ଯୋଡ଼ା/ କେନ୍ଦୁଝର,୭ା୪(ଡି.ଏନ୍.ଏ/ସ୍ବ.ପ୍ର.): କେନ୍ଦୁଝର ଜିଲାରେ ହାତୀ-ମଣିଷ ଲଢ଼େଇ ପରେ ଏବେ ବାର୍ହା-ମଣିଷ ଲଢ଼େଇ ବନ ବିଭାଗ ପାଇଁ ଚିନ୍ତାର ବିଷୟ ହୋଇଛି। ଖାଦ୍ୟ ଅଭାବ ଓ ଜଙ୍ଗଲ ନିଆଁ କାରଣରୁ ବନ୍ୟପ୍ରାଣୀ ଗାଁମୁହାଁ ହେଉଥିବା ବେଳେ ବନ ବିଭାଗ ସେମାନଙ୍କୁ ସୁରକ୍ଷା ଦେବାରେ ବିଫଳ ହୋଇଥିବା ଅଭିଯୋଗ ହେଉଛି। ଲୋକଙ୍କ ଆକ୍ରୋଶର ଶିକାର ହୋଇ ବନ୍ୟପ୍ରାଣୀ ମୃତ୍ୟୁବରଣ କରୁଥିବା ବେଳେ ଲୋକେ ଭୟଭୀତ ଅବସ୍ଥାରେ ରହୁଛନ୍ତି। ବୁଧବାର ଚମ୍ପୁଆ ରେଞ୍ଜ ଅନ୍ତର୍ଗତ ଜଜାଙ୍ଗ ପାଚେରି ସାହିରେ ଘଟିଥିବା ଘଟଣା ପରେ ଲୋକେ ଅଧିକ ଆତଙ୍କିତ ହୋଇପଡ଼ିଛନ୍ତି।
ସୂଚନା ଅନୁଯାୟୀ, ବୁଧବାର ଚମ୍ପୁଆ ରେଞ୍ଜ ଅନ୍ତର୍ଗତ ଜଜାଙ୍ଗ ପାଚେରି ସାହିରେ ବଣୁଆ ବାର୍ହା ପଶି ୪ ଜଣଙ୍କୁ ଆକ୍ରମଣକରି ଲହୁଲୁହାଣ କରିଥିଲା। ଗ୍ରାମର ମାନସିଂହ ମୁଣ୍ଡା, ଭଟ୍ଟ ମାଝି, କବିତା ସେଠୀ ଓ ତାଙ୍କ ୪ ବର୍ଷର ଶିଶୁପୁତ୍ର ଗୁରୁତର ହୋଇଥିଲେ। ବନ ବିଭାଗ ପକ୍ଷରୁ ସମସ୍ତଙ୍କୁ ଗୁରୁତର ଅବସ୍ଥାରେ ଟିସ୍କୋ ହସ୍ପିଟାଲରେ ଭର୍ତ୍ତି କରାଯାଇଥିଲା। ୩ ଜଣ ସୁସ୍ଥ ହୋଇ ଘରକୁ ଫେରିଥିବା ବେଳେ ମାନସିଂହଙ୍କ ଚିକିତ୍ସା ଜାରି ରହିଥିବା ବନ ବିଭାଗ ପକ୍ଷରୁ ସୂଚନା ମିଳିଛି। ବନ ବିଭାଗ ଦୀର୍ଘ ସମୟ କସରତ ପରେ ବାର୍ହାକୁ ଟ୍ରାଙ୍କୁଲାଇଜ କରି ଉଦ୍ଧାର କରିଥିଲା। ହେପାଜତରେ ରଖି ଚିକିତ୍ସା ଆରମ୍ଭ କରିଥିବା ବେଳେ ବାର୍ହା ଦେହରେ ପୂର୍ବରୁ ତୀର ଲାଗିଥିବା ବୁଧବାର ଡିଏଫ୍ଓ ଏଚ୍.ଡି. ଧନରାଜ କହିଥିଲେ। ମାତ୍ର ଚିକିତ୍ସା ସମୟରେ ବାର୍ହାଟିର ମୃତ୍ୟୁ ଘଟିବା ପରେ ବିବାଦ ଦେଖାଦେଇଛି। ଅତ୍ୟଧିକ ଟ୍ରାଙ୍କୁଲାଇଜ କାରଣରୁ ବାର୍ହାର ମୃତ୍ୟୁ ହୋଇଥିବା ଅଭିଯୋଗ ହେଉଛି। ମାତ୍ର ବନ ବିଭାଗ ପକ୍ଷରୁ ଅଭିଯୋଗକୁ ଖଣ୍ଡନ କରାଯାଇଛି। ଆକ୍ରମଣରେ ଗ୍ରାମର ୪ଜଣ ଆହତ ହେବା ପରେ ଉତ୍ତ୍ୟକ୍ତ ଲୋକେ ବାର୍ହାକୁ ଗୋଡ଼ାଇ ପିଟିଥିଲେ। ପରେ ବନ ବିଭାଗ କର୍ମଚାରୀ ଟ୍ରାଙ୍କୁଲାଇଜ୍ କରି ତାହାକୁ କାବୁକରିଥିଲେ। ଲୋକଙ୍କ ଅତ୍ୟଧିକ ମାଡ଼ରେ ବାର୍ହାଟି ମୃତ୍ୟୁବରଣ କରିଛି। ବ୍ୟବଚ୍ଛେଦ ରିପୋର୍ଟ ମିଳିବା ପରେ ପ୍ରକୃତ କାରଣ ଜଣାପଡ଼ିବ ବୋଲି ଚମ୍ପୁଆ ରେଞ୍ଜ ଅଧିକାରୀ ଅକ୍ଷୟ ଛତ୍ରିଆ କହିଛନ୍ତି। ତେବେ ଯାହା ହେଉନା କାହିଁକି ବନ ବିଭାଗ ଉକ୍ତ ବାର୍ହାଟିକୁ ସୁରକ୍ଷା ଦେବାରେ ବିଫଳ ହୋଇଛି ବୋଲି ବନ୍ୟପ୍ରାଣୀ ପ୍ରେମୀ ହରେକୃଷ୍ଣ ମହାନ୍ତ କହିଛନ୍ତି। କେନ୍ଦୁଝର ଜିଲାର ତେଲକୋଇ, ପାଟଣା, ଚମ୍ପୁଆ ଆଦି ରେଞ୍ଜରେ ଅବାଧ ବାର୍ହା ଶିକାର ହେଉଛି। ନିକଟ ଅତୀତରେ ତେଲକୋଇ ଅଞ୍ଚଳରେ ଏକ ବାର୍ହାକୁ ମାରି ମାଂସ ବିକ୍ରି କରୁଥିବା ଅଭିଯୋଗରେ ବନ ବିଭାଗ ଜଣେ ବ୍ୟକ୍ତିଙ୍କୁ ଗିରଫ କରିଥିଲା। ବନ୍ୟପ୍ରାଣୀ ଓ ଲୋକଙ୍କ ସୁରକ୍ଷା ପ୍ରତି ବନ ବିଭାଗ ଅଧିକ ସଚେତନ ହେବାକୁ ବନ୍ୟପ୍ରାଣୀ ପ୍ରେମୀ ମହାନ୍ତ କହିଛନ୍ତି।
