ନୂଆଦିଲ୍ଲୀ/ଭୋପାଳ,୧୩।୧୦: କଂଗ୍ରେସ ଅଧ୍ୟକ୍ଷ ନିର୍ବାଚିତ ହେବା ପରେ ଦଳରେ ଉଦୟପୁର ବୈଠକର ଘୋଷଣାନାମା କାର୍ଯ୍ୟକାରୀ କରାଇବା ତାଙ୍କର ପ୍ରାଥମିକ ଦାୟିତ୍ୱ ହେବ ବୋଲି ବରିଷ୍ଠ ନେତା ତଥା ରାଜ୍ୟ ସଭା ସଦସ୍ୟ ମଲ୍ଲିକାର୍ଜୁନ ଖାର୍ଗେ କହିଛନ୍ତି। ସେହିପରି ଅନ୍ୟତମ ପ୍ରାର୍ଥୀ ଶଶୀ ଥରୁର କହିଛନ୍ତି, ସେ ଏଆଇସିସି ଅଧ୍ୟକ୍ଷ ହେଲେ କଂଗ୍ରେସ କାର୍ଯ୍ୟକାରୀ କମିଟି (ସିଡବ୍ଲ୍ୟୁସି) ଏବଂ ସଂସଦୀୟ ବୋର୍ଡରେ ପରିବର୍ତ୍ତନ ଆଣିବେ।
ଖାର୍ଗେ ନିଜ ସପକ୍ଷରେ ପ୍ରଚାର ଲାଗି ଭୋପାଳରେ ପହଞ୍ଚତ୍ ସମର୍ଥନ ଯୋଗାଡ଼ରେ ଲାଗିଛନ୍ତି। ସେ ଏକ ଖବରଦାତା ସମ୍ମିଳନୀରେ କହିଛନ୍ତି, ରାଜସ୍ଥାନ ଉଦୟପୁରରେ ହୋଇଥିବା କଂଗ୍ରେସ ସମ୍ମିଳନୀରେ ବହୁ ଆଲୋଚନା ପର୍ଯ୍ୟାଲୋଚନା ପରେ ଯେଉଁ ଘୋଷଣା କରାଯାଇଥିଲା, ତାହା ଚୂଡ଼ାନ୍ତ ଏବଂ ସମୟର ଆବଶ୍ୟକତା। ଦଳର ନେତାମାନେ ତାଙ୍କୁ ସାମୂହିକ ଭାବେ ପ୍ରାର୍ଥୀ କରିଥିବା ଖାର୍ଗେ କହିଛନ୍ତି।
ଏହି ଅବସରରେ ସେ ଭାଜପାକୁ ସମାଲୋଚନା କରି କହିଥିଲେ, ଗତ କିଛିବର୍ଷ ମଧ୍ୟରେ ଭାଜପା ନେତୃତ୍ୱାଧୀନ କେନ୍ଦ୍ର ସରକାର ସମସ୍ତ ସଂସ୍ଥାକୁ ଧ୍ୱଂସ କରିସାରିଲାଣି। ଦେଶର ଗଣତାନ୍ତ୍ରିକ ପ୍ରକ୍ରିୟା ବିପଦରେ ପଡ଼ିଥିବା ସେ କହିଛନ୍ତି। ଗାନ୍ଧୀ ପରିବାରରୁ କେହି ଦଳର ମଙ୍ଗ ଧରିବାକୁ ରାଜି ନ ହେବାରୁ ସେ ପ୍ରାର୍ଥୀ ହୋଇଛନ୍ତି। ତେବେ ସୋନିଆ ଗାନ୍ଧୀ ଓ ରାହୁଲ ଗାନ୍ଧୀ ଦଳର ପ୍ରମୁଖ ନେତା ହୋଇ ରହିବେ ବୋଲି ଖାର୍ଗେ କହିଛନ୍ତି।
ଅନ୍ୟତମ କଂଗ୍ରେସ ଅଧ୍ୟକ୍ଷ ପ୍ରାର୍ଥୀ ଥରୁର ନୂଆଦିଲ୍ଲୀରେ ଏକ ଖବରଦାତା ସମ୍ମିଳନୀକୁ ଉଦ୍ବୋଧନ ଦେଇ କହିଛନ୍ତି, ସେ ଦଳୀୟ ସମ୍ବିଧାନକୁ ପୂର୍ଣ୍ଣ ରୂପରେ କାର୍ଯ୍ୟକାରୀ କରାଇବେ। ଫଳରେ ୨୫ ବର୍ଷ ହେଲା ନିଷ୍କ୍ରିୟ ରହିଥିବା ଦଳର ସଂସଦୀୟ ବୋର୍ଡକୁ ପୁନର୍ଜୀବିତ କରିବା ସହ ସିଡବ୍ଲ୍ୟୁସି ନିର୍ବାଚନ କରାଇବେ ବୋଲି ଥରୁର କହିଛନ୍ତି। ଦଳରେ କ୍ଷମତା ବିକେନ୍ଦ୍ରୀକରଣ ହେବା ସହ ତୃଣମୂଳ ସ୍ତରର ନେତାଙ୍କୁ ପ୍ରକୃତ କ୍ଷମତା ମିଳିବ ବୋଲି ସେ ପ୍ରତିଶ୍ରୁତି ଦେଇଛନ୍ତି। ଏଥିସହିତ ଉଦୟପୁର ଚିନ୍ତନ ବୈଠକର ଘୋଷଣାନାମା କାର୍ଯ୍ୟକାରୀ କରିବେ ବୋଲି ସେ କହିଛନ୍ତି।