କ’ଣ ନିଜର ପାଉଣା ଫେରାଇବେ ଗମ୍ଭୀର? ୩ କୋଟି ଟଙ୍କାକୁ ନେଇ ପ୍ରଶ୍ନ ଉଠାଇଲେ…

ନୂଆଦିଲ୍ଲୀ,୨୬।୩: ୨୦୨୫ ଚାମ୍ପିଅନ୍ସ ଟ୍ରଫିରେ ଟିମ୍‌ ଇଣ୍ଡିଆକୁ ଚାମ୍ପିଅନ କରିବା ପରେ ବିସିସିଆଇ ଦଳକୁ ୫୮ କୋଟି ଟଙ୍କାର ପୁରସ୍କାର ଦେବାକୁ ଘୋଷଣା କରିଥିଲା। ମୁଖ୍ୟ କୋଚ୍‌ ଗୌତମ ଗମ୍ଭୀରଙ୍କୁ ୩ କୋଟି ଟଙ୍କା ଦିଆଯିବ ବୋଲି ମଧ୍ୟ ଘୋଷଣା କରାଯାଇଥିଲା। ଏବେ ପୂର୍ବତନ ଅଧିନାୟକ ତଥା କିମ୍ବଦନ୍ତୀ ବ୍ୟାଟ୍ସମ୍ୟାନ ସୁନୀଲ ଗାଭାସ୍କର ଏହି ପୁରସ୍କାର ରାଶିକୁ ନେଇ ଏକ ପ୍ରଶ୍ନ ଉଠାଇଛନ୍ତି। କ’ଣ ନୂତନ ପ୍ରଶିକ୍ଷକ ଗମ୍ଭୀର ପୂର୍ବତନ ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡଙ୍କ ପରି ସପୋର୍ଟ ଷ୍ଟାଫଙ୍କଠାରୁ ଅଧିକ ବୋନସ ନେବାକୁ ମନା କରିବେ କି ବୋଲି ସେ ଏକ ଲେଖାରେ ପଚାରିଛନ୍ତି।

ଗତ ବର୍ଷ ଜୁନରେ ଭାରତୀୟ ଦଳ ୨୦୨୪ ଟି-୨୦ ବିଶ୍ୱକପ ଜିତିଥିଲା, ଯାହା ପରେ ବିସିସିଆଇ ପ୍ରଶିକ୍ଷକ ଏବଂ ଖେଳାଳିମାନଙ୍କୁ ବିପୁଳ ପୁରସ୍କାର ରାଶି ଦେଇଥିଲା। ଦ୍ରାବିଡ ଅନ୍ୟ ପ୍ରଶିକ୍ଷକ କର୍ମଚାରୀଙ୍କ ତୁଳନାରେ ଅଧିକ ଟଙ୍କା ପାଉଥିଲେ, କିନ୍ତୁ ସେ ଏହାକୁ ନେବାକୁ ମନା କରିଥିଲେ। ସେ କହିଥିଲେ ଯେ ସେ ଅନ୍ୟ କର୍ମଚାରୀଙ୍କ ପରି ସମାନ ପରିମାଣର ଟଙ୍କା ନେବେ। ଦ୍ରାବିଡଙ୍କ ଏହି ନିଷ୍ପତ୍ତି ସମସ୍ତଙ୍କ ହୃଦୟ ଜିତିଥିଲା। ଏହାକୁ ଉଲ୍ଲେଖ କରି ଗାଭାସ୍କର ତାଙ୍କ ଏକ ଲେଖାରେ ଲେଖିଛନ୍ତି- ’ଟି-୨୦ ବିଶ୍ୱକପ ଜିତିବା ପରେ, ଦ୍ରାବିଡ ପ୍ରମାଣ କଲେ ଯେ ସେ ଜଣେ ପ୍ରକୃତ ଟିମ୍‌ମ୍ୟାନ୍‌।’ ସେ ପୁରସ୍କାର ରାଶିକୁ ପ୍ରଶିକ୍ଷକ କର୍ମଚାରୀଙ୍କ ମଧ୍ୟରେ ସମାନ ଭାବରେ ବାଣ୍ଟି ଏକ ମହାନ ଉଦାହରଣ ସ୍ଥାପନ କରିଥିଲେ। ବିସିସିଆଇ ଚାମ୍ପିଅନ୍ସ ଟ୍ରଫି ପାଇଁ ପୁରସ୍କାର ରାଶି ଘୋଷଣା କରିବାର ଦୁଇ ସପ୍ତାହ ବିତିଗଲାଣି, କିନ୍ତୁ ଗମ୍ଭୀର ଏପର୍ଯ୍ୟନ୍ତ କହିନାହାନ୍ତି ଯେ ସେ ଦ୍ରାବିଡଙ୍କ ପରି ସପୋର୍ଟ ଷ୍ଟାଫଙ୍କ ସହ ପୁରସ୍କାର ରାଶି ବାଣ୍ଟିବେ କି ନାହିଁ। ଏହି କ୍ଷେତ୍ରରେ ଦ୍ରାବିଡ କ’ଣ ତାଙ୍କ ପାଇଁ ଜଣେ ଆଦର୍ଶ ନୁହଁନ୍ତି?ବୋଲି ସେ କହିଛନ୍ତି।

ତେବେ ଏହି ପ୍ରଶ୍ନ ବାବଦରେ ଏଯାବତ ଗମ୍ଭୀରଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ। ସେ ଦଳ ଏକତାର ବାର୍ତ୍ତା ଦେବେ ନା ଭିନ୍ନ ପଥ ବାଛିବେ? ଏହା ଦେଖିବା ଆକର୍ଷଣୀୟ ହେବ। ଗମ୍ଭୀର ବର୍ତ୍ତମାନ ତାଙ୍କ ପରିବାର ସହିତ ଛୁଟି ପାଳନ କରିବା ପାଇଁ ଫ୍ରାନ୍ସରେ ଅଛନ୍ତି।