ହରିଦ୍ୱାର, ୨୬।୭: ଉତ୍ତରାଖଣ୍ଡର ତୀର୍ଥ ନଗରୀ ଭାବେ ପରିଚିତ ଋଷିକେଶରୁ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ଏଠାରେ ଜଣେ ମହିଳା ତାଙ୍କ ପ୍ରେମିକ ସହିତ ମିଶି ସ୍ବାମୀଙ୍କୁ ହତ୍ୟା କରିବା ପରେ ଶବକୁ ପାଇଖାନା ଟାଙ୍କିରେ ପୋତି ଦେଇଛନ୍ତି। ପୋଲିସ ଏହି ଘଟଣାର ଖୁଲାସା କରି ଉଭୟ ମହିଳା ଓ ତାଙ୍କ ପ୍ରେମିକଙ୍କୁ ଗିରଫ କରିବାରେ ସଫଳ ହୋଇଛି।
ଜଣାପଡ଼ିଛି ଯେ, ଋଷିକେଶରେ ରହୁଥିବା ଗୋପାଳ ରଥୀ ପେଶାରେ ଜଣେ ଟ୍ୟାକ୍ସି ଡ୍ରାଇଭର ଥିଲେ। ନରେନ୍ଦ୍ର ପ୍ରତିଦିନ ମଦ ପିଇ ସ୍ତ୍ରୀ ପୂଜାକୁ ପିଟୁଥିଲେ। ଯାହାକୁ ନେଇ ପୂଜା ବେଶ୍ ବିବ୍ରତ ଥିଲେ। ସୁଯୋଗକୁ ଘରେ ପ୍ଲମ୍ବର କାମ କରିବାକୁ ଆସୁଥିବା ଅମନ କୁମାରଙ୍କ ସହିତ ପୂଜାଙ୍କ ପ୍ରେମ ସମ୍ପର୍କ ଗଢ଼ି ଉଠିଥିଲା। ଏହାପରେ ଅମନଙ୍କୁ ନରେନ୍ଦ୍ରଙ୍କ ବିଷୟରେ ସମସ୍ତ କଥା ପୂଜା କହିଥିଲେ। ଶେଷରେ ଉଭୟ ନରେନ୍ଦ୍ରଙ୍କୁ ରାସ୍ତାରୁ ହଟାଇବାକୁ ଯୋଜନା କରିଥିଲେ। ଯୋଜନା ମୁତାବକ ଜୁଲାଇ ୧ରେ ଅମନ ସନ୍ଧ୍ୟାରେ ଆସି ପୂଜାଙ୍କ ଘରେ ଛପି ରହିଥିଲେ। ଏହାପରେ ଯେତେବେଳେ ରାତିରେ ନରେନ୍ଦ୍ର ମଦ ପିଇ ଘରକୁ ଆସିଥିଲେ ପୂର୍ବ ଯୋଜନା ଅନୁଯାୟୀ ପୂଜା ତାଙ୍କୁ ଅଣ୍ଡା ଅମଲେଟ୍ରେ ନିଶା ବଟିକା ମିଶାଇ ଖାଇବାକୁ ଦେଇଥିଲେ। ଏହାପରେ ନରେନ୍ଦ୍ର ଶୋଇଯିବା ପରେ ଉଭୟ ପୂଜା ଓ ଅମନ ତାଙ୍କ ତଣ୍ଟି କାଟି ହତ୍ୟା କରିଥିଲେ। ବୃତ୍ତିରେ ପ୍ଲମ୍ବର ଥିବା ଅମନ ଏହାପରେ ଘରେ ଥିବା ପାଇଖାନା ଟାଙ୍କି ମଧ୍ୟରେ ନରେନ୍ଦ୍ରଙ୍କୁ ପୋତି ଦେଇ ପରେ ଟାଇଲ୍ ଗୁଡ଼ିକ ଲଗାଇ ଦେଇଥିଲା। ନରେନ୍ଦ୍ରଙ୍କ ପରିବାର ଲୋକ ଏନେଇ କୌଣସି ସୁରାକ ମଧ୍ୟ ପାଇ ନ ଥିଲେ। ଶେଷରେ ପରିବାର ଲୋକ ନରେନ୍ଦ୍ର ନିଖୋଜ ହୋଇଥିବା ନେଇ ଥାନାରେ ଏତଲା ଦେଇଥିଲେ। କେହି ଯେପରି ସନ୍ଦେହ ନ କରିବେ ସେଥିଲାଗି ପୂଜା ଏକ ଉପାୟ ବାହାର କରିଥିଲେ। ସେ ଥାନାରେ ଯାଇ ମଧ୍ୟ ଅଭିଯୋଗ କରିଥିଲେ ଯେ, ତାଙ୍କ ସ୍ବାମୀ ଏକ ନମ୍ବରରୁ ଫୋନ କରି ତାଙ୍କୁ ହତ୍ୟା କରିବେ ବୋଲି ଧମକ ଦେଉଛନ୍ତି। କିନ୍ତୁ ପୂଜାଙ୍କ ଏହି ପ୍ଲାନ ତାଙ୍କ ପାଇଁ କାଳ ହୋଇଥିଲା। ପୋଲିସ ପୂଜାଙ୍କ ମୋବାଇଲ କଲ୍ ରେକର୍ଡ ଯାଞ୍ଚ କରିବା ସହ ଯେଉଁ ନମ୍ବରରୁ ଧମକ ଆସୁଥିଲା ସେହି ନମ୍ବର ଓ ଇଏମ୍ଆଇ ଟ୍ରେସ୍ କରିଥିଲା। ଏହାପରେ ପୋଲିସ ଜାଣିବାକୁ ପାଇଥିଲା ପୂଜା ଓ ଅମନ ଏହିଭଳି ଯୋଜନା କରି ଘଟଣା ଘଟାଇଛନ୍ତି। ଶେଷରେ ଉଭୟଙ୍କୁ ଥାନାକୁ ଆଣି ପଚରା ଉଚରା କରିବା କରେ ଉଭୟ ପୋଲିସ ଆଗରେ ଦୋଷ ସ୍ବୀକାର କରିଥିଲେ।