ବ୍ରହ୍ମପୁର ଅଫିସ,୨୦ା୧-ଏକ ହତ୍ୟା ଉଦ୍ୟମ ମାମଲାର ସାକ୍ଷୀଙ୍କୁ ଧମକ ଦେବା ଅଭିଯୋଗରେ ନିମଖଣ୍ଡି ଥାନା ପୋଲିସ ଜଣଙ୍କୁ ଗିରଫ କରିଛି। ସେ ହେଲେ ଜଗଦଳପୁରର ହେମନ୍ତ ଡାକୁଆ(୨୪)। ଶୁକ୍ରବାର ମାମଲା ନଂ.୧୪/୨୩ ରେ ତାଙ୍କୁ କୋର୍ଟ ଚାଲାଣ କରାଯାଇଛି। ଘର କାନ୍ଥକୁ ନେଇ ହେମନ୍ତ ଓ ଦୁର୍ଯ୍ୟୋ ବିଷୋୟୀଙ୍କ ମଧ୍ୟରେ ବିବାଦ ଲାଗିଥିଲା। ଗତ ମେ ୨୩ ତାରିଖରେ ହେମନ୍ତ ଜଗଦଳପୁରର ଦୁର୍ଯ୍ୟୋଙ୍କୁ ହତ୍ୟା ଉଦ୍ୟମ କରିବା ଅଭିଯୋଗରେ ଗିରଫ ହୋଇ ଜେଲ ଯାଇଥିଲେ। ପରେ ସେ ଜାମିନରେ ଆସିଥିଲେ। ଉକ୍ତ ମାମଲା ବର୍ତ୍ତମାନ କୋର୍ଟରେ ବିଚାରଧୀନ ରହିଛି। ଏଥିରେ ନୀଳାଞ୍ଚଳ ବେହେରା ଜଣେ ସାକ୍ଷୀ ଭାବେ ରହିଛନ୍ତି। ହେମନ୍ତ ଜେଲରୁ ଆସିବା ପରେ ନୀଳାଞ୍ଚଳଙ୍କୁ ବିଭିନ୍ନ ସମୟରେ ସାକ୍ଷୀ କାହିଁକି ରହିଛୁ ବୋଲି କହି ଧମକ ଦେଉଥିଲେ। ଗତ ୧୮ ତାରିଖରେ ନୀଳାଞ୍ଚଳ କୌଣସି କାମରେ ବ୍ରହ୍ମପୁର ଯାଉଥିବା ବେଳେ ନିମଖଣ୍ଡି ବିଟ୍ ହାଉସ୍ ନିକଟରେ ହେମନ୍ତ ତାଙ୍କୁ ଅଟକାଇ ମାରଣାସ୍ତ୍ରରେ ଆକ୍ରମଣ କରିଥିଲେ। ଏଥିରେ ନୀଳାଞ୍ଚଳ ଗୁରୁତର ଆହତ ହୋଇଥିଲେ। ପରେ ସେ ଥାନାରେ ଅଭିଯୋଗ କରିଥିଲେ। ପୋଲିସ ଘଟଣାର ତଦନ୍ତ କରି ଅଭିଯୁକ୍ତ ହେମନ୍ତଙ୍କୁ ଗିରଫ କରି ପରେ କୋର୍ଟଚାଲାଣ କରିଛି।
