କରାଚି,୩।୪(ପି.ଟି.): ପାକିସ୍ତାନ ବିପକ୍ଷ ସିରିଜ ନ ଖେଳି କେତେଜଣ ଦକ୍ଷିଣ ଆଫ୍ରିକା କ୍ରିକେଟର ଆଇପିଏଲ୍ ଖେଳିବାକୁ ଯାଉଛନ୍ତି। ତେବେ ଏଥିରେ ଦକ୍ଷିଣ ଆଫ୍ରିକା ହେଡ୍ କୋଚ୍ ମାର୍କ ବାଉଚର ଆଦୌ ଚିନ୍ତିତ ନୁହନ୍ତି। ବରଂ ଏହା ଆଗକୁ ଭାରତରେ ଆୟୋଜନ ହେବାକୁ ଥିବ ଟି୨୦ ବିଶ୍ୱକପ୍ ପ୍ରସ୍ତୁତିରେ ସହାୟକ ହେବ ଓ ଦଳରେ ବେଞ୍ଚ୍ ଷ୍ଟ୍ରେନ୍ଥ ପରଖିବାରେ ତାଙ୍କୁ ସୁଯୋଗ ମିଳିବ ବୋଲି ସେ କହିଛନ୍ତି।
ଦକ୍ଷିଣ ଆଫ୍ରିକାର ଶ୍ରେଷ୍ଠ ୫ ଖେଳାଳି କ୍ୱିଣ୍ଟନ ଡି କକ୍, କାଗିସୋ ରାବାଡ଼ା, ଲୁନ୍ଗି ଏନ୍ଗିଡି, ଡେଭିଡ ମିଲର ଓ ଅନରିଚ ନୋର୍ଜ ପାକିସ୍ତାନ ବିପକ୍ଷ ଦିନିକିଆ ସିରିଜର ପ୍ରଥମ ଦୁଇଟି ମ୍ୟାଚ୍ ପାଇଁ ଉପଲବ୍ଧ ହେବେ। ଏହାପରେ ଏହି ଖେଳାଳିମାନେ ଆଇପିଏଲ୍ ଖେଳିବାକୁ ଭାରତ ଗସ୍ତ କରିବେ। ପୂର୍ବରୁ ଆଇପିଏଲ୍ ଖେଳିବାକୁ ଖେଳାଳିମାନଙ୍କୁ ରିଲିଜ କରିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଓ କ୍ରିକେଟ ସାଉଥ ଆଫ୍ରିକା (ସିଏସ୍ଏ) ମଧ୍ୟରେ ଦୀର୍ଘ ଦିନରୁ ଚୁକ୍ତି ହୋଇଆସିଛି ବୋଲି ବାଉଚର କହିଛନ୍ତି। ଟି୨୦ ବିଶ୍ୱକପ୍ ଭାରତରେ ଖେଳାଯିବାର କାର୍ଯ୍ୟକ୍ରମ ରହିଛି। ତେଣୁ ସେଠାରେ ଆଇପିଏଲ୍ ଖେଳିଲେ ଦଳ ଫାଇଦା ହାସଲ କରିବ। ଆଇପିଏଲ୍ ଏକ ବିଶ୍ୱସ୍ତରୀୟ ଇଭେଣ୍ଟ। ତେଣୁ ବିଶ୍ୱକପ୍ରେ ଆଇପିଏଲ୍ ଅଭିଜ୍ଞତା କାମରେ ଆସିବ। ସିରିଜରେ ପାକିସ୍ତାନ ସମ୍ପୂର୍ଣ୍ଣ ଦଳ ସହ ଖେଳିବ। ତେଣୁ ଦକ୍ଷିଣ ଆଫ୍ରିକା ପାଇଁ କଡ଼ା ଚ୍ୟାଲେଞ୍ଜ ରହିଛି ବୋଲି ସେ କହିଛନ୍ତି।