ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତ ଆତ୍ମହତ୍ୟା କରିବା ପରେ ଦିନକୁ ଦିନ କିଛି ନା କିଛି ନୂଆ କଥା ସାମ୍ନାକୁ ଆସୁଛି। ଏବେ ତାଙ୍କ ଓ୍ବିକିପିଡିଆ ପେଜ୍କୁ ନେଇ ବେଶ୍ ଗରମାଗରମ ଖବର ଶୁଣିବାକୁ ମିଳୁଛି। ତାଙ୍କ ଓ୍ବିକିପିଡିଆ ପେଜ୍ରେ ଟାଇମ୍ ଅପଡେଟ୍ ହୋଇଥିବା ବର୍ତ୍ତମାନ ଶୁଣିବାକୁ ମିଳୁଛି। ଏହି ଘଟଣାକୁ ନେଇ ସୁଶାନ୍ତଙ୍କ ପ୍ରଶଂସକମାନେ ଗୃହମନ୍ତ୍ରୀଙ୍କୁ ନ୍ୟାୟ ପାଇଁ ଦାବି କରିଛନ୍ତି। ଏହି ଘଟଣାରେ ଏବେ ନୂଆ ତଥ୍ୟ ପଦାକୁ ଆସିଛି।
ସୋସିଆଲ ମିଡିଆରେ କିଛି ୟୁଜର୍ସ କୁହନ୍ତି, ସୁଶାନ୍ତ ଆତ୍ମହତ୍ୟା କରିବା ପୂର୍ବରୁ ଓ୍ବିକିପିଡିଆ ପେଜ୍ ଅପଡେଟ୍ ହୋଇଥିଲା। ୧୪ ଜୁନ୍ ସକାଳ ୯ଟାରୁ ୯.୩୦ ମଧ୍ୟରେ ତାଙ୍କ ଓ୍ବିକିପିଡିଆ ଅପ୍ଡେଟ୍ ହୋଇଥିଲା କି ସେ ଆତ୍ମହତ୍ୟା କରିଛନ୍ତି। ସୁଶାନ୍ତଙ୍କ ଆତ୍ମହତ୍ୟା ଖବର ସେହି ୧୪ ଜୁନ୍ ଅପରାହ୍ନ ୧ଟାରୁ ୨ଟା ମଧ୍ୟରେ ଶୁଣିବାକୁ ମିଳିଥିଲା।
ଏହି ଘଟଣାକୁ ନେଇ ଓ୍ବିକିପିଡିଆ ଡାଇରେକ୍ଟର ଅଭିଷେକ ସୂର୍ଯ୍ୟବଂଶୀ କହିଛନ୍ତି, ଓ୍ବିକିପିଡିଆ ପେଜ୍ ଆଇଏସ୍ଟିର ୟୁଟିସି ଅଫ୍ସେଟ୍ରେ ଚାଲୁଛି। ଯାହା ଭାରତୀୟ ସମୟ ସାଢ଼େ ୫ ଘଣ୍ଟା ପଛରେ ଚାଲିଥାଏ। ସୁଶାନ୍ତ ଆତ୍ମହତ୍ୟା କରିବା ଖବର ସାଢ଼େ ୪ଟାରେ ଜଣାପଡ଼ିଥିଲା। ଯାହା ପରେ ପେଜ୍ ଅପଡେଟ୍ ହୋଇଥିଲା। ଏହି କାରଣରୁ ଓ୍ବିକିପିଡିଆ ପେଜ୍ରେ ୟୁଜର୍ସମାନଙ୍କୁ ଟାଇମ୍ ଗ୍ୟାପ୍ ଦେଖାଉଛି। ତାଙ୍କ ପେଜ୍ରେ କୌଣସି ଟ୍ୟାମ୍ପରିଂ ହୋଇନାହିଁ।
ସୁଶାନ୍ତଙ୍କ ଆତ୍ମହତ୍ୟା ନେଇ ପ୍ରଶଂସକମାନେ କୌଣସି କାରଣକୁ ଅଣଦେଖା କରିବାକୁ ଚାହାନ୍ତି ନାହିଁ। ସେ କେମିତି ଆତ୍ମହତ୍ୟା କଲେ କାହିଁକି କଲେ ପ୍ରତିଟି ଦିଗକୁ ତନ୍ନତନ୍ନ କରି ଖୋଜୁଛନ୍ତି।
ସୁଶାନ୍ତଙ୍କ ମୃତ୍ୟୁକୁ ନେଇ ଲଗାତର ଖୋଳତାଡ଼ ଚାଲିଛି। ତାଙ୍କର ନିକଟ ସମ୍ପର୍କୀୟଙ୍କୁ ମଧ୍ୟ ପଚରାଉଚରା ଜାରି ରହିଛି। କିଛି ତଥ୍ୟ ପୋଲିସକୁ ମିଳିଥିବା ବେଳେ ଆହୁରି ଅଧିକ ତଦନ୍ତ ଜାରି ରହିଛି।