ଭାପୁର,୨୮ା୯(ଡି.ଏନ.ଏ.): ନୟାଗଡ଼ ଜିଲା ଭାପୁର ବ୍ଲକରେ ପ୍ରାୟ ଦେଢବର୍ଷ ହେବ ବିଭିନ୍ନ ଦୁର୍ନୀତି ହୋଇଛି ା
ଏକାଧିକ ଦୁର୍ନୀତି ସାମ୍ନାକୁ ଆସୁଥିଲେ ମଧ୍ୟ ଜିଲା ପ୍ରଶାସନ ଆଖି ବୁଜି ଦେଇଥିବା ଅଭିଯୋଗ ହୋଇଛି ା ଏଥର ସମସ୍ତଙ୍କୁ ଆଚମ୍ବିତ କରିବା ଭଳି ଆଉ ଏକ ଦୁର୍ନୀତି ସାମ୍ନାକୁ ଆସିଛି ା ଭାପୁର ବ୍ଲକ ଅଧୀନ ପଦ୍ମାବତୀ ପଞ୍ଚାୟତରେ ସବୁ ନିୟମକୁ ଉଲ୍ଳଂଘନ କରାଯାଇ ୯୮ ମୋ ପୋଖରୀ ଏବଂ ୫୯ ଗଭୀର ସେଚ କୂପ ଖୋଳା ନ ଯାଇ ଫଲ୍ସ ବିଲ୍ କରାଯାଇଛି ା ଏ ବାବଦରେ ଆସିଥିବା ଲକ୍ଷାଧିକ ଟଙ୍କା ଠିକାଦାର ଆତ୍ମସାତ୍ କରାଯାଇଛି ା ଦାୟିତ୍ୱରେ ଥିବା ସରକାରୀ ବାବୁଙ୍କ ପ୍ରୋତ୍ସାହନରେ ଅତି ଚତୁରତାର ସହ ଏଭଳି ଲୁଟ୍ ହୋଇଥିବା ଅଭିଯୋଗ ହୋଇଛି ା
ସୂଚନା ଅଧିକାର ଆଇନରେ ମିଳିଥିବା ତଥ୍ୟ ଅନୁଯାୟୀ, ଭାପୁର ବ୍ଲକ ପଦ୍ମାବତୀ ପଞ୍ଚାୟତ ଅଧୀନ ତଳମାରଡା, ଝଗଡ଼ପଡା ଏବଂ ପଦ୍ମାବତୀ ଗ୍ରାମରେ ୨୦୧୭ରୁ ୨୦୨୨ ମଧ୍ୟରେ ୯୮ଟି ମୋ ପୋଖରୀ ଏବଂ ୫୯ଟି ଗଭୀର ସେଚ କୂପ ନିର୍ମାଣ କରାଯାଇଛି ା ତେବେ ପଦ୍ମାବତୀ ଗ୍ରାମ କମିଟିର ଅଭିଯୋଗ ଯେ, ଯୋଜନା ହାତେଇଥିବା ହିତାଧିକାରୀମାନଙ୍କ ପ୍ରକଳ୍ପ ଭୁତ ଖାଇଥିବା ବେଳେ ଏହାର ସୁବିଧା ନେବା ପାଇଁ ପ୍ରାୟ ୨୯ଜଣଙ୍କ ନିକଟରେ ଜମି ଗୁଣ୍ଠେ ମଧ୍ୟ ନାହିଁ ା ତେବେ କେଉଁ ଆଧାରରେ ସେମାନେ ଯୋଗ୍ୟ ବିବେଚିତ ହେଲେ ଏବଂ ଯୋଜନା ବାବଦ ଅର୍ଥ କିଏ ପାଇଲା ବୋଲି ସ୍ଥାନୀୟ ବାସିନ୍ଦା ପ୍ରଶ୍ନ ଉଠାଇଛନ୍ତି ା ଏ ନେଇ ପଦ୍ମାବତୀ ଗ୍ରାମ୍ୟ କମିଟି ନୟାଗଡ଼ ଜିଲାପାଳଙ୍କୁ ପ୍ରଦାନ କରିଥିବା ଅଭିଯୋଗ ପତ୍ର ଅନୁଯାୟୀ, ଜଣେ ସରପଞ୍ଚ ଓ ତାଙ୍କ ସ୍ବାମୀ, ସମିତିସଭ୍ୟ ଓ ଜିଆରଏସ୍ ଏବଂ ଦସ୍ତଖତ ଜାଲିଆତି କରି ଚର୍ଚ୍ଚାରେ ଥିବା ଜଣେ ବ୍ୟକ୍ତି ବିଭିନ୍ନ ଲୋକଙ୍କ ନାମରେ ପ୍ରକଳ୍ପ ପାଇଁ ଆବେଦନ କରିବା ସହିତ ଉକ୍ତ ପ୍ରକଳ୍ପ ନାଁରେ ଲକ୍ଷାଧିକ ଟଙ୍କା ହରିଲୁଟ କରିଛନ୍ତି ା ପ୍ରତି ହିତାଧିକାରୀଙ୍କୁ ପ୍ରକଳ୍ପ ମଞ୍ଜୁରୀ ପରେ ହାତଗୁଞ୍ଜା ଦେଇ ସମ୍ପୂର୍ଣ୍ଣ ଟଙ୍କାକୁ ଆତ୍ମସାତ କରିନେଇଛନ୍ତି ା ୮୮ ମୋ ପୋଖରୀ ଏବଂ ୫୦ ଗଭୀର ସେଚ କୂପ ପାଇଁ ସାମନ୍ୟତମ କାମ ନ କରି ଫଲ୍ସ ବିଲ୍ କରିଛନ୍ତି ଠିକାଦାରଙ୍କ ସହ ଦାୟିତ୍ୱରେ ଥିବା ଅଧିକାରୀ ା
ଗ୍ରାମ୍ୟ କମିଟି ଅଭିଯୋଗ ଅନୁଯାୟୀ, ଝଗଡ଼ପଡ଼ା ଗ୍ରାମର ଜଣେ ବ୍ୟକ୍ତି ସମ୍ପୃକ୍ତ ଜିଆରଏସ୍ଙ୍କୁ କରାୟତ କରି ନିଜ ନାଁରେ, ନିଜ ବାପା, ଦାଦା, ଭାଇବୋହୂ, ଏପରିକି ଝିଅ ନାମରେ ୫ରୁ ଊର୍ଦ୍ଧ୍ୱ କ୍ଷେତ ପୋଖରୀ କାଗଜ କଲମରେ କରି ସରକାରୀ ଅର୍ଥ ଆତ୍ମସାତ କରିଛନ୍ତି l ଗୁରୁତ୍ୱପୂର୍ଣ୍ଣ କଥା ହେଉଛି ଗ୍ରାମବାସୀଙ୍କ ଅଭିଯୋଗ ପରେ ଭୁବନେଶ୍ୱର ଭିଜିଲାନ୍ସ ବିଭାଗ ଗତ ୩ ଅଗଷ୍ଟରେ ମାମଲା ରୁଜୁ କରିବା ସହିତ ନୟାଗଡ଼ ଶାଖାକୁ ଏହାର ତଦନ୍ତ କରି ରିପୋର୍ଟ ଦେବା ନିମନ୍ତେ ନିର୍ଦ୍ଦେଶ ଦେଇଥିଲେ ା ତେବେ ଜିଲା ଭିଜିଲାନ୍ସ ବିଭାଗ ମାସେ ବିତିଥିଲେ ମଧ୍ୟ କୌଣସି ତଦନ୍ତ କରି ନ ଥିବା ସୂଚନା ମିଳିଛି ା ଏହି ସମ୍ପର୍କିତ କାଗଜପତ୍ର ଭାପୁର ବିଡ଼ିଓ ଏବଂ ପଦ୍ମାବତୀ ସରପଞ୍ଚଙ୍କୁ ଚିଠି ମାଧ୍ୟମରେ ମାଗିଛୁ, ବନ୍ୟା ପାଇଁ ତଦନ୍ତରେ ବିଳମ୍ବ ହେଉଛି l ଆବଶ୍ୟକ ପଡିଲେ ଆମେ ନିଜ ଟିମ୍ ସହ ଆବଶ୍ୟକ ପଦକ୍ଷେପ ନେବୁ ବୋଲି ନୟାଗଡ଼ ଭିଜିଲାନ୍ସ ଡିଏସ୍ପି ଶ୍ରୀକାନ୍ତ କୁମାର ବେହେରା ସୂଚନା ଦେଇଛନ୍ତି l