ଖଜୁରିପଡ଼ା,୨୭ା୩:ରାସ୍ତା ମରାମତି ପାଇଁ ବାରମ୍ବାର ଦରଖାସ୍ତ ଲେଖି ଗ୍ରାମବାସୀ ହତାଶ ହେଲେ। ବାରମ୍ବାର ରାସ୍ତା ପାଇଁ ପଲ୍ଲୀସଭାରେ କହି ନିରାଶ ହେଲେ। ଶେଷରେ ପ୍ରଶାସନ ଉପରୁ ଆଶା ଓ ଭରସା ଭାଙ୍ଗିଯିବା ପରେ ଗ୍ରାମସାଥୀ ପ୍ରଭାତ କହଁରଙ୍କ ଆହ୍ବାନ କ୍ରମେ ବାରିକୁମ୍ପା, ନୂଆଁ ସାହି ଏବଂ ଲଣ୍ଡୁରୁପଡା ଗ୍ରାମର ଯୁବକମାନେ ଏକତ୍ରିତ ହୋଇ ମାଟି ପକେଇ ଘାଟି ରାସ୍ତା ନିର୍ମାଣ କଲେ। ଏହିଭଳି ଘଟଣା ଦେଖିବାକୁ ମିଳିଛି ଖଜୁରୀପଡ଼ା ବ୍ଲକ ଅନ୍ତର୍ଗତ ବଲସକୁମ୍ପା ଗ୍ରାମ ପଞ୍ଚାୟତ ଅଧିନସ୍ତ ଲଣ୍ଡ୍ରୁପଡା ଗାଁରେ।
କାର୍ଯ୍ୟାଳୟ ଠାରୁ ପ୍ରାୟ ୩ କିମି ଏବଂ ଫୁଲବାଣୀ ସହର ଏବଂ ବ୍ଲକ କାର୍ଯ୍ୟାଳୟ ଠାରୁ ପ୍ରାୟ ୧୨ କିମି ଦୂର ଏହି ଗ୍ରାମ। ପ୍ରତିଦିନ ଗାଁ ନିକସ୍ଥ ନୂଆଁ ସାହି, ଦରଗଡ ଗଣ୍ଡା, ଗେଡ୍ରିପାଜୁ, ଖେତାପାଜୁ, ବଡ଼ଭୂଇଁ, ଭୁକ୍ତା କନାଲି, ସାତପଙ୍ଗା ଗ୍ରାମର ଲୋକ ବିଭିନ୍ନ କାମରେ ବଲସକୁମ୍ପା ବଜାର, ପଞ୍ଚାୟତ କାର୍ଯ୍ୟାଳୟ, ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଏବଂ ମେଡିକାଲ ବାରିକୁମ୍ପାକୁ ଯାତାୟାତ କରୁଛନ୍ତି। ହେଲେ ମରଣଯନ୍ତା ପାଲଟିଛି ଘାଟି ରାସ୍ତା। ଗ୍ରାମବାସୀଙ୍କ ଅଭିଯୋଗ ପ୍ରକାରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା ମାଧ୍ୟମରେ ଗାଁ କୁ ମାଟି ରାସ୍ତା ହୋଇଛି, ଯାହା ସ୍ଥାନେ ସ୍ଥାନେ ଖାଲ ଢିପ ହୋଇଛି । ଘାଟିରେ ପଥର ମେଟାଲ ଓ ବଡ ବଡ ପଥର ସହିତ ଅର୍ଦ୍ଧ ନିର୍ମିିତ ପକ୍କା ରାସ୍ତା ଯୋଗୁଁ ଅନେକ ସମୟରେ ସାଇକେଲ, ବାଇକ୍ ଏବଂ ଗାଡ଼ି ଭାରସାମ୍ୟ ହରାଇ ଦୁର୍ଘଟଣା ଘଟୁଛି। ସେହିପରି ବର୍ଷା ଦିନରେ କାଦୁଅ ପାଣିରେ ରାସ୍ତା ଯୁଡୁବୁଡୁ ହୋଇ ରହିବା ସହିତ ପାଦଖସି ଅନେକ ଲୋକ ରାସ୍ତାରେ ପଡିଛନ୍ତି ବୋଲି କହିଛନ୍ତି। ପ୍ରତିଦିନ ବାରିକୂମ୍ପା ଓ ବଲସକୁମ୍ପା ସରକାରୀ ଉଚ୍ଚ ବିଦ୍ୟାଳୟକୁ ଛାତ୍ରୀଛାତ୍ର ପାଠ ପଢ଼ିବା ପାଇଁ ଯାଉଛନ୍ତି। ବିପଦ ସଙ୍କୁଳ ଅବସ୍ଥାରେ ଆମ୍ଭେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇ ଏହି ରାସ୍ତା ଦେଇ ଯାତାୟାତ କରୁଛୁ। ଗାଁରେ କାହାର ଦେହ ଖରାପ ହେଲେ ଚିକିତ୍ସା ପାଇଁ ଆମ୍ବୁଲାନ୍ସ ଡାକିଲେ ଆମ୍ବୁଲାନ୍ସ ଗାଁକୁ ଯାଇପାରୁ ନାହିଁ। ତେଣୁ ରୋଗୀକୁ ଖଟିଆରେ ଭାର କରି ଗାଡ଼ି ପର୍ଯ୍ୟନ୍ତ ନେବାକୁ ପଡୁଛି ବୋଲି କହିଛନ୍ତି। ସ୍ଥାୟୀ ରାସ୍ତା ଖଣ୍ଡେ ନିର୍ମାଣ କରିବା ପାଇଁ ସରକାରଙ୍କୁ ବାରମ୍ବାର ଗୁହାରି କରି ହତାଶ ହେଲା ପରେ ଗ୍ରାମସାଥୀ ପ୍ରଭାତ କହଁରଙ୍କ ଆହ୍ବ୍ବାନ କ୍ରମେ ଆଜି ସମସ୍ତେ ମିଶି ନିଜ ପରିଶ୍ରମ ଦ୍ୱାରା ଘାଟି ରାସ୍ତା ମରାମତି କରୁଛୁ ବୋଲି କହିଛନ୍ତି।