କେନ୍ଦୁଝର,୧୩।୮(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝରଗଡ଼ ପୌରପାଳିକା ଜନଷ୍ଟନଗଞ୍ଜର ଝଡାସାହିରେ ସ୍ବାମୀଙ୍କ ଛୁରା ମାଡ଼ରେ ସ୍ତ୍ରୀ ଗୁରୁତର ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ସେ ହେଲେ ଗୀତା ଝରା(୨୫)।
ମିଳିଥିବା ସୂଚନା ମୁତାବକ, ଗୀତା ମଦ୍ୟପାନ କରୁଥିବା ବେଳେ ସ୍ବାମୀ ଘନଶ୍ୟାମ ଦେଖିଥିଲେ। ପରେ ସ୍ତ୍ରୀ ଗୀତାଙ୍କୁ ଗୋଡାଇ ଗୋଡାଇ ଏକ ଛୁରାରେ ଆକ୍ରମଣ କରିଥିଲେ। ଫଳରେ ଗୀତାଙ୍କ ପିଠିରେ ଗୁରୁତର ଆଘାତ ଲାଗିଛି। ପରିବାର ଲୋକେ ତାଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରି କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟକୁ ଆଣି ଭର୍ତ୍ତି କରିଥିଲେ। ସେଠାରେ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଛି। ଗ୍ରାମବାସୀ ଏହି ଘଟଣା ପରେ ଘନଶ୍ୟାମଙ୍କୁ ଗ୍ରାମର ଇଲେକ୍ଟ୍ରି ଖୁଣ୍ଟରେ ବାନ୍ଧି ଦେଇଥିଲେ। ଖବର ପାଇ ଟାଉନ ପୋଲିସ ପହଞ୍ଚି ଘନଶ୍ୟାମଙ୍କୁ ନେଇ ତଦନ୍ତ ଚଳାଇଛି। ତେବେ ଘନଶ୍ୟାମ ଟ୍ରକ ଚାଳକ ଭାବେ କାର୍ଯ୍ୟ କରୁଛନ୍ତି।
