ଶୀତଦିନେ ନିଜ ଶରୀରର ବିଶେଷ ଧ୍ୟାନ ରଖିବା ନିହାତି ଆବଶ୍ୟକ। କୁହାଯାଏ, ଥଣ୍ଡା ସମୟରେ ମହୁର ସେବନ ଶରୀର ପକ୍ଷେ ଲାଭଦାୟକ ହୋଇଥାଏ। କାରଣ ଏଥିରେ ଭରି ରହିଛି ଆଇରନ୍, ପୋଟାସିୟମ୍, କାବ୍ରୋହାଇଡ୍ରେଟ୍ ପରି ଅନେକ ଗୁଣକାରୀ ପୋଷକ ତତ୍ତ୍ୱ। ଫଳରେ ଏହାର ସେବନଦ୍ୱାରା ଅନେକ ରୋଗରୁ ଉପଶମ ମିଳିଥାଏ। ଯେମିତିକି: ଶରୀରକୁ ସୁସ୍ଥ, ନୀରୋଗ ଏବଂ ଫୂର୍ତ୍ତି ରଖିବାରେ ଏହା ବିଶେଷ ସାହାଯ୍ୟ କରିଥାଏ। ତେଣୁ ଆୟୁର୍ବେଦରେ ମହୁକୁ ଅମୃତ ସହ ତୁଳନା କରାଯାଇଥାଏ। ପାଚନକ୍ରିୟାକୁ ଠିକ୍ ରଖିବା, ଶରୀରରେ ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବାରେ ବି ମହୁର ଭୂମିକା ଗୁରୁତ୍ୱପୂର୍ଣ୍ଣ। ଶୀତଦିନେ ଏହାକୁ ସେବନ କଲେ ଶରୀରରେ ଫୂର୍ତ୍ତି ଆସିଥାଏ ବୋଲି ବିଶ୍ୱାସ ରହିଛି। ଶୀତ ଯୋଗୁ ଥଣ୍ଡା, କାଶ ହେଉଥିଲେ ମହୁ ଓ ଅଦା ରସ ଖାଇଲେ ଅନେକାଂଶରେ ମୁକ୍ତି ମିଳେ। ଏପରିକି ପ୍ରତିଦିନ ସକାଳେ ଖାଲି ପେଟରେ ଗୋଟିଏ ଚାମଚ ମହୁ ଖାଇଲେ ଥଣ୍ଡା, କାଶ, ଜ୍ୱର ଆଦି ସମସ୍ୟାରୁ କେତେକାଂଶରେ ଉପଶମ ମିଳିଥାଏ। ମହୁ ସହିତ କିଛି ଗୋଲମରିଚ ଗୁଣ୍ଡକୁ ମିଶାଇ ଖାଇଲେ ମଧ୍ୟ କାଶ ଶୀଘ୍ର ଭଲ ହୋଇଯାଏ ବୋଲି ଆୟୁର୍ବେଦରେ ଉଲ୍ଲେଖ ରହିଛି। ଏହାଛଡ଼ା ଶୀତଦିନେ ଅନେକଙ୍କର ମୁହଁ, ଓଠ ଆଦି ଫାଟିଯାଏ; ଏ କ୍ଷେତ୍ରରେ ପ୍ରତିଦିନ ଦଶ ମିନିଟ୍ ଲେଖାଏଁ ଅଳ୍ପ ମହୁକୁ ନେଇ ମୁହଁ ଓ ଓଠରେ ମାଲିସ୍ କରି ପାଣିରେ ଧୋଇଦେଲେ ତ୍ୱଚାରେ ଚମକ୍ ଆସିବା ସହ ଫଟା ସମସ୍ୟା ମଧ୍ୟ ଭଲ ହୋଇଯାଏ।