ନୂଆଦିଲ୍ଲୀ, ୨୪ା୫ (ପି.ଟି.): ୨,୦୦୦ ଟଙ୍କିଆ ନୋଟ୍କୁ ପ୍ରତ୍ୟାହାର କରିନେବା ବିମୁଦ୍ରୀକରଣ ନୁହେଁ ବରଂ ବୈଧାନିକ କାର୍ଯ୍ୟ ବୋଲି ଭାରତର ରିଜର୍ଭ ବ୍ୟାଙ୍କ (ଆର୍ବିଆଇ) ମଙ୍ଗଳବାର ଦିଲ୍ଲୀ ହାଇକୋର୍ଟଙ୍କୁ ଜଣାଇଛି। ପରିଚାଳନାଗତ ସୁବିଧା ପାଇଁ ଉକ୍ତ ନୋଟ୍ ବଦଳାଇବାକୁ ନିଷ୍ପତ୍ତି ନିଆଯାଇଥିବା ଆର୍ବିଆଇ କହିଛି। ୨,୦୦୦ ଟଙ୍କିଆ ନୋଟ ସାଧାରଣରେ ବିଶେଷ ବ୍ୟବହାର ହେଉ ନ ଥିଲା। ମୁଦ୍ରା ଆବଶ୍ୟକତାକୁ ଅନ୍ୟ ବ୍ୟାଙ୍କ ନୋଟ୍ଗୁଡ଼ିକ ପୂରଣ କରିବ ବୋଲି ଆର୍ବିଆଇ ପକ୍ଷରୁ ବରିଷ୍ଠ ଆଇନଜୀବୀ ପରାଗ ପି. ତ୍ରିପାଠୀ କହିଛନ୍ତି। ବିନା ରିକ୍ୟୁଜିଶନ ସ୍ଲିପ୍ ଏବଂ ପରିଚୟ ପ୍ରମାଣରେ ୨,୦୦୦ ଟଙ୍କିଆ ବ୍ୟାଙ୍କନୋଟ୍ ବଦଳାଇବାକୁ ଅନୁମତି ଦିଆଯାଇଥିବାରୁ ଏହା ବିରୋଧରେ ଆଇନଜୀବୀ ଅଶ୍ୱିନୀ କୁମାର ଉପାଧ୍ୟାୟ ଦିଲ୍ଲୀ ହାଇକୋର୍ଟରେ ସୋମବାର ଜନସ୍ବାର୍ଥ ମାମଲା (ପିଆଇଏଲ୍) ଦାଏର କରିଥିଲେ। ମୁଖ୍ୟ ବିଚାରପତି ସତୀଶ ଚନ୍ଦ୍ର ଶର୍ମା ଏବଂ ଜଷ୍ଟିସ୍ ସୁବ୍ରମଣ୍ୟମ ପ୍ରସାଦଙ୍କ ଖଣ୍ଡପୀଠ ଏହାର ଶୁଣାଣି କରି ଉପଯୁକ୍ତ ରାୟ ଦେବେ ବୋଲି କହିଛନ୍ତି। ଆର୍ବିଆଇ ଏବଂ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ପକ୍ଷରୁ ଜାରି ବିଜ୍ଞପ୍ତି ମନମାନି, ତର୍କହୀନ ଏବଂ ସମ୍ବିଧାନର ଅନୁଚ୍ଛେଦ ୧୪ ପ୍ରତି ଅପମାନ ବୋଲି ସେ ପିଟିଶନରେ ଦର୍ଶାଇଥିଲେ। ବିପୁଳ ପରିମାଣରେ ୨,୦୦୦ ଟଙ୍କିଆ ନୋଟ୍ ବ୍ୟକ୍ତିବିଶେଷଙ୍କ ଲକରରେ ରହିଥିବ କିମ୍ବା ବିଚ୍ଛିନ୍ନତାବାଦୀ, ଆତଙ୍କବାଦୀ, ମାଓବାଦୀ, ନିଶା ଚୋରାବେପାରୀ, ଖଣି ମାଫିଆ ଓ ଦୁର୍ନୀତିଗ୍ରସ୍ତ ବ୍ୟକ୍ତି ଗଚ୍ଛିତ ରଖିଥିବେ। ୨,୦୦୦ ଟଙ୍କିଆ ନୋଟ୍ କାରବାର ଦୁର୍ନୀତିର ମୁଖ୍ୟ ଉତ୍ସ ଏବଂ ଏହା ବେଆଇନ କାର୍ଯ୍ୟରେ ଲାଗୁଥିବାରୁ ସମ୍ପୃକ୍ତ ବ୍ୟକ୍ତିଙ୍କ ବ୍ୟାଙ୍କ ଆକାଉଣ୍ଟରେ ସେହି ନୋଟ୍ ଜମା କରିବା ଲାଗି ଆର୍ବିଆଇ ଏବଂ ଏସ୍ବିଆଇ ବ୍ୟବସ୍ଥା କରିବାକୁ ପିଟିଶନରେ ଦାବି କରାଯାଇଥିଲା।