ନୂଆଦିଲ୍ଲୀ,୧୯।୨: ଦିଲ୍ଲୀରେ ଆମ ଆଦମୀ ପାର୍ଟିର ପରାଜୟ ପରେ ସବୁଠାରୁ ଚର୍ଚ୍ଚିତ ବିଷୟ ଥିଲା କେଜରିୱାଲ ଆଗକୁ କରିବେ କ’ଣ। ଆଗକୁ କେଜରିୱାଲ ଭାଗବନ୍ତ ମାନଙ୍କଠାରୁ ଦାୟିତ୍ୱ ନେଇ ନିଜେ ପଞ୍ଜାବର ମୁଖ୍ୟମନ୍ତ୍ରୀ ହେବେ ବୋଲି ଚର୍ଚ୍ଚା ହେଉଛି। ଏହି କଳ୍ପନାଜଳ୍ପନାକୁ ପଞ୍ଜାବ ମୁଖ୍ୟମନ୍ତ୍ରୀ ଭାଗବନ୍ତ ମାନ ଖାରଜ କରିଦେଇଛନ୍ତି। ଅରବିନ୍ଦ କେଜରିୱାଲ ପଞ୍ଜାବର ମୁଖ୍ୟମନ୍ତ୍ରୀ ହେବା ନେଇ ଗୁଜବ ପ୍ରସାରିତ ହେଉଛି, ଏଥିରେ ଟିକେ ବି ସତ୍ୟତା ନାହିଁ ବୋଲି ମାନ କହିଛନ୍ତି।
ଦିଲ୍ଲୀ ନିର୍ବାଚନ ପରେ ପଞ୍ଜାବରେ ନେତୃତ୍ୱ ପରିବର୍ତ୍ତନ ନେଇ ଚାଲିଥିବା କଳ୍ପନାଜଳ୍ପନା ମଧ୍ୟରେ ପ୍ରଥମ ଥର ପାଇଁ ମୁଖ୍ୟମନ୍ତ୍ରୀ ଭଗବନ୍ତ ମାନ ଖୋଲାଖୋଲି ଭାବରେ କଥା ହୋଇଛନ୍ତି। ମୁଖ୍ୟମନ୍ତ୍ରୀ କହିଛନ୍ତି, ଅରବିନ୍ଦ କେଜରିୱାଲ ପଞ୍ଜାବର ମୁଖ୍ୟମନ୍ତ୍ରୀ ହେବେ ନାହିଁ। ଗଣମାଧ୍ୟମରେ ଗୁଜବ ପ୍ରସାରିତ ହେଉଛି। ଏହି କଥାଗୁଡ଼ିକ ଭିତ୍ତିହୀନ, ଏଥିରେ କୌଣସି ସତ୍ୟତା ନାହିଁ।
ଦିଲ୍ଲୀ ବିଧାନସଭା ନିର୍ବାାଚନର ଫଳାଫଳ ଫେବୃଆରୀ ୮ ତାରିଖରେ ଘୋଷଣା କରାଯାଇଥିଲା। ୭୦ ସଦସ୍ୟ ବିଶିଷ୍ଟ ବିଧାନସଭାରେ ଭାଜପା ୪୮ଟି ଆସନ ଜିତିଥିଲା ଏବଂ ପ୍ରାୟ ୨୭ ବର୍ଷ ପରେ କ୍ଷମତାକୁ ଫେରିଥିଲା। ଅରବିନ୍ଦ କେଜରିୱାଲଙ୍କ ଆମ ଆଦମୀ ପାର୍ଟିକୁ ଏକ ଶୋଚନୀୟ ପରାଜୟର ସାମ୍ନା କରିବାକୁ ପଡିଲା। ଆମ ଆଦମୀ ପାର୍ଟିକୁ ମାତ୍ର ୨୨ ଆସନରେ ସନ୍ତୁଷ୍ଟ ହେବାକୁ ପଡିଲା।
