ବାରିପଦା ଅଫିସ,୧୦ା୩: ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟରେ ଏବେ ବି ନିଅଁା ହୁତୁ ହୁତୁ ହୋଇ ଜଳୁଛି। ଅଗ୍ନି ନିର୍ବାପନ ପାଇଁ ରାଜ୍ୟ ସରକାରଙ୍କ ପକ୍ଷରୁ ୫୦ଜଣିଆ ଓଡ୍ରାଫ ଟିମ୍ ପହଞ୍ଚିଛନ୍ତି। ସେମାନେ ୪ଟି ଟିମ୍ରେ ବିଭକ୍ତ ହୋଇ ଚହଲା, ପିଠାବଟା, ଯଶିପୁର ଓ କରଞ୍ଜିଆ ରେଞ୍ଜରେ ନିଆଁ ଲିଭାଇବା କାର୍ଯ୍ୟ ଜାରି ରଖିଛନ୍ତି। ଅଭୟାରଣ୍ୟର କରଞ୍ଜିଆ ଡିଭିଜନର ଦୁଧିଆଳି ଜଙ୍ଗଲରେ ନିଆଁ ଲଗାଉଥିବା ୨ଯୁବକଙ୍କୁ ବନଖଣ୍ଡ କର୍ମଚାରୀମାନେ କାବୁ କରିବାରେ ସକ୍ଷମ ହୋଇଛନ୍ତି। ଉକ୍ତ ଯୁବକଦ୍ୱୟ ହେଲେ କରଞ୍ଜିଆ ଥାନା ଖଡିକୁଦ ଗ୍ରାମର ସାଲୁ ତିଉ(୨୫) ଓ ଦୁଧିଆଳୀ ଗ୍ରାମର ପ୍ରତାପ ହେମ୍ବ୍ରମ(୩୦)। ସାଲୁଙ୍କଠାରୁ ୪୧୫ଫୁଟର ୨୨ଟି ଫାଶ ଜବତ କରାଯାଇଛି। ଠେକୁଆ ଶିକାର ପାଇଁ ଏହାକୁ ବ୍ୟବହାର କରାଯାଉଥିବା ଗିରଫ ଯୁବକଦ୍ୱୟ ପ୍ରକାଶ କରିଛନ୍ତି। ଅନ୍ୟପକ୍ଷେ ଅଗ୍ନିକାଣ୍ଡ ଯୋଗୁ ଅଭୟାରଣ୍ୟର ଜୀବଜନ୍ତୁ ଅସୁରକ୍ଷିତ ହୋଇପଡିଛନ୍ତି। ଗ୍ରୀଷ୍ମର ତାପମାତ୍ରା ବୃଦ୍ଧି ସାଙ୍ଗକୁ ନିଆଁର ପ୍ରକୋପ ବନ୍ୟଜନ୍ତୁକୁ ଅସ୍ତବ୍ୟସ୍ତ କରିପକାଇଛି। ଫଳରେ କୋର୍ ଅଞ୍ଚଳରୁ ବନ୍ୟଜନ୍ତୁମାନେ ଗ୍ରାମ ଓ ସହରାଭିମୁଖୀ ହେଉଛନ୍ତି। ନିଆଁର ସ୍ଥିତି ପରଖିବା ପାଇଁ ମୟୂରଭଞ୍ଜ ଜିଲାପାଳ ବିନୀତ ଭରଦ୍ୱାଜ, ଏସ୍ପି ସ୍ମିଥ୍ ପି. ପରମାର ଓ ବାରିପଦା ବନଖଣ୍ଡ ଅଧିକାରୀ ସନ୍ତୋଷ ଯୋଶୀ ବିଭିନ୍ନ ଅଞ୍ଚଳ ପରିଦର୍ଶନ କରିଛନ୍ତି।
ସୋମବାର ବିଳମ୍ବିତ ରାତିରେ କରଞ୍ଜିଆ ଡିଭିଜନର ଦୁଧିଆଣି ରେଞ୍ଜ ଭଞ୍ଜକିଆସ୍ଥିତ ଝରାଫୁଲ ଗ୍ରାମର ବିଜୁ ମହାରଣାଙ୍କ ଘରେ ଏକ ୪/୫ବର୍ଷର ହରିଣ ପଶିଯାଇଥିଲା। ବନବିଭାଗର କର୍ମଚାରୀମାନେ ପହଞ୍ଚି ହରିଣକୁ ଉଦ୍ଧାର କରି ରେଞ୍ଜ କାର୍ଯ୍ୟାଳୟକୁ ନେଇ ଚିକିତ୍ସା ଜାରି ରଖିଛନ୍ତି। ବାଙ୍ଗରିପୋଷି, ଚହଲା, ଉଷକି, ବରେହିପାଣି, କବାଟଘାଇ, ଦୁଧିଆଣି, ପାଟବିଲ୍, ଦେବସ୍ଥଳ, କାଣ୍ଡଭେନୁ, ସାରୁଆ, ନଅଁଣା ସାଉଥ୍ ଓ ନରଥ୍ ଆଦି ରେଞ୍ଜ ଅଞ୍ଚଳରେ ଏବେ ବି ନିଆଁ ଜଳୁଛି। ତେବେ ଆବଶ୍ୟକତାଠାରୁ ବହୁ କମ୍ କର୍ମଚାରୀ ନିଆଁ ଲିଭାଇବା କାର୍ଯ୍ୟରେ ନିୟୋଜିତ ଥିବାରୁ ନିଆଁକୁ ଆୟତ୍ତ କରିବାରେ ବିଳମ୍ବ ଘଟୁଛି ବୋଲି ପରିବେଶବିତ୍ ଭାନୁମିତ୍ର ଆଚାର୍ଯ୍ୟ କହିଛନ୍ତି। ସରକାରୀ ସ୍ତରରେ କୋର ଅଞ୍ଚଳରେ ବନ୍ୟଜନ୍ତୁ ପ୍ରଭାବିତ ହୋଇ ନ ଥିବା ବିଭାଗ ପକ୍ଷରୁ ରିପୋର୍ଟ ପ୍ରଦାନ କରାଯାଉଥିବା ବେଳେ ପ୍ରକୃତ ସ୍ଥିତି ଭିନ୍ନ ରହିଛି। ଚାରିପଟ ନିଆଁ ଆବଦ୍ଧ କରି ରଖିଥିବା ବେଳେ ଅଭୟାରଣ୍ୟର କୋର ଅଞ୍ଚଳର ୩ଟି, ବୋଫର ଅଞ୍ଚଳର ୬୧ଟି ଓ ପାଦଦେଶରେ ଥିବା ୧୨ଶହ ଗ୍ରାମର ଲୋକେ ପ୍ରଭାବିତ ହୋଇଛନ୍ତି। ଫଳରେ ଜଙ୍ଗଲ ଉପରେ ନିର୍ଭର କରୁଥିବା ହଜାର ହଜାର ବନବାସୀ ଜୀବିକା ହରାଇ ବସିଛନ୍ତି। ଏହି ଗ୍ରାମଗୁଡିକ ମଧ୍ୟରେ ବଡଗାଁ ସେକ୍ସନର ମଶିଣାବିଲା ଜଙ୍ଗଲରେ ଲାଗିଥିବା ନିଆଁର ସ୍ଥିତି ଅନୁଧ୍ୟାନ ଲାଗି ମୟୂରଭଞ୍ଜ ଜିଲାପାଳ ଭରଦ୍ୱାଜ, ଏସ୍ପି ପରମାର ଓ ବାରିପଦା ବନଖଣ୍ଡ ଅଧିକାରୀ ଯୋଶୀ ବିଭିନ୍ନ ଅଞ୍ଚଳ ପରିଦର୍ଶନ କରିଛନ୍ତି। ବିଭିନ୍ନ ସଙ୍ଗଠନ ନିଆଁ ଲିଭାଇବା କାର୍ଯ୍ୟରେ ସାମିଲ ହୋଇଥିବା ଜଣାପଡିଛି। ତେବେ ନିଆଁକୁ ଆୟତ୍ତ କରାଯିବା ସହ ଭବିଷ୍ୟତରେ ଏଭଳି ଘଟଣାର ପୁନରାବୃତ୍ତି ନ ହେବା ପାଇଁ ସରକାରଙ୍କ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଉ ବୋଲି ପରିବେଶବିତ୍ ସଂଯୁକ୍ତା ବଶା ଓ ଅଜିତ ଜେନା ପ୍ରମୁଖ ଦାବି କରିଛନ୍ତି।