ଔପଦା,୧୧ା୬(ସ୍ବ.ପ୍ର.): ବାଲେଶ୍ୱର ଜିଲା ଔପଦା ଥାନା ଫତେପୁର ପଞ୍ଚାୟତ ପାଇକପଡା ଗ୍ରାମର ଆଦିବାସୀ ବସ୍ତି ସିଂହସାହିରେ ଏକ ହତ୍ୟାକାଣ୍ଡ ଘଟିଛି। ଜଣେ ମହିଳାଙ୍କୁ ତାଙ୍କର ସ୍ବାମୀ କୁରାଢ଼ୀ ବେଣ୍ଟରେ ପିଟି ହତ୍ୟା କରିଛନ୍ତି। ପୋଲିସ ସ୍ବାମୀଙ୍କୁ ଥାନାରେ ଅଟକ ରଖି ଅଧିକ ତଦନ୍ତ ଚଳାଇଛି।
ମିଳିଥିବା ସୂଚନା ମୁତାବକ, ସାହିରେ ହେଉଥିବା ଏକ ବାହାଘରକୁ ଶର୍ମିଳା ସିଂ (୩୦) ଯାଥିଲେ। ପରେ ସେ ଆଉ ଘରକୁ ଫେରି ନ ଥିଲେ l ସ୍ବାମୀ ରାମଚନ୍ଦ୍ର ସିଂ ଜଣେ ଗାଡି ଚାଳକ ହୋଇଥିବାରୁ କାମ ସାରି ଘରକୁ ଫେରିଥିଲେ। ହେଲେ ଘରେ ରୋଷେଇ ହୋଇ ନ ଥିବାରୁ ସ୍ବାମୀ ଓ ସ୍ତ୍ରୀଙ୍କ ମଧ୍ୟରେ ଝଗଡା ହୋଇଥିଲା।
ଏଥିରେ ରାମଚନ୍ଦ୍ର ଉତ୍ତ୍ୟକ୍ତ ହୋଇ ଏକ ଲୁହା ଶାବଳରେ ସ୍ତ୍ରୀଙ୍କୁ ଆକ୍ରମଣ କରୁଥିବା ବେଳେ ତାଙ୍କୁ ଦୁଇ ପୁଅ ମିଶି ଅଟକାଇଥିଲେ। ବାହାରେ ଛେଳିଗୁଡିକ ଚରୁଥିବାରୁ ରାମଚନ୍ଦ୍ର ଦୁଇ ପୁଅଙ୍କୁ ଛେଳି ଆଣିବା ପାଇଁ ପଠାଇଥିଲେ। ପରେ ସେ କୁରାଢ଼ୀରୁ ବେଣ୍ଟ ବାହାର କରି ସ୍ତ୍ରୀ ଶର୍ମିଳାଙ୍କ ମୁଣ୍ଡ ସହିତ ଶରୀରର ବିଭିନ୍ନ ସ୍ଥାନକୁ ପିଟିବାକୁ ଲାଗିଥିଲେ। ଫଳରେ ସେ ଛଟପଟ ହୋଇ ତାଙ୍କର ମୃତ୍ୟୁ ଘଟିଥିଲା। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ସ୍ବାମୀ ରାମଚନ୍ଦ୍ରଙ୍କୁ ଥାନାରେ ଅଟକ ରଖିଥିଲା। ଥାନା ଅଧିକାରିଣୀ କମଳିନୀ ତାଣ୍ଡି ଓ ଥାନା ଏସ୍ଆଇ ପ୍ରବୋଧ ନାୟକ ସାଇଣ୍ଟିଫିକ ଟିମ୍ ସହିତ ସିଂହସାହିରେ ପହଞ୍ଚି ତଦନ୍ତ କରିବା ପରେ ମୃତଦେହ ବ୍ୟବଚ୍ଛେଦ ପାଇଁ ପଠାଇଛନ୍ତି। ରାମଚନ୍ଦ୍ରଙ୍କ ଆକ୍ରମଣରେ ଶର୍ମିଳାଙ୍କ ମୃତ୍ୟୁ ହୋଇଥିବା ତାଙ୍କ ବାପା ଗଡ଼ସାହି ପଞ୍ଚାୟତ ମଣିତାଚୁଆ ଗ୍ରାମର ଗଙ୍ଗାରାମ ସିଂ ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା(ନଂ. ୫୧/୨୩) ରୁଜୁ କରିଛି।