ଭୁବନେଶ୍ୱର, ୧୧ା୧୦ (ବ୍ୟୁରୋ): ଭକ୍ତଙ୍କ ପାଇଁ ଧରାବତରଣ କରିବେ ଦେବୀ ଦଶଭୁଜା। ଏଥିପାଇଁ ମଣ୍ଡପଗୁଡ଼ିକରେ ମା’ଙ୍କ ମୃଣ୍ମୟୀ ମୂର୍ତ୍ତିିରେ କାରିଗର ଶେଷ ସ୍ପର୍ଶ ଦେଇଥିବାବେଳେ ମହିଷମର୍ଦ୍ଦିନୀଙ୍କ ଆଗମନକୁ ଅପେକ୍ଷା କରିଛନ୍ତି ଶ୍ରଦ୍ଧାଳୁ। ଏବେ ଷୋଡ଼ଶ ଦିନାତ୍ମକ ପୂଜା ବିଧି ସହ ନବରାତ୍ରିର ନବବେଶରେ ଦର୍ଶନ ଦେଉଛନ୍ତି ମା’। ସୋମବାର ବିଭିନ୍ନ ପୂଜା ମଣ୍ଡପରେ ଷଷ୍ଠୀ ପୂଜାରୁ ମା’ଙ୍କ ଆବାହନ ଆରମ୍ଭ ହେବ। ସେହିପରି ଶକ୍ତିପୀଠଗୁଡିକରେ ମହାସପ୍ତମୀ ପୂଜା କରାଯିବ। ମଣ୍ଡପଗୁଡ଼ିକରେ ବିଲ୍ବବରଣ ସହ ବିଭିନ୍ନ ପ୍ରସିଦ୍ଧ ଦେବୀ ପୀଠରୁ ଆଜ୍ଞାମାଳା ଆସିବା ପରେ ସପ୍ତମୀରେ ମା’ଙ୍କ ଚକ୍ଷୁଦାନ କରାଯିବ।
ତେବେ ଗତବର୍ଷ ଭଳି ଏବର୍ଷ ମଧ୍ୟ କରୋନା ପାଇଁ ଦୁର୍ଗାପୂଜା ନିରାଡମ୍ବରରେ ପାଳନ ହେବ। କଟକଣା ମଧ୍ୟରେ କିପରି ସମସ୍ତ ବିଧି ସମ୍ପନ୍ନ କରାଯିବ ସେ ନେଇ ଆୟୋଜକମାନେ ସମସ୍ତ ବନ୍ଦୋବସ୍ତ ଶେଷ କରିଛନ୍ତି। ବିଭିନ୍ନ ପୂଜାମଣ୍ଡପରେ ମା’ ମହିଷମର୍ଦ୍ଦିନୀଙ୍କ ସହ ଅଗ୍ରପୂଜ୍ୟ ଶ୍ରୀ ଗଣେଶ, ଧନଦାତ୍ରୀ ମହାଲକ୍ଷ୍ମୀ, ବିଦ୍ୟାଦାତ୍ରୀ ମା’ ସରସ୍ବତୀଙ୍କ ସହ ପ୍ରଭୁ କାର୍ତ୍ତିିକେୟ ପୂଜା ପାଇବେ। ସେହିପରି ଆଉ କେତେକ ପୂଜା ମଣ୍ଡପରେ ଷଷ୍ଠୀରୁ ବିଜୟା ଦଶମୀ ପର୍ଯ୍ୟନ୍ତ ହରପାର୍ବତୀ ପୂଜା ପାଇବାକୁ ଥିବାବେଳେ ଅନ୍ୟ କେତେକ ମଣ୍ଡପରେ ମହାବୀର ହନୁମାନଙ୍କୁ ପୂଜା କରାଯିବାର ବିଧିବିଧାନ ରହିଛି। ପ୍ରଶାସନର କଟକଣା ମୁତାବକ ମା’ଙ୍କ ମୂର୍ତ୍ତିିର ଉଚ୍ଚତା ୪ ଫୁଟରେ ସୀମିତ ରହିଛି। ସେହିପରି ରାବଣ ପୋଡ଼ି କରାଯାଉଥିବା ମଣ୍ଡପରେ ଏଥର ରାବଣ ଦହନ ସମ୍ପୂର୍ଣ୍ଣ ବନ୍ଦ କରାଯାଇଥିବାବେଳେ କେତେକ ସ୍ଥାନରେ କେବଳ ପତୀକାତ୍ମକ ଭାବେ ରାବଣର ଫଟୋରେ ଅଗ୍ନିସଂଯୋଗ ପୂର୍ବକ ପରମ୍ପରା ରକ୍ଷା କରାଯିବ। ମା’ଙ୍କ ଦର୍ଶନ ପାଇଁ ବିଭିନ୍ନ ପୂଜାମଣ୍ଡପରୁ ସିଧା ପ୍ରସାରଣ ସହ ପୁଷ୍ପାଞ୍ଜଳିର ବନ୍ଦୋବସ୍ତ କରାଯାଇଛି।