ଜୟପୁର,୧୨।୧୨: ରାଜସ୍ଥାନର ନୂତନ ମୁଖ୍ୟମନ୍ତ୍ରୀ କିଏ ହେବେ ତାହା ଆଜି ସନ୍ଧ୍ୟା ସୁଦ୍ଧା ସ୍ପଷ୍ଟ ହୋଇଯିବ। ମଧ୍ୟପ୍ରଦେଶ-ଛତିଶଗଡ ପରି ଭାଜପା ମଧ୍ୟ ଏଠାରେ ଏକ ଆଶ୍ଚର୍ଯ୍ୟଜନକ ନାମ ଘୋଷଣା କରିପାରିବ। ଏଥି ସହିତ ବସୁନ୍ଧରା ରାଜେ ମୁଖ୍ୟମନ୍ତ୍ରୀ ହେବାର ସମ୍ଭାବନା ପ୍ରାୟ ଶେଷ ହୋଇଯାଇଛି।
ମଧ୍ୟପ୍ରଦେଶ ଏବଂ ଛତିଶଗଡରେ ଭାଜପା ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରିଛି।ମଧ୍ୟପ୍ରଦେଶରେ ଓବିସି ସମ୍ପ୍ରଦାୟରୁ ଆସିଥିବା ମୋହନ ଯାଦବଙ୍କୁ ମୁଖ୍ୟମନ୍ତ୍ରୀ କରିଥିବାବେଳେ ଛତିଶଗଡରେ ଆଦିବାସୀ ସମ୍ପ୍ରଦାୟର ବିଷ୍ଣୁଦେଓ ସାଏଙ୍କୁ ମୁଖ୍ୟମନ୍ତ୍ରୀ କରାଯାଇଛି। ଏଭଳି ପରିସ୍ଥିତିରେ ବର୍ତ୍ତମାନ ରାଜସ୍ଥାନର ସାଧାରଣ ବର୍ଗରୁ ମୁଖ୍ୟମନ୍ତ୍ରୀ ହେବାର ସମ୍ଭାବନା ରହିଛି।
ମୁଖ୍ୟମନ୍ତ୍ରୀ ନିଷ୍ପତ୍ତି ସମ୍ପର୍କରେ ମଙ୍ଗଳବାର ଜୟପୁର ଭାଜପା କାର୍ଯ୍ୟାଳୟରେ ବିଧାନସଭା ପାର୍ଟିର ଏକ ବୈଠକ ହେବ। ଏ ସମ୍ପର୍କରେ ଦଳ ଦ୍ୱାରା ନିଯୁକ୍ତ ପର୍ଯ୍ୟବେକ୍ଷକ ରାଜନାଥ ସିଂ, ସରୋଜ ପାଣ୍ଡେ ଏବଂ ବିନୋଦ ତାୱଡେ ଜୟପୁର ଆସିବେ। ଏହି ବୈଠକ ଅପରାହ୍ନ ୪ଟାରୁ ଆରମ୍ଭ ହେବ, ଏହା ପରେ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରାଯିବ।