ବାରିପଦା ଅଫିସ,୧।୩: ଅଧିକାରୀଙ୍କ ଅପାରଗତାରୁ ଅସୁରକ୍ଷିତ ହୋଇ ପଡ଼ିଛି ଶିମିଳିପାଳ ଅଭୟାରଣ୍ୟ। ଶତ୍ରୁ ସାଜିଛନ୍ତି ଶିକାରୀ ଓ ବନ କର୍ମଚାରୀ। ଜୀବନ ବଞ୍ଚାଇବାକୁ ଦିଗହରା ହୋଇ ପଡ଼ୁଛନ୍ତି ବନ୍ୟପ୍ରାଣୀ। କୋର୍ ଏରିଆ ଭଳି ସୁରକ୍ଷିତ ସ୍ଥାନରେ ବସବାସ କରୁଥିବା ମହାବଳ ବାଘ ଜନବସତି ମୁହଁା ହେବା ସହ ପଡ଼ୋଶୀ କେନ୍ଦୁଝର ଜିଲାରେ ଆତଙ୍କ ସୃଷ୍ଟି କରିବା ଚିନ୍ତାର କାରଣ ପାଲଟିଛି। ହାତୀ ଓ ଅନ୍ୟାନ୍ୟ ବନ୍ୟପ୍ରାଣୀ ଅଭୟାରଣ୍ୟ ଛାଡ଼ି ସଂରକ୍ଷିତ ଜଙ୍ଗଲରେ ରହିବାକୁ ପସନ୍ଦ କରୁଛନ୍ତି। ଶିକାରୀଙ୍କ ଗୁଳି ଶବ୍ଦରେ ଭୟଭୀତ ଅନେକ ବନ୍ୟପ୍ରାଣୀ ଶିମିଳିପାଳ ଫେରୁ ନାହାନ୍ତି। ଏଭଳି ସମସ୍ୟା ଲାଗି ରହିଲେ ଶିମିଳିପାଳ ପ୍ରାଣୀ ଶୂନ୍ୟ ହେବା ଆଶଙ୍କାକୁ ଏଡ଼ାଇ ଦେଇ ହେବ ନାହିଁ ବୋଲି ପ୍ରାଣୀ ପ୍ରେମୀମାନେ ମତ ଦେଇଛନ୍ତି।
ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଦକ୍ଷିଣ ଡିଭିଜନ ଜେନାବିଲ ରେଞ୍ଜ ଗୁରୁଣ୍ଡିଆ ସେକ୍ସନ ଅଞ୍ଚଳରେ ଦନ୍ତାହାତୀ ଶିକାର ଓ ପୋଡ଼ି ଘଟଣାରେ ୩ ବନକର୍ମଚାରୀଙ୍କ ବିରୋଧରେ ମାମଲା ରୁଜୁ କରି ବନବିଭାଗ ଚୁପ୍ ରହିଛି। ହାତୀ ପୋଡ଼ିରେ ୧୫ରୁ ଊର୍ଦ୍ଧ୍ୱ କର୍ମଚାରୀ ସାମିଲ ଥିବା ବେଳେ ମାତ୍ର ୩ଜଣ କର୍ମଚାରୀଙ୍କୁ ଗିରଫ କରାଯାଇଛି। ଅନ୍ୟ କର୍ମଚାରୀମାନଙ୍କୁ ବନବିଭାଗ ଘଣ୍ଟ ଘୋଡ଼ାଇ ଦୋଷମୁକ୍ତ କରିବାକୁ ପ୍ରୟାସ କରୁଥିବା ପ୍ରାକ୍ତନ ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଭାନୁମିତ୍ର ଆଚାର୍ଯ୍ୟ ପ୍ରକାଶ କରିଛନ୍ତି ା ସେହିପରି ଉକ୍ତ ଡିଭିଜନର ପିଠାବଟା ରେଞ୍ଜ ବାଲିଖାଇ ସେକ୍ସନ ଗୋପୀନାଥପୁର ବିଟ୍ ଅଞ୍ଚଳରେ ଏକ ଦନ୍ତାହାତୀର ଶୁଣ୍ଢ ଓ ଦାନ୍ତ ଲୁଟ୍ ଘଟଣାରେ ବନବିଭାଗର ନିଷ୍କ୍ରିୟତା ପଦାରେ ପଡ଼ିଛି। ୨୦ଦିନ ବିତିବା ପରେ ମଧ୍ୟ ଶିକାରୀଙ୍କୁ ଧରିବାରେ ବନବିଭାଗ ଫେଲ୍ ମାରିଛି। ବିଭାଗୀୟ ରିପୋର୍ଟ ଅନୁଯାୟୀ କର୍ମଚାରୀମାନେ ଜଙ୍ଗଲ ମଧ୍ୟରେ ହଜାର ହଜାର କି.ମି ଚାଲି ଚାଲି ଡ୍ୟୁଟି କରୁଥିବା ବେଳେ ଶିକାରୀମାନେ ଅଭୟାରଣ୍ୟରେ ପଶି କିପରି ହରିଣ, ଶମ୍ବର, ବାଘ ଓ ହାତୀ ଶିକାର କରୁଛନ୍ତି ତାହାକୁ ନେଇ ପ୍ରଶ୍ନ ଉଠିଛି ା
ସେହିପରି ୨ମାସ ମଧ୍ୟରେ ତିନୋଟି ବାଘ ଛାଲ ଜବତ ଘଟଣା ପରେ ବନ୍ୟପ୍ରାଣୀଙ୍କ ପାଇଁ ଶିମିଳିପାଳ ଅଭୟାରଣ୍ୟ ଅସୁରକ୍ଷିତ ହୋଇ ପଡ଼ିଥିବା ସ୍ପଷ୍ଟ ହୋଇଛି। କୋର ଅଞ୍ଚଳରେ ବସବାସ କରୁଥିବା ମହାବଳ ବାଘ ଗଁା ମୁହଁା ହେବା ବନ ବିଭାଗର ଚିନ୍ତା ବଢ଼ାଇଛି। ଶିକାରୀମାନେ ବାଘର ଗତିବିଧିକୁ ନଜର କରି କୋର ଅଞ୍ଚଳରେ ପ୍ରବେଶ କରୁଥିବାରୁ ହିଂସ୍ର ଜନ୍ତୁମାନେ ଜୀବନ ବଞ୍ଚାଇବାକୁ ଆପ୍ରାଣ ଉଦ୍ୟମ କରୁଥିବା ଭଞ୍ଜସେନାର ଜିଲା ସଭାପତି ପିଣ୍ଟୁୁ ମାଇତି କହିଛନ୍ତି। ଏ ସଂକ୍ରାନ୍ତରେ ବିଭାଗୀୟ ଅଧିକାରୀ ମୁହଁ ଖୋଲୁ ନ ଥିବା ପରିତାପର ବିଷୟ ପାଲଟିଛି।