ବେଙ୍ଗାଲୁରୁ,୨୪।୪: କର୍ନାଟକ ବିଧାନ ସଭା ନିର୍ବାଚନ ପାଇଁ ସବୁ ରାଜନୈତିକ ଦଳ ପ୍ରସ୍ତୁତି ଆରମ୍ଭ କରିସାରିଛନ୍ତି। ତେବେ କଂଗ୍ରେସ ପୁଣି ରାଜ୍ୟରେ ଶାସନକୁ ଫେରିବା ପାଇଁ ଜୋରଦାର ପ୍ରସ୍ତୁତି ଜାରି ରଖିଛି। କଂଗ୍ରେସ ନେତା ରାହୁଲ ଗାନ୍ଧୀ ଦୁଇଦିନିଆ କର୍ନାଟକ ଗସ୍ତରେ ଯାଇଛନ୍ତି। ରାଜ୍ୟ ସରକାର ଚାଷୀଙ୍କ ଦୁଖ ବୁଝୁନାହାନ୍ତି ବୋଲି ସେ ସରକାରଙ୍କ ଉପରେ ବର୍ଷିଛନ୍ତି। ସରକାର କେବଳ ଗୋଟିଏ କି ଦୁଇଟି ଶିଳ୍ପପତିଙ୍କ ଉପରେ ଧ୍ୟାନ ଦେଉଛନ୍ତି ଏବଂ କୃଷକଙ୍କୁ ହତାଦାର କରୁଛନ୍ତି। ସେଥିଲାଗି କୃଷକଙ୍କ ଲାଭ ପାଇଁ ପରିବର୍ତ୍ତନର ଆବଶ୍ୟକତା ଅଛି ବୋଲି ରାହୁଲ ଗାନ୍ଧୀ କହିଛନ୍ତି।
ବର୍ତ୍ତମାନ ଆଦାନୀ, ଅମ୍ବାନୀ ବ୍ୟାଙ୍କକୁ ଗଲେ ହଜାର ହଜାର କୋଟି ଟଙ୍କାର ଋଣ ଅତି ସହଜରେ ପାଇ ପାରୁଛନ୍ତି। ତାଙ୍କ ପାଇଁ ଋଣ ଛାଡ କରାଯାଉଛି କିନ୍ତୁ କୃଷକଙ୍କ ପାଇଁ ନୁହେଁ। ତେଣୁ ଏଠାରେ ସମାନତା ରହିବା ଆବଶ୍ୟକ ବୋଲି ମୁଁ କହୁଛି। ଯଦି ବଡ ବଡ ଶିଳ୍ପପତିମାନଙ୍କ ଋଣ ଛାଡ କରାଯାଉଛି ତେବେ କୃଷକଙ୍କର ମଧ୍ୟ ଋଣ ଛାଡ କରାଯାଉ ବୋଲି ସେ କହିଛନ୍ତି।
ସୋମବାର ବେନଲାଗବିର ରାମଦୁର୍ଗରେ ରାହୁଲ ଆଖୁଚାଷୀଙ୍କୁ ସମ୍ବୋଧିତ କରି କହିଛନ୍ତି, ଯଦି କଂଗ୍ରେସ ରାଜ୍ୟରେ କ୍ଷମତାକୁ ଆସେ ତେବେ ସେ କେବଳ କୃଷକଙ୍କ ପାଇଁ କାମ କରିବ। ଏହା ସତ ଯେ କୃଷକଙ୍କୁ ଉଚିତ୍ ସର୍ବନିମ୍ନ ସହାୟକ ମୂଲ୍ୟ ମିଳୁନାହିଁ। ଗ୍ୟାସ ସିଲିଣ୍ଡର ମୂଲ୍ୟ ଲଗାତାର ବଢିବାରେ ଲାଗିଛି। କୃଷକଙ୍କ ପକେଟ୍ରୁ ପଇସା ଖାଲି ହେଉଛି। ତେଣୁ କୃଷକଙ୍କୁ ଠିକ୍ ମୂଲ୍ୟ ଦେବା ସହ ମାର୍କେଟିଂକୁ ବଢାଇବାର ଆବଶ୍ୟକତା ରହିଛି।
ସେ ଆହୁରି କହିଛନ୍ତି, କେନ୍ଦ୍ର ସରକାର ଯେଉଁ ଜିଏସଟି ନୀତି ଆଣିଛନ୍ତିି, ଏହା କେବଳ କିଛି ଜଣଙ୍କ ପାଇଁ ହୋଇଛି। ଏହା କିଛି ପ୍ରଭାବଶାଳୀ ନେତାଙ୍କୁ ସାହାଯ୍ୟ କରିବ ବୋଲି ଅଣାଯାଇଛି। ଏହା ଏତେ ଜଟିଳ ଯେ ସାଧାରଣ ଲୋକ ଏହାକୁ ବୁଝି ପାରୁ ନାହାନ୍ତି। ଏହାଯୋଗୁ କ୍ଷୁଦ୍ର ବ୍ୟବସାୟ ବନ୍ଦ ହୋଇ ଯାଇଛି। ଯଦି ଆମେ କେନ୍ଦ୍ରରେ କ୍ଷମତାକୁ ଆସୁ ତେବେ ଏହି ଜିଏସଟି ନୀତିକୁ ପରିବର୍ତ୍ତନ କରିଦେବୁ। ସମସ୍ତଙ୍କ ପାଇଁ କେବଳ ଗୋଟିଏ ଟ୍ୟାକ୍ସ ଏବଂ ଏହା ସର୍ବନିମ୍ନ ରହିବ।
ରାହୁଲ ମୋଦୀଙ୍କୁ ଟାର୍ଗେଟ କରି କହିଛନ୍ତି, ଦେଶରେ ବ୍ୟବସାୟ କରିବାକୁ ସେ କିଛି ପ୍ରଭାବଶାଳୀ ଲୋକଙ୍କୁ ଅନୁମତି ଦେଇଛନ୍ତି। ଦେଶର ସବୁ ପଇସା ସେମାନଙ୍କ ପାଖରେ ଅଛି ତେଣୁ ସେମାନେ ତାଙ୍କୁ ସୁହାଇଲା ପରି ଦାବି କରୁଛନ୍ତି। ଯାହାକି ପୂରଣ ମଧ୍ୟ ହେଉଛି। ଅନ୍ତରାଷ୍ଟ୍ରୀୟ ବଜାରରେ ଅଶୋଧିତ ତୈଳର ଦର କମ୍ ଅଛି କିନ୍ତୁ ଦେଶରେ ଅଧିକ ଅଛି। ଏଥିପାଇଁ ଦୁଇ ଉଦ୍ୟୋଗପତିଙ୍କ ମତ୍ତ ନିଆଯାଉଛି। କିନ୍ତୁ ୟୁପିଏ ସମସ୍ତଙ୍କୁ ସମାନ ଭାବରେ ଦେଖେ। ଆମେ ଗରିବଙ୍କ ପାଇଁ ମନେରେଗା ଆଣିଥିଲୁ ଏବଂ ସେମାନଙ୍କୁ ଋଣ ଛାଡ କରିଥିଲୁ। ଗରିବ ଏବଂ କୃଷକଙ୍କୁ ସାହାଯ୍ୟ କରିବାକୁ ଆମେ ସବୁବେଳେ ପ୍ରୟାସ ଜାରି ରଖିଛୁ ବୋଲି ରାହୁଲ କହିଛନ୍ତି।