ପୁରୁଣା ଭୁବନେଶ୍ୱର,୭ା୩(ଡି.ଏନ୍.ଏ.):ଦୀର୍ଘ ୧୦ଦିନ ହେବ ଶ୍ରୀକପିଳେଶ୍ୱର ମନ୍ଦିର ବନ୍ଦ ରହିଥିବା ବେଳେ ଠାକୁର ଉପବାସ ରହଛନ୍ତି। ସୋମବାର ଅପରାହ୍ନରେ କପିଳେଶ୍ୱର ଗ୍ରାମର କେତେଜଣ ମଲିଆ ସେବାୟତ ସଦସ୍ୟା ଏବଂ କେତେକ ଶ୍ରଦ୍ଧାଳୁ ତାଲା ଭାଙ୍ଗି ମନ୍ଦିରକୁ ପ୍ରବେଶ କରିଥିଲେ। ଏହି ଅବସରରେ କେତେଜଣ ମଲିଆ ସେବାୟତ ମନ୍ଦିରରେ ପ୍ରବେଶ କରିବା ସହ ଠାକୁରଙ୍କ ନୀତିକାନ୍ତି ଆରମ୍ଭ କରିଥିଲେ। ଏହି ଘଟଣାକୁ ନେଇ ଉପଜିଲାପାଳ ଲିଙ୍ଗରାଜ ଥାନାରେ ଏତଲା ଦେବା ସହ ଜିଲାପାଳଙ୍କୁ ଅବଗତ କରାଇଛନ୍ତି। ତେବେ ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନଥିବା ଜଣାପଡ଼ିଛି। ଅନ୍ୟପଟେ ହାଇକୋର୍ଟଙ୍କ ଆଦେଶ ତଥା ପ୍ରଶାସନର ନିର୍ଦ୍ଦେଶକୁ ଉପେକ୍ଷା କରାଯାଇ ଏଭଳି କାର୍ଯ୍ୟ ଘଟିଥିବାରୁ ଖୁଣ୍ଟିଆ ସେବାୟତମାନେ ସେମାନଙ୍କ ସେବା ଅଧିକାର ପ୍ରାପ୍ତିରୁ ବଞ୍ଚିତ ହୋଇଛନ୍ତି। ସୂଚନାଥାଉ କି, ୨୦୦୦ ମସିହାରୁ ଖୁଣ୍ଟିଆ ସେବାୟତମାନେ କପିଳେଶ୍ୱରଙ୍କ ନିକଟରେ ଥିବା ତାଙ୍କ ସେବା ଅଧିକାର ପାଇବା ଲାଗି ଚେଷ୍ଟା ଚଳାଉଛନ୍ତି। ଏନେଇ ସେମାନେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟ ତଳକୋର୍ଟଙ୍କ ରାୟ ମୁତାବକ ଖୁଣ୍ଟିଆ ସେବାୟତଙ୍କୁ ସେବାରେ ନିଯୁକ୍ତ କରି କପିଳେଶ୍ୱର ମନ୍ଦିରରେ ନୀତି ସ୍ବଭାବିକ କରିବା ପାଇଁ ଦେବୋତ୍ତର କମିଶନରଙ୍କୁ ନିର୍ଦ୍ଦେଶ ଦେଇଥିଲେ। ମାମଲା ନଂ.୧୬୨୯୨/ ୨୦୧୯ ମୁତାବକ ଏହି ନିର୍ଦ୍ଦେଶକୁ ପାଳନ କରିବା ଲାଗି ପ୍ରଶାସନ ପ୍ରତିବର୍ଷ ଉଦ୍ୟମ ଚଳାଇଥିଲେ ମଧ୍ୟ ବିଫଳ ହୋଇଛି। ଚଳିତବର୍ଷ ଅନୁଷ୍ଠତ ବୈଠକରେ ମଲିଆ ସେବାୟତମାନେ ଅସହଯୋଗ କରିବାରୁ ପ୍ରଶାସନ କପିଳେଶ୍ୱର ମନ୍ଦିରରେ ତାଲା ପକାଇବାକୁ ନିଷ୍ପତ୍ତି ନେଇଥିଲା।