ଯାଜପୁର ଟାଉନ/ଯାଜପୁର ସଦର,୯।୭(ପ୍ରଯକ୍ତା ପ୍ରିୟଦର୍ଶନୀ ମହାନ୍ତି/ସମର ବିଜୟ ଶରଣ):ଯାଜପୁର ସଦର ଥାନା ଅନ୍ତର୍ଗତ ଭୂଇଁପୁର ପଞ୍ଚାୟତ କତରାପୁର ଗ୍ରାମରେ ଶ୍ୱଶୁର ଘରେ ସ୍ତ୍ରୀଙ୍କୁ ସ୍ବାମୀ ହତ୍ୟା କରିଛନ୍ତି। ଏନେଇ ଥାନାରେ ଅଭିଯୋଗ ହେବାପରେ ପୋଲିସ ମହିଳାଙ୍କ ସ୍ବାମୀଙ୍କୁ ଅଟକ ରଖି ତଦନ୍ତ ଚଳାଇଛି।
ଅଭିଯୋଗ ଅନୁସାରେ, ଗ୍ରାମର ବିଷ୍ଣୁଚରଣ ଗୁଇଁଙ୍କ ଝିଅ ମଧୁସ୍ମିତା ଗୁଇଁ ୨୦୨୧ରେ ମଲପଡ଼ା ଗ୍ରାମର ବିଶ୍ୱନାଥ ମିଶ୍ରଙ୍କ ପୁଅ ଆଲୋକ ମିଶ୍ରଙ୍କୁ ପ୍ରେମ ବିବାହ କରିଥିଲେ। ସେମାନଙ୍କର ଏକ ୭ ମାସର କନ୍ୟା ସନ୍ତାନ ରହିଛି। ଉଭୟଙ୍କ ବୈବାହିକ ଜୀବନ ଭଲରେ କଟୁଥିବାବେଳେ କିଛି ଦିନ ତଳେ ଉଭୟଙ୍କ ମଧ୍ୟରେ ପାରିବାରିକ ଅଶାନ୍ତିକୁ କେନ୍ଦ୍ରକରି ଝଗଡ଼ା ଲାଗିଥିଲା। ତେଣୁ ମଧୁସ୍ମିତା ୭ ଦିନ ହେବ ବାପଘରେ ଆସି ରହୁଥିଲେ। ଶୁକ୍ରବାର ସନ୍ଧ୍ୟାରେ ମଧୁସ୍ମିତା ଓ ଆଲୋକଙ୍କ ମଧ୍ୟରେ ଫୋନ୍ରେ ଝଗଡ଼ା ହୋଇଥିଲା। ପରେ ରାତି ପ୍ରାୟ ୧୦ଟାରେ ମଧୁସ୍ମିତା ଆଲୋକଙ୍କୁ ଫୋନ୍ରେ ବାପ ଘରକୁ ଡକାଇଥିଲେ। ରାତିରେ ସମସ୍ତ ପରିବାର ସଦସ୍ୟ ଖିଆପିଆ କରି ଶୋଇବାକୁ ଯାଇଥିଲେ। ରାତି ପ୍ରାୟ ୧ଟାରେ ମଧୁସ୍ମିତାଙ୍କ ବାପା ବାହାରକୁ ଉଠି ଦେଖିଲା ବେଳକୁ ଝିଅଜ୍ୱାଇଁ ଶୋଇଥିବା ଘର କବାଟ ଖୋଲା ଥିଲା, ହେଲେ ଝିଅ ଜ୍ୱାଇଁ ନ ଥିଲେ। ତେଣୁ ସେ ଆଲୋକଙ୍କୁ ଫୋନ୍ରେ ଘରକୁ ଡକାଇ ଝିଅ ଖବର ପଚାରିବାରୁ ଆଲୋକ ମଧୁସ୍ମିତାଙ୍କୁ ମାରି ପାଖ ପୋଖରୀରେ ପକାଇ ଦେଇଥିବା ସ୍ବୀକାର କରିଥିଲେ। ପରିବାର ଲୋକେ ମଧୁସ୍ମିତାଙ୍କୁ ପୋଖରୀରୁ ଉଦ୍ଧାର କରି ଯାଜପୁର ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ସେଠାରେ ଡାକ୍ତର ତାଙ୍କୁ ମୃତା ଘୋଷଣା କରିଥିଲେ। ମଧୁସ୍ମିତାଙ୍କ ବାପାଙ୍କ ଲିଖିତ ଏତଲା ପରେ ସଦର ଥାନାରେ ନଂ.୧୭୨/୨୩ରେ ଏକ ମାମଲା ରୁଜୁ ହୋଇଛି। ଏହି ଘଟଣା ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି।