ନୂଆଦିଲ୍ଲୀ,୧୯ା୫: ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ହତ୍ୟାକାଣ୍ଡର ତଦନ୍ତ କରୁଥିବା ଜୈନ କମିଶନ ୧୯୯୭ ଅଗଷ୍ଟ ୨୮ରେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦ୍ର କୁମାର ଗୁଜରାଲଙ୍କ ସରକାରଙ୍କ ନିକଟରେ ଅନ୍ତରୀଣ ରିପୋର୍ଟ ଦାଖଲ କରିଥିଲେ। କମିଶନ ଅଧ୍ୟକ୍ଷ ଜଷ୍ଟିସ୍ ମିଲାପ ଜୈନ ଏଥିରେ ରାଜୀବଙ୍କ ହତ୍ୟାର ଷଡ଼ଯନ୍ତ୍ର ଦିଗକୁ ଉଜାଗର କରିଥିଲେ। ଶ୍ରୀଲଙ୍କାର ଉଗ୍ରପନ୍ଥୀ ସଙ୍ଗଠନ ଲିବରେଶନ୍ ଟାଇଗର୍ସ ଅଫ୍ ତାମିଲ ଇଲମ୍ (ଏଲ୍ଟିଟିଇ)କୁ ଦ୍ରାବିଡ ମୁନେତ୍ରା କାଜାଗାମ୍ (ଡିଏମ୍କେ) ସହାୟତା ଦେଇଥିଲା। ଫଳରେ ରାଜୀବଙ୍କୁ ହତ୍ୟା କରିବା ପାଇଁ ଏଲ୍ଟିଟିଇକୁ ସହଜ ହୋଇଥିଲା ବୋଲି ଉକ୍ତ ରିପୋର୍ଟରେ କମିଶନ ସମାଲୋଚନା କରିଥିଲେ।
କେବଳ ଏତିକି ନୁହେଁ, ପୂର୍ବର ନରସିଂହ ରାଓ ସରକାର ମଧ୍ୟ ତାମିଲ ଉଗ୍ରପନ୍ଥୀମାନଙ୍କୁ ପରୋକ୍ଷରେ ସହଯୋଗ କରିଥିବା କମିଶନ ନିଜ ରିପୋର୍ଟରେ ଦର୍ଶାଇଥିଲେ। ନଭେମ୍ବର ୧୬ରେ ଜୈନ କମିଶନଙ୍କ ରିପୋର୍ଟ ପ୍ରଘଟ ହେବା ପରେ ଭାରତୀୟ ରାଜନୀତିରେ ଝଡ଼ ସୃଷ୍ଟି ହୋଇଥିଲା। ସେତେବେଳେ କଂଗ୍ରେସର ବାହ୍ୟ ସମର୍ଥନରେ ଜନତା ଦଳ ନେତୃତ୍ୱାଧୀନ ମେଣ୍ଟ ସରକାର ଚାଲିଥିଲା।
ଶାସକ ମେଣ୍ଟରେ ଡିଏମ୍କେ ଅଂଶିଦାର ଥିଲା। ତେଣୁ କଂଗ୍ରେସ ପ୍ରଥମେ ଉକ୍ତ ରିପୋର୍ଟକୁ ପାର୍ଲାମେଣ୍ଟରେ ଉପସ୍ଥାପନ କରାଯାଉ ବୋଲି ଦାବି କରିଥିଲା। କିନ୍ତୁ ଡିଏମ୍କେ ଏବଂ ତାମିଲ ମାନିଲା କଂଗ୍ରେସ ମଧ୍ୟରେ ବିବାଦ ସୃଷ୍ଟି ହେଲେ ସରକାରରୁ ଡିଏମ୍କେ ସମର୍ଥନ ପ୍ରତ୍ୟାହାର କରିବା ଆଶଙ୍କାରେ ପ୍ରଧାନମନ୍ତ୍ରୀ ଗୁଜରାଲ ଏହାକୁ ପ୍ରତ୍ୟାଖ୍ୟାନ କରିଦେଇଥିଲେ। ପରବର୍ତ୍ତୀ ସମୟରେ ରିପୋର୍ଟ ଅନୁଧ୍ୟାନ ପାଇଁ ଗୁଜରାଲ ତତ୍କାଳୀନ କଂଗ୍ରେସ ଅଧ୍ୟକ୍ଷ ସୀତାରାମ କେଶରୀଙ୍କ ସମ୍ମତିକ୍ରମେ ଏକ ଯୁଗ୍ମ ସଂସଦୀୟ କମିଟି ଗଠନ କରିଥିଲେ। ସେତେବେଳର କଂଗ୍ରେସ ସଂସଦୀୟ ଦଳ ନେତା ଶରଦ ପାଓ୍ବାର କହିଥିଲେ, ରିପୋର୍ଟରେ ଯାହାଙ୍କ ନାମ ଉଲ୍ଲେଖ କରାଯାଇଥିବ ତାଙ୍କୁ ଇସ୍ତଫା ଦେବାକୁ ପଡ଼ିବ।
ଗୁଜରାଲ ବୈଠକ ଡାକି ଡିଏମ୍କେ ପ୍ରତି ନିଜ ସମର୍ଥନ ବିଷୟ ଅବଗତ କରାଇଥିଲେ। ଡିଏମ୍କେର ଶିଳ୍ପମନ୍ତ୍ରୀ ମୁରସୋଲି ମାରାନ୍ କହିଥିଲେ, ୟୁନାଇଟେଡ୍ ଫ୍ରଣ୍ଟ (ମିଳିତ ସାମ୍ମୁଖ୍ୟ) ସରକାରର ଆମେ ସହଯୋଗୀ ଦଳ। ତେଣୁ ଗୁଜରାଲ ସରକାର ସହ ଆମର ସମର୍ଥନ ରହିଛି। ଜୈନ କମିଶନଙ୍କ ରିପୋର୍ଟ ସମ୍ପୂର୍ଣ୍ଣ ଭାବେ ଏକ ଘଣ୍ଟାଚକଟା ଖବର। ତେଣୁ ଏହାକୁ କେହି ବିଶ୍ୱାସ କରିବେ ନାହିଁ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ।
ଅନ୍ୟପକ୍ଷେ ସେହି ସମୟରେ ଚତୁର୍ଥ ଥର ପାଇଁ ତାମିଲନାଡୁ ମୁଖ୍ୟମନ୍ତ୍ରୀ ପଦ ଅଳଙ୍କୃତ କରିଥିବା ଏମ୍. କରୁଣାନିଧିଙ୍କ ମେଣ୍ଟ ସରକାର ତାମିଲ ମାନିଲା କଂଗ୍ରେସର ସମର୍ଥନରେ ଚାଲିଥିଲା। ତେଣୁ ପରବର୍ତ୍ତୀ କାର୍ଯ୍ୟପନ୍ଥା ସମ୍ପର୍କରେ ସମସ୍ତ ସୂଚନା ଶେୟାର କରିବା ପାଇଁ ତାମିଲ ମାନିଲା କଂଗ୍ରେସ ଡିଏମ୍କେକୁ କହିଥିଲା।
୧୯୯୭ ନଭେମ୍ବର ୨୦ରେ ଜୈନ କମିଶନଙ୍କ ରିପୋର୍ଟ ପାର୍ଲାମେଣ୍ଟରେ ଉପସ୍ଥାପନ କରାଯାଇଥିଲା। ସେଦିନ କ୍ୟାବିନେଟରୁ ଡିଏମ୍କେକୁ ହଟାଇବାକୁ ଦାବି କରି କଂଗ୍ରେସ ପକ୍ଷରୁ ଗୃହରେ ପ୍ରବଳ ହଟ୍ଟଗୋଳ କରାଯାଇଥିଲା। ଡିଏମ୍କେକୁ ବିଦା ନ କରିବା ପର୍ଯ୍ୟନ୍ତ କୌଣସି ସଂସଦୀୟ ବିତର୍କରେ ଭାଗନେବ ନାହିଁ ବୋଲି ସର୍ବପୁରାତନ ଦଳ ଅଡ଼ିବସିବାରୁ ଲୋକ ସଭା ବାଚସ୍ପତି ପି.ଏ. ସାଙ୍ଗ୍ମା ଗୃହକୁ ମୁଲତବୀ କରିଥିଲେ। ଗୁଜରାଲ ଡିଏମ୍କେ ନେତାମାନଙ୍କୁ କ୍ୟାବିନେଟରୁ ହଟାଇବେ ନାହିଁ ବୋଲି କେଶରୀଙ୍କୁ ଚିଠି ଲେଖିବା ପରେ ଶେଷରେ ନଭେମ୍ବର ୨୮ରେ ଗୁଜରାଲ ସରକାରରୁ କଂଗ୍ରେସ ସମର୍ଥନ ପ୍ରତ୍ୟାହାର କରିଥିଲା।
ମିଳିତ ସାମ୍ମୁଖ୍ୟ ସରକାର ସଂଖ୍ୟାଲଘୁରେ ପରିଣତ ହେବା ପରେ ପ୍ରଧାନମନ୍ତ୍ରୀ ଆଇ.କେ. ଗୁଜରାଲ ତତ୍କାଳୀନ ରାଷ୍ଟ୍ରପତି କେ.ଆର୍. ନାରାୟଣନ୍ଙ୍କୁ ପତ୍ର ଲେଖିଥିଲେ। ମୋ ସରକାର ସଂଖ୍ୟାଗରିଷ୍ଠତା ହରାଇଥିବାରୁ ନୈତିକତା ଦୃଷ୍ଟିରୁ ମୁଁ ଇସ୍ତଫା ଦେଉଛି ବୋଲି ସେ ଉଲ୍ଲେଖ କରିଥିଲେ। ରାଷ୍ଟ୍ରପତି ଡିସେମ୍ବର ୪ରେ ପାର୍ଲାମେଣ୍ଟ ଭଙ୍ଗ କରିବା ପରେ ୧୯୯୮ ଫେବୃୟାରୀରେ ଦେଶରେ ସାଧାରଣ ନିର୍ବାଚନ ହୋଇଥିଲା। ଖଣ୍ଡିତ ଜନାଦେଶ ଫଳରେ ଭାଜପା ନେତା ଅଟଳ ବିହାରୀ ବାଜପେୟୀଙ୍କ ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍ଡିଏ) ସରକାର ମାତ୍ର ୧୩ ମାସ ଚାଲିପାରିଥିଲା।
ଉପରୋକ୍ତ ରାଜନୈତିକ ଘଟଣାକ୍ରମର ୨୪ ବର୍ଷ ପରେ ଏବେ ସମୟ ବଦଳିଛି। ଏଥିସହ ଜାତୀୟ ରାଜନୀତିର ଚିତ୍ର ମଧ୍ୟ ବଦଳିଛି। ୨୦୧୪ ସାଧାରଣ ନିର୍ବାଚନ ପରଠାରୁ କଂଗ୍ରେସ ପ୍ରାୟ କୌଣସି ବଡ଼ ନିର୍ବାଚନ ଜିତିପାରୁ ନାହିଁ। ରାଜୀବ ଗାନ୍ଧୀଙ୍କ ହତ୍ୟାକାଣ୍ଡରେ ଦୋଷୀ ସାବ୍ୟସ୍ତ ହୋଇଥିବା ଏ.ଜି. ପେରାରିଭଲନ୍ ବୁଧବାର ମୁକ୍ତ ହୋଇଛନ୍ତି। କରୁଣାନିଧିଙ୍କ ପୁଅ ତଥା ବର୍ତ୍ତମାନର ଡିଏମ୍କେ ଅଧ୍ୟକ୍ଷ ଏମ୍. କେ. ଷ୍ଟାଲିନ୍ଙ୍କ ଯୋଗୁ ସେ ମୁକୁଳିଥିବାରୁ ତାମିଳନାଡୁ ସରକାରଙ୍କୁ ଧନ୍ୟବାଦ ଦେଇଛନ୍ତି।
ଷ୍ଟାଲିନ୍ ମଧ୍ୟ ଅବଶିଷ୍ଟ ୬ ଦୋଷୀଙ୍କ ମୁକ୍ତି ପାଇଁ ଉଦ୍ୟମ କରିବେ ବୋଲି ପ୍ରତିଶ୍ରୁତି ଦେଇଛନ୍ତି। ହେଲେ କଂଗ୍ରେସ ରାଜୀବ ହତ୍ୟାକାରୀଙ୍କ ମୁକ୍ତି ଦେଶ ପାଇଁ ଅଦୌ ଶୁଭଙ୍କର ନୁହେଁ ବୋଲି କହିଛି। ବର୍ତ୍ତମାନର ଏନ୍ଡିଏ ସରକାର ପେରାରିଭଲନ୍ଙ୍କ ପିଟିଶନ ବିରୋଧରେ ସୁପ୍ରିମକୋର୍ଟରେ ଯୁକ୍ତି ବାଢ଼ିଥିବା ସତ୍ତ୍ୱେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କଂଗ୍ରେସ ସମାଲୋଚନା କରିଛି। ତାମିଲନାଡୁ ସରକାରରୁ କଂଗ୍ରେସ ସମର୍ଥନ ପ୍ରତ୍ୟାହାର କଲେ ବି ସଂଖ୍ୟା ଦୃଷ୍ଟିରୁ ଷ୍ଟାଲିନ୍ଙ୍କୁ କିଛି ଫରକ୍ ପଡ଼ିବ ନାହିଁ। ହେଲେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଷ୍ଟାଲିନ୍ଙ୍କ ହାତ ଛାଡ଼ି ରହିପାରିବେ କି ଏବଂ ଆଉ ଏକ ଝଡ଼ ଉଠିବାକୁ ଦେବେ କି ବୋଲି ପ୍ରଶ୍ନ ଉଠୁଛି।