ଜଙ୍ଗଲି କନ୍ଦାରୁ ହୋଇପାରିବ ସୁସ୍ବାଦୁ କୁକିଜ,ନମକିନ

କୋରାପୁଟ,୧୦।୧୦(ଅମିତାଭ ବେହେରା) କୋରାପୁଟ ଜିଲାର ଆଦିମ ଅଧିବାସୀମାନେ ବ୍ୟବହାର କରୁଥିବା ଜଙ୍ଗଲି କନ୍ଦାରୁ ଗୁଣାତ୍ମକ ଓ ସୁସ୍ବାଦୁ କୁକିଜ (ବିସ୍କୁଟ) ଓ ନମକିନ ହୋଇପାରିବ। ଏପରି ଗବେଷଣା କରି କହିଛନ୍ତି, କେନ୍ଦ୍ରିୟ ବିଶ୍ୱବିଦ୍ୟାଳୟର ଜୈବ ବିବିଧତା ଓ ପ୍ରାକୃତିକ ସମ୍ପଦର ସଂରକ୍ଷଣ ବିଭାଗର ସହାୟକ ପ୍ରଫେସର ଡ଼ ଦେବବ୍ରତ ପଣ୍ଡା। ସେ ଦୀର୍ଘ ୧୦ ବର୍ଷ ହେବ କୋରାପୁଟ ମାଳଭୂମିର ଆଦିବାସୀମାନେ ବ୍ୟବହାର କରୁଥିବା ବିଭିନ୍ନ କନ୍ଦାକୁ ନେଇ ଗବେଷଣା କରୁଛନ୍ତି। ଆଦିବାସୀମାନେ ପ୍ରାୟ ୮ ପ୍ରକାରର ଜଙ୍ଗଲୀ କନ୍ଦାକୁ ଖାଦ୍ୟ ଓ ଔଷଧ ରୂପରେ ବ୍ୟବହାର କରୁଛନ୍ତି ବୋଲି ଡ଼. ପଣ୍ଡା କହିଛନ୍ତି। ସେଗୁଡିକ ଯଥା କଷା କନ୍ଦା, ପିଟ କନ୍ଦା , ଶିକା କନ୍ଦା , କୁଳିଆ କନ୍ଦା, ଚେରେଙ୍ଗା କନ୍ଦା , ସୋରନ୍ଦା କନ୍ଦା, ତାରଗାଈ କନ୍ଦା, ପିତା କନ୍ଦା। ଏହି ଦୁଇଟି କନ୍ଦା ଯଥା କଷା କନ୍ଦା ଓ ସୋରନ୍ଦା କନ୍ଦାର ସୁସ୍ବାଦୁ ବିସ୍କୁଟ ଓ ନମକିନ ପ୍ରସ୍ତୁତ ହୋଇପାରିବ ଏବଂ ଏହା ଅଧିକ ପୋଷାକଯୁକ୍ତ ଓ ପୁଷ୍ଟିକର ବୋଲି ଡ଼ ପଣ୍ଡା କହିଛନ୍ତି। ଏଥିରେ ଅଧିକ ପରିମାଣରେ ପ୍ରୋଟିନ , ଫାଇବର , ଆଣ୍ଟିଅକ୍ସିଡାଣ୍ଟ ଓ ଭିଟାମିନ ରହିଥିବା ସୂଚନା ଦେଇଛନ୍ତ।
ଏହି ତଥ୍ୟଟି ନିକଟରେ ଫୁଡ ଓ ହ୍ୟୁମାନିଟି ଜର୍ଣ୍ଣାଲରେ ତାଙ୍କର ରିସର୍ଚ୍ଚ ସ୍କଲାର ଡ଼. ବନ୍ଦନା ପ୍ରଧାନ , ମୋନାଲି ନନ୍ଦ , ଅନ୍ତର୍ଯ୍ୟାମୀ ସାହୁ ଓ ଡ଼. ଜୟନ୍ତ ନାୟକଙ୍କ ସହିତ ମିଶି ପ୍ରକାଶ କରିଛନ୍ତି। ଏହି କୁକିଜ ଓ ନମିକିନ ତିଆରି କରିବାରେ ଜୟପୁରର ଜଗନ୍ନାଥ ଚିନାରି ସାହାଯ୍ୟ କରିଥିଲେ। ଏହା ଆଦିବାସୀମାନଙ୍କର କୁପୋଷଣ ରୋକିବା ସହିତ ବିକଳ୍ପ ଖାଦ୍ୟ ଭାବରେ ବ୍ୟବହାର ହୋଇପାରିବ ଓ ଏହାର ଅଧିକ ପ୍ରଚାର ଓ ପ୍ରସାର ବ୍ୟବହାର ଉପରେ ଧ୍ୟାନ ଦେବାକୁ ପଡିବ। କୋରାପୁଟର କଫି , କଳାଜିରା ଧାନ , ମାଣ୍ଡିଆ ଭଳି ଏହି ଜଙ୍ଗଲି କନ୍ଦାର ବିସ୍କୁଟ ଓ ନମକିନକୁ ଷ୍ଟାର୍ଟଅପ ମାଧ୍ୟମରେ ପ୍ରଚାର ପ୍ରସାର କରାଗଲେ ଏହା କୋରାପୁଟକୁ ଏକ ସ୍ବତନ୍ତ୍ର ପରିଚୟ ସୃଷ୍ଟିକରିବା ସହିତ ଆଦିବାସୀମାନଙ୍କ ଜୀବନ ଜୀବିକାକୁ ସମୃଦ୍ଧ କରିବ ବୋଲି ଡ. ପଣ୍ଡା ସୂଚନା ଦେଇଛନ୍ତି।