ପାଟନା,୧ ।୧୧: ବିହାର ରାଜନୀତି ଏବେ ହୋଇଛି ସରଗରମ । ବିଜୟ ହାସଲ ପାଇଁ ଗୋଟିଏ ପଟେ ଏନ୍ଡିଏ ବଳ କଷୁଥିବା ବେଳେ ଅନ୍ୟପଟେ ମହାମେଣ୍ଟ ବି କିଛି ପଛରେ ନାହିଁ । ଏବେ ମହାମେଣ୍ଟର ମୁଖ୍ୟମନ୍ତ୍ରୀ ପ୍ରାର୍ଥୀ ତେଜସ୍ୱୀ ଯାଦବ ପୁଣିଥରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି ଏଥର ଯଦି ତାଙ୍କ ଦଳ କ୍ଷମତାକୁ ଆସେ ତେବେ ସରକାରୀ କର୍ମଚାରୀଙ୍କ ଅବସର ବୟସ ସୀମାକୁ ବୃଦ୍ଧି କରାଯିବ । ଏବେ ନୀତୀଶ ସରକାର ଅବସର ବୟସ ସୀମା ୫୦ ରଖିଥିବା ବେଳେ ଏହା ଆଦୌ ଠିକ ନୁହେଁ ବୋଲି ସେ କହିଛନ୍ତି । ନିଜେ ନୀତୀଶ ୭୦ ବର୍ଷରେ ରାଜନୀତିରୁ ଅବସର ନେଉ ନ ଥିବା ବେଳେ ସରକାରୀ କର୍ମଚାରୀଙ୍କ ବୟସ ସୀମା ୫୦ ରଖି ଅନ୍ୟାୟ କରୁଛନ୍ତି ବୋଲି ତେଜସ୍ୱୀ କହିଛନ୍ତି । ଆହୁରି ମଧ୍ୟ ତେଜସ୍ୱୀ ପ୍ରଶ୍ନ କରିଛନ୍ତି ଯେ କାର୍ହିକି ବିହାରର ଛାତ୍ରୀଛାତ୍ର ୩ ବର୍ଷରେ ସ୍ନାତକ ଡିଗ୍ରୀ ହାସଲ କରି ପାରୁ ନାହାନ୍ତି । ଏମାନଙ୍କୁ ୪-୫ ବର୍ଷ କାହିଁକି ଲାଗୁଛି । ଏଥିପାଇଁ ସେ ନୀତୀଶ ସରକାରଙ୍କୁ ଦାୟୀ କରିଛନ୍ତି । ସୂଚନାଯୋଗ୍ୟ, ବିହାର ବିଧାନସଭା ପାଇଁ ପ୍ରଥମ ପର୍ଯ୍ୟାୟ ଭୋଟ ଗ୍ରହଣ ସରିଥିବା ବେଳେ ଦ୍ୱିତୀୟ ଓ ତୃତୀୟ ପର୍ଯ୍ୟାୟ ଭୋଟ ଗ୍ରହଣ ବାକି ରହିଛି । ଏହି ସମୟରେ ଭୋଟରଙ୍କୁ ନିଜ ଆଡକୁ ଆକର୍ଷିତ କରିବାକୁ ସବୁ ଦଳ ସେମାନଙ୍କ ଚେଷ୍ଟା ଜାରି ରଖିଛନ୍ତି ।
