ବାରିପଦା ଅଫିସ,୪ା୧୦: ମୟୂରଭଞ୍ଜ ଜିଲା ବାରିପଦା ବନାଞ୍ଚଳ ଯଦୁନାଥପୁର ଉଚ୍ଚ ଇଂରାଜୀ ବିଦ୍ୟାଳୟ ପରିସରରେ ବନପ୍ରାଣୀ ସପ୍ତାହ ପାଳନ କରାଯାଇଛି। ସଂଗ୍ରାମ ସ୍ବେଚ୍ଛାସେବୀ ସଙ୍ଗଠନ ଓ ବନଖଣ୍ଡ ବିଭାଗର ମିଳିତ ଆନୁକୂଲ୍ୟରେ ଅନୁଷ୍ଠିତ କାର୍ଯ୍ୟକ୍ରମରେ ସଙ୍ଗଠନର ସଭାପତି ସଂଯୁକ୍ତା ବସା ଅଧ୍ୟକ୍ଷତା କରିଥିଲେ। ବାରିପଦା ବନାଞ୍ଚଳ ଅଧିକାରୀ ଲକ୍ଷ୍ମୀଧର ବେହେରା ଯୋଗଦେଇ ବନ୍ୟଜନ୍ତୁଙ୍କ ସୁରକ୍ଷା ଦିଗରେ ଲୋକଙ୍କ ଭୂମିକା ଓ ସହଯୋଗ ଉପରେ ଗୁରୁତ୍ୱାରୋପ କରିଥିଲେ। ଜଙ୍ଗଲ ଛାଡ଼ି ଗାଁ, ସହର ମୁହାଁ ହେଉଥିବା ହାତୀ ଓ ବନ୍ୟଜନ୍ତୁମାନେ ବୁଲୁଥିବା ସମୟରେ ଘଟୁଥିବା ଘଟଣା ପାଇଁ ମଣିଷ ଦାୟୀ ବୋଲି ସେ କହିଥିଲେ। କେବଳ ଦିବସ ପାଳନ ଭିତରେ ନିଜକୁ ସୀମିତ ନ ରଖି ସୁସ୍ଥ ସମାଜ ନିମନ୍ତେ ବନ୍ୟପ୍ରାଣୀଙ୍କ ସୁରକ୍ଷା ନିତ୍ୟାନ୍ତ ଜରୁରୀ ବୋଲି ସଙ୍ଗଠନ ସମ୍ପାଦକ ତଥା ପ୍ରାକ୍ତନ ଅବୈତନିକ ବନ୍ୟପ୍ରାଣୀ ସଂରକ୍ଷକ ଭାନୁମିତ୍ର ଆଚାର୍ଯ୍ୟ ପ୍ରକାଶ କରିଥିଲେ। ଜଙ୍ଗଲ ସୁରକ୍ଷିତ ରହିଲେ ବନ୍ୟଜନ୍ତୁ ସୁରକ୍ଷିତ ରହିବେ ବୋଲି କହିବା ସହ ଜଙ୍ଗଲ ବଞ୍ଚାଇବାକୁ ପୂର୍ବତନ ସରପଞ୍ଚ ବିଶ୍ୱଜିତ ସିଂ ନିବେଦନ କରିଛନ୍ତି। ବନପ୍ରାଣୀ ସୁରକ୍ଷା ମାନବ ସମାଜ ପାଇଁ ଶୁଭଙ୍କର ବୋଲି ଜନସଚେତନା ସୃଷ୍ଟି କରିବାକୁ ବସା ମତପ୍ରକାଶ କରିଛନ୍ତି। କାର୍ଯ୍ୟକ୍ରମରେ ଗ୍ରାମର ସ୍ବୟଂସହାୟକ ଗୋଷ୍ଠୀର ମହିଳା, ଜଙ୍ଗଲ କମିଟିର କାର୍ଯ୍ୟକର୍ତ୍ତା, ଯୁବଗୋଷ୍ଠୀ ଓ ବନ ବିଭାଗର କର୍ମକର୍ତ୍ତା ସାମିଲ ହୋଇଥିଲେ।