ଘଟଣା ଥାନାକୁ ଯାଇଥିଲା। ଉଭୟ ପରିବାରର ଆଲୋଚନା ଭିତରେ ଦୁହେଁ ଅଲଗା ହୋଇ ରହିଥିଲେ। ତେବେ ବନିତା ସିଂ ତାଙ୍କ ଭିମପୁରା ସ୍ଥିତ ଭଉଣୀ ଘରେ ରହିଥିବା ବେଳେ ଚନ୍ଦନ ରଣା ସୋମବାର ଯୋଜନାବଦ୍ଧ ଭାବରେ ଏସିଡ ମାଡ଼ କରି ଫେରାର ହୋଇଯାଇଛନ୍ତି। ଏଥିରେ ବନିତାଙ୍କ ସମେତ ତାଙ୍କ ଭଉଣୀ ବର୍ଷା ସିଂ ଓ ବର୍ଷାଙ୍କ ଦୁଇ ଶିଶୁ ଗୁରୁତର ଆହତ ହୋଇ ବାଲେଶ୍ୱର ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛନ୍ତି।
