ନୂଆଦିଲ୍ଲୀ,୧୬ା୧(ପି.ଟି.): ଭାରତରେ ଶନିବାରଠାରୁ କରୋନା ଟିକାକରଣ ଆରମ୍ଭ ହେଉଥିବାବେଳେ ଏଥିଲାଗି ପୂର୍ଣ୍ଣ ସହଯୋଗ ଦେବାକୁ ଶୁକ୍ରବାର ନିର୍ବାଚନ କମିଶନ (ଇସି) ରାଜି ହୋଇଛନ୍ତି। ପୋଲିଂ ଷ୍ଟେଶନ ସ୍ତରରେ ହିତାଧିକାରୀମାନଙ୍କୁ ଚିହ୍ନଟ କରି କୋଭିଡ୍-୧୯ ଭାକ୍ସିନ ଅଭିଯାନ ଚଳାଇବା ପାଇଁ କେନ୍ଦ୍ର ସରକାର ଇସିଙ୍କୁ ଅନୁରୋଧ କରିଥିଲେ। ଇସି ସରକାରଙ୍କୁ ନିର୍ବାଚନ ତଥ୍ୟ ପ୍ରଦାନ ଲାଗି ରାଜି ହୋଇଛନ୍ତି। କିନ୍ତୁ ଟିକାକରଣ ଅଭିଯାନ ଶେଷ ହେବା ପରେ ବ୍ୟବହୃତ ଡାଟା ଡିଲିଟ୍ କରିବାକୁ ପଡ଼ିବ ବୋଲି ସର୍ତ୍ତ ବାଢ଼ିଛନ୍ତି।
ଗତ ଡିସେମ୍ବର ୩୧ରେ ସ୍ବାସ୍ଥ୍ୟ ସଚିବ ଅଜୟ ଭାଲା ମୁଖ୍ୟ ନିର୍ବାଚନ କମିଶନର (ସିଇସି) ସୁନୀଲ ଆରୋରାଙ୍କୁ ଏକ ପତ୍ର ଲେଖିଥିଲେ। ମତଦାନ କେନ୍ଦ୍ର ସ୍ତରରେ ୫୦ରୁ ଊର୍ଦ୍ଧ୍ୱ ବୟସ୍କ ବ୍ୟକ୍ତିମାନଙ୍କୁ ଚିହ୍ନଟ କରିବା ଲାଗି ନିର୍ବାଚନୀ ତଥ୍ୟ ବ୍ୟବହାର ପାଇଁ ସେ ଏଥିରେ ସହଯୋଗ ଲୋଡ଼ିଥିଲେ। ଉକ୍ତ ଡାଟା କେବଳ ଟିକାକରଣ ପାଇଁ ବ୍ୟବହାର କରାଯିବ ଓ ତାହା ସମ୍ପୂର୍ଣ୍ଣ ଭାବେ ସୁରକ୍ଷିତ ରହିବ ବୋଲି ସ୍ବାସ୍ଥ୍ୟ ସଚିବ ସିଇସିଙ୍କୁ ପ୍ରତିଶ୍ରୁତି ଦେଇଥିଲେ। ସେହିପରି ସ୍ବାସ୍ଥ୍ୟ ମନ୍ତ୍ରଣାଳୟ ଓ ନୀତି ଆୟୋଗର ଅଧିକାରୀମାନେ ମଧ୍ୟ ଗତମାସରେ ନିର୍ବାଚନ କମିଶନଙ୍କ ବରିଷ୍ଠ ଅଧିକାରୀମାନଙ୍କୁ ଭେଟି ବୁଥ୍ ସ୍ତରରେ ଇସିଙ୍କ ନେଟ୍ଓ୍ବର୍କ ବ୍ୟବହାର ପାଇଁ ସହଯୋଗ ଲୋଡ଼ିଥିଲେ। ଇସି ବିସ୍ତୃତ ଭାବେ ଅନୁଧ୍ୟାନ କରିବା ପରେ ତଥ୍ୟ ବ୍ୟବହାର ପାଇଁ ଅନୁମତି ପ୍ରଦାନ ସକାଶେ ଜାନୁୟାରୀ ୪ରେ ସ୍ବାସ୍ଥ୍ୟ ମନ୍ତ୍ରଣାଳୟକୁ ଚିଠି ଲେଖିଛନ୍ତି। ସ୍ବାସ୍ଥ୍ୟ ଅଧିକାରୀମାନେ ଟିକାକରଣ ପ୍ରକ୍ରିୟା ଶେଷ ହେବା ପରେ ଏହି ତଥ୍ୟକୁ ଡିଲିଟ୍ କରିଦେବା ଆବଶ୍ୟକ ବୋଲି ଇସି କହିଛନ୍ତି।
ସୂଚନାନୁଯାୟୀ, ନିର୍ବାଚନ କମିଶନଙ୍କ କେତେଜଣ ବରିଷ୍ଠ ଅଧିକାରୀ ସ୍ବାସ୍ଥ୍ୟ ମନ୍ତ୍ରଣାଳୟର ନୋଡାଲ ଅଫିସରମାନଙ୍କ ସହ ଯୋଗସୂତ୍ରରେ ରହିବେ। କୋଭିଡ୍-୧୯ ଭାକ୍ସିନେଶନ ଡ୍ରାଇଭ୍ ଅନୁସାରେ ସଦ୍ୟତମ ଲୋକ ସଭା ଓ ବିଧାନସଭା ନିର୍ବାଚନର ଭୋଟର ତାଲିକା ସ୍ବାସ୍ଥ୍ୟ ମନ୍ତ୍ରଣାଳୟକୁ ପ୍ରଦାନ କରାଯିବ। ମନ୍ତ୍ରଣାଳୟ ଏହି ପ୍ରସଙ୍ଗରେ ଦୈନନ୍ଦିନ ସମସ୍ୟାର ସମାଧାନ ପାଇଁ ଉଦ୍ୟମ କରିବ। ହିତାଧିକାରୀଙ୍କୁ ଚିହ୍ନଟ ପାଇଁ ଭୋଟର ଆଇଡି, ଆଧାର କାର୍ଡ, ଡ୍ରାଇଭିଂ ଲାଇସେନ୍ସ, ପାସ୍ପୋର୍ଟ, ପେନ୍ସନ ଦସ୍ତାବିଜ ଭଳି ୧୨ ପରିଚୟପତ୍ର ମଧ୍ୟରୁ ଗୋଟିଏକୁ ଗ୍ରହଣ କରାଯିବ। ପ୍ରଥମ ପର୍ଯ୍ୟାୟରେ ୧ କୋଟି ସ୍ବାସ୍ଥ୍ୟ କର୍ମୀ ଓ ୨ କୋଟି ଆଗଧାଡ଼ିର କରୋନା ଯୋଦ୍ଧାଙ୍କୁ ଟିକା ଦିଆଯିବାକୁ ଥିବାବେଳେ ପରବର୍ତ୍ତୀ ସମୟରେ ୫୦ ବର୍ଷରୁ ଊର୍ଦ୍ଧ୍ୱ ବୟସ୍କ ବ୍ୟକ୍ତିଙ୍କୁ ନେଇ ଟିକାକରଣ କରାଯିବ ବୋଲି ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇଛି।