ହାଟଡ଼ିହୀ,୩।୩(ଶୁଭକାନ୍ତ ନାୟକ): କେନ୍ଦୁଝର ଜିଲା ହାଟଡ଼ିହୀ ବ୍ଲକ୍ର କାନ୍ଥରେ ବିଭିନ୍ନ ମନ୍ଦିର, ଜଳ ପ୍ରପାତର ଚିତ୍ର ଅଙ୍କନ କରି ସୌନ୍ଦର୍ଯ୍ୟକରଣ କରାଯାଇଛି। ବ୍ଲକ୍ ସମ୍ମୁଖରେ ଏକ ପାର୍କ ମଧ୍ୟ ନିର୍ମାଣ ହୋଇଛି। ପାର୍କରେ ମୂଲ୍ୟବାନ ଘାସ କିଣି ଅଣାଯାଇ ଗାଲିଚା ପ୍ରସ୍ତୁତ କରାଯାଇଛି। ମାତ୍ର ଏହି ସବୁ କାର୍ଯ୍ୟର ବ୍ୟୟ ଅଟକଳ ମୂଲ୍ୟ, ପାଣ୍ଠିର ନାମ ଓ ପ୍ରକଳ୍ପ ଅନୁମୋଦନ ସମ୍ପର୍କିତ କୌଣସି ସୂଚନା ଫଳକ କି ଫାଇଲ ଉପଲବ୍ଧ ନାହିଁ ଏବଂ ପ୍ରକଳ୍ପ ମଧ୍ୟ ଅନୁମୋଦନ ହୋଇନାହିଁ ବୋଲି ବ୍ଲକ୍ ଯନ୍ତ୍ରୀ ପ୍ରଫୁଲ୍ଲ ବେହେରା କହିଛନ୍ତି।
ଗଣମାଧ୍ୟମକୁ ସୂଚନା ଦେଇ କହିଛନ୍ତି, ସୌନ୍ଦର୍ଯ୍ୟକରଣ କାମ ବାବଦରେ କୌଣସି ଫାଇଲ ତାଙ୍କ ପାଖକୁ ଯାଇନାହିଁ। କାର୍ଯ୍ୟ ସଂକ୍ରାନ୍ତୀୟ କୌଣସି ଏଷ୍ଟିମେଟ କି ବିଲ ହୋଇନି। ଆର୍ଲଟମେଣ୍ଟ୍କୁ ଅପେକ୍ଷା କରାଯାଇଛି। ବ୍ଲକ୍ ଅଧ୍ୟକ୍ଷା ସାବିତ୍ରୀ ସେଠୀ କହିଛନ୍ତି, ପୂର୍ବରୁ ପଞ୍ଚାୟତ ସମିତି ଅଂଶରେ ବ୍ଲକ ସୌନ୍ଦର୍ଯ୍ୟକରଣ ପ୍ରକଳ୍ପ ବାବଦରେ ୨.୫ ଲକ୍ଷ ଟଙ୍କା ଅନୁମୋଦନ ହୋଇଥିଲା। ସେହି ପଇସାରେ କାର୍ଯ୍ୟ ହୋଇଛି। ପାର୍କ କାର୍ଯ୍ୟ ବିଡିଓଙ୍କ ଦାୟିତ୍ୱରେ ହେଉଛି। ସେଥିପାଇଁ ପଇସା କେଉଁଠୁ ଆସିଲା କହି ପାରିବେନି। ବିଡ଼ିଓ ସୌମ୍ୟଶ୍ରୀ ପାଣିଗ୍ରାହୀ କହିଛନ୍ତି, ସେ ନିଜ ପକେଟରୁ ବ୍ୟକ୍ତିଗତ ପଇସା ଖର୍ଚ୍ଚ କରି ବାହାର ମିସ୍ତ୍ରୀଙ୍କ ଦ୍ୱାରା ସୌନ୍ଦର୍ଯ୍ୟ କରଣ ଏବଂ ପାର୍କ ନିର୍ମାଣ କାର୍ଯ୍ୟ କରିଛନ୍ତି। କୌଣସି ସରକାରୀ ଅନୁଦାନ ଖର୍ଚ୍ଚ କରାଯାଇ କାର୍ଯ୍ୟ ହୋଇନି। ନିଜ ଇଚ୍ଛାରେ ସମ୍ପୃକ୍ତ କାର୍ଯ୍ୟ କରୁଥିବା କହିଥିଲେ। କୌଣସି ଉନ୍ନୟନ କାର୍ଯ୍ୟ କରିବା ପୂର୍ବରୁ ନୀତି ନିୟମ ଅନୁସାରେ ସରକାରୀ ଗାଇଡ଼ଲାଇନରେ କାର୍ଯ୍ୟ ହେବା ନିୟମ ରହିଛି। କିନ୍ତୁ ବିନା ପ୍ରକଳ୍ପ ଅନୁମୋଦନ, ବ୍ୟୟ ବରାଦ, ଏଷ୍ଟିମେଟ ବିନା ବ୍ଲକ ପରିସରରେ ସୌନ୍ଦର୍ଯ୍ୟ କରଣ ଏବଂ ପାର୍କ ନିର୍ମାଣ କରାଯାଇଛି। ଅପରପକ୍ଷେ କାର୍ଯ୍ୟ ପରେ ପ୍ରକଳ୍ପ ଅନୁମୋଦନ, କାର୍ଯ୍ୟାଦେଶ ବାହାର କରାଯାଇ ବିଲ କରି ଅର୍ଥ ହଡ଼ପ ଯୋଜନା ହୋଇଥିବା ବ୍ଲକ୍ର କେତେ ଜଣ କର୍ମଚାରୀ ନାମ ଗୋପନ ରଖିବା ସର୍ତ୍ତରେ ପ୍ରକାଶ କରିଛନ୍ତି।