ଭୋପାଳ,୧୨ା୯: ଇନ୍ଦୋରର ବିଜୟନଗର ଥାନା ଅନ୍ତର୍ଗତ ସି-୨୧ ମଲ୍ର ତୃତୀୟ ମହଲାରୁ ଜଣେ ମହିଳା ଡେଇଁ ଆତ୍ମହତ୍ୟା ପାଇଁ ଚେଷ୍ଟା କରି ଗୁରୁତର ହୋଇଛନ୍ତି। କାରଣ ତାଙ୍କ ସ୍ବାମୀଙ୍କର ଦୁଇଦିନ ପୂର୍ବରୁ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଥିଲା। ଏଥିରେ ଭାଙ୍ଗିପଡ଼ି ସେ ଏପରି ପଦକ୍ଷେପ ନେଇଥିବା ଜଣାପଡ଼ିଥିଲା। ଏହା ଜଣାପଡ଼ିଥିଲା ସେ ଲେଖିଥିବା ସୁଇସାଇଡ୍ ନୋଟ୍ରୁ। ଏଥିରେ ଲେଖାଥିଲା, ମୁଁ ଚାହୁଁଥିଲି ସ୍ବାମୀଙ୍କ ସହ ମୋ’ର ଅନ୍ତିମ ସଂସ୍କାର ହେଉ ବୋଲି।
ମହିଳା ଜଣଙ୍କ ଯେତେବେଳେ ମଲ୍ର ତୃତୀୟ ମହଲାରୁ ଡେଇଁବାକୁ ଚେଷ୍ଟା କରୁଥିଲେ କେତେକ କର୍ମଚାରୀ ତାଙ୍କୁ ରକ୍ଷା କରିବା ପାଇଁ ଦୌଡ଼ି ଯାଇଥିଲେ। ମାତ୍ର ଅଟକାଇ ପାରି ନ ଥିଲେ। ସେ ତଳେ ପଡ଼ି ଯାଇଥିଲେ। ତାଙ୍କୁ ତୁରନ୍ତ ସ୍ଥାନୀୟ ହସ୍ପିଟାଲକୁ ନିଆଯାଇଥିଲା।
ସୂଚନାଯୋଗ୍ୟ, ୧୫ ଦିନ ପୂର୍ବରୁ ସାନିଆ ସୁମନ ଉଜୈନ ନିବାସୀ ଶୁଭମ୍ ଖଣ୍ଡେଲ୍ଓ୍ବାଲଙ୍କୁ ବିବାହ କରିଥିଲେ। ଦୁଇଦିନ ପୂର୍ବରୁ ଶୁଭମ୍ଙ୍କର ଏକ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଥିଲା। ସେ ଚାହୁଁଥିଲେ ତାଙ୍କ ସ୍ବାମୀଙ୍କ ସହ ତାଙ୍କ ଅନ୍ତିମ ସଂସ୍କାର ହେଉ। ତେଣୁ ସେ ଏପରି ପଦକ୍ଷେପ ନେଇଥିଲେ। ସାନିଆଙ୍କ ନିକଟରୁ ମିଳିଥିବା ଏକ ସୁଇସାଇଡ୍ ନୋଟରୁ ପିତାଙ୍କ ଫୋନ୍ ନମ୍ବର ମିଳିଥିଲା। ତାଙ୍କ ସହ କଣ୍ଟାକ୍ଟ କରି ମେଡିକାଲକୁ ଡାକିଥିଲେ ଉଦ୍ଧାରକାରୀମାନେ।
ଜଣେ ମଲ୍ କର୍ମଚାରୀ କୁହନ୍ତି, ଶନିବାର ମଧ୍ୟାହ୍ନରେ ଏହି ଘଟଣା ଘଟିଛି। ସେମାନେ ସମସ୍ତେ କାମରେ ଲାଗିଥିବା ବେଳେ ଅଚାନକ ଜଣେ ପାଟି କରିବାକୁ ଲାଗିଲେ। ଦେଖିଲା ବେଳକୁ ଏହି ମହିଳା ଜଣକ ମଲ୍ର ତୃତୀୟ ମହଲାରେ ଠିଆ ହୋଇ ତଳକୁ ଡେଇଁ ଆତ୍ମହତ୍ୟା କରିବାକୁ ଚାହଁୁଥିଲେ। ସମସ୍ତେ ଦୌଡ଼ି ଯାଇଥିଲେ ମଧ୍ୟ କେହି ଅଟକାଇ ପାରି ନ ଥିଲେ। ସେ ତଳକୁ ଡେଇଁ ପଡ଼ିଥିଲେ। ସଙ୍ଗେ ସଙ୍ଗେ ତାଙ୍କୁ ହସ୍ପିଟାଲ ନିଆଯାଇଥିଲା। ତାଙ୍କ ମୁଣ୍ଡରେ ଗଭୀର ଆଘାତ ଲାଗିଛି। ପୋଲିସ ତାଙ୍କ ପରିବାର ଲୋକଙ୍କୁ ସୂଚନା ଦେଇଛି। ସେ ବର୍ତ୍ତମାନ ଚିକିତ୍ସିତ ହେଉଛନ୍ତି।
