ସମ୍ବଲପୁର,୨୪ା୮(ବ୍ୟୁରୋ): ବନ୍ୟପ୍ରାଣୀ ପ୍ରେମୀ ଭାବେ ବିଭିନ୍ନ ସୋସିଆଲ ମିଡିଆରେ ଜଣାଶୁଣା ଅନେକ ବ୍ୟକ୍ତି ଭିତିରିଆ ଭାବେ ପ୍ରାଣୀ ଚୋରା ଚାଲାଣ ବ୍ୟବସାୟରେ ଲିପ୍ତ ରହୁଛନ୍ତି। ଏଭଳି ଜଣେ ୟୁଟ୍ୟୁବ୍ ବ୍ଳଗର୍ ସମ୍ବଲପୁର ଜିଲା ଧମା ଥାନା ପାଞ୍ଚଫୁଟ ଗ୍ରାମର ରାମଚନ୍ଦ୍ର ରଣାଙ୍କୁ ବନବିଭାଗ ପକ୍ଷରୁ ଗିରଫ କରାଯାଇଛି। ତାଙ୍କଠାରୁ ୬ ସାପ ଓ ୪ ରଙ୍ଗିନ୍ ଏଣ୍ଡୁଅକୁ ଜବତ କରାଯାଇଛି। ୟୁଟ୍ୟୁବରେ ସେ ନିଜକୁ ପ୍ରଚାର ପ୍ରସାର କରିବା ପାଇଁ ସାପ, ରଙ୍ଗିନ ଏଣ୍ଡୁଅ ଭଳି ବନ୍ୟପ୍ରାଣୀଙ୍କ ସହିତ ଭିଡିଓ ଅପ୍ଲୋଡ୍ କରିଥିଲେ। ସମ୍ବଲପୁର ବନଖଣ୍ଡ ସଦର ରେଞ୍ଜ ଏବଂ ଧମା ରେଞ୍ଜର ଅଧିକାରୀ ଓ କର୍ମଚାରୀ ରାମଚନ୍ଦ୍ରଙ୍କୁ ଗିରଫ କରିଥିବା ନେଇ ସଦର ରେଞ୍ଜର ମନୁ ଅଶୋକ ଭଟ୍ଟ ମଙ୍ଗଳବାର ଅନୁଷ୍ଠିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ସଦର ରେଞ୍ଜର ଭଟ୍ଟ କହିଛନ୍ତି, ରାମଚନ୍ଦ୍ର ନିଜ ନାମରେ ବହୁ ଦିନରୁ ଏକ ୟୁଟ୍ୟୁବ ଚ୍ୟାନେଲ ଖୋଲିଛନ୍ତି। ଜଙ୍ଗଲ ପରିବେଶ ଓ ବିଭିନ୍ନ ବନ୍ୟପ୍ରାଣୀଙ୍କୁ ନେଇ ଭିଡିଓ କରି ସେଥିରେ ଅପ୍ଲୋଡ୍ କରୁଛନ୍ତି। ଏ ନେଇ ବନବିଭାଗକୁ ସୂଚନା ମିଳିଥିଲା। ପରେ ବନ ବିଭାଗ ଏକ ଟିମ୍ ତଦନ୍ତ ଆରମ୍ଭ କରି ରାମଚନ୍ଦ୍ରଙ୍କୁ ଗିରଫ କରିଥିଲା। ବନବିଭାଗ ଆଇନ ଅନୁଯାୟୀ ତାଙ୍କୁ କୋର୍ଟ ଚାଲାଣ କରାଯିବ। ତାଙ୍କ ପାଖରୁ ଜବତ ୬ଟି ସାପ ମଧ୍ୟରୁ ୩ଟି କୋବ୍ରା ଅଛନ୍ତି। ଏହି ବିଷଧର ସାପଠାରୁ ବିଷ ବାହାର କରି ବିକ୍ରି କରୁଥିବା ଅଭିଯୋଗ ହୋଇଥିଲା। ଏହାକୁ ନେଇ ମଧ୍ୟ ବନବିଭାଗ ତଦନ୍ତ ଜାରି ରଖିଛି। ଅଭିଯୁକ୍ତ ରାମଚନ୍ଦ୍ରଙ୍କଠାରୁ ଉଦ୍ଧାର ହୋଇଥିବା ବନ୍ୟପ୍ରାଣୀଙ୍କୁ ଜଙ୍ଗଲରେ ଛାଡ଼ିଦିଆଯିବ ବୋଲି ରେଞ୍ଜର ଭଟ୍ଟ କହିଥିଲେ।
