ପିଲିଭିଟ: ଉତ୍ତରପ୍ରଦେଶର ପିଲିଭିଟ୍ ଜିଲାରେ ଜଣେ ଯୁବକଙ୍କୁ ଦ୍ୱିତୀୟ ବିବାହ କରିବା ମହଙ୍ଗା ପଡ଼ିଛି। ବିବାହ ସମୟରେ ପ୍ରଥମ ସ୍ତ୍ରୀ ପୋଲିସ୍ ସହ ପହଞ୍ଚିବା ସହ ସେଠାରେ ହଙ୍ଗାମା କରିଥିଲେ। ପୋଲିସ ସହ ମାର୍ପିଟ୍ ହେଉଥିବା ଦେଖି ଭୟରେ ଉପସ୍ଥିତ ଅତିଥିମାନେ ଏଣେତେଣେ ଦୌଡ଼ିବା ଆରମ୍ଭ କରିଥିଲେ। ପରେ ପୀଡ଼ିତାଙ୍କ ଅଭିଯୋଗ ଆଧାରରେ ପୋଲିସ ବରଙ୍କୁ ଥାନାକୁ ଆଣିବା ସହ ଏବେ ମାମଲାର ଯାଞ୍ଚ କରୁଛି।
ସମ୍ପୂର୍ଣ୍ଣ ଘଟଣାଟି ଏଭଳି। ବରେଲି ଜନପଦର ସୁମନ ଦେବୀଙ୍କ ଅଭିଯୋଗ ଅନୁଯାୟୀ, ୨୦୧୨ ନଭେମ୍ବର ୨୮ରେ ତାଙ୍କ ବିବାହ ଶାହଜହାଁପୁରର ଆଶିଷ ବର୍ମାଙ୍କ ସହ ହୋଇଥିଲା। ବିବାହର କିଛି ମାସ ପରେ ସ୍ବାମୀଙ୍କ ସହ ତାଙ୍କ ପରିବାରଲୋକେ କମ୍ ଯୌତୁକ ଆଣିଥିବାକୁ ନେଇ ତାଙ୍କୁ ନିର୍ଯାତନା ଦେବା ଆରମ୍ଭ କରିଥିଲେ। ଏପରିକି ଘରୁ ଆଉ ଟଙ୍କା ଆଣିବାକୁ ଦାବି କରିଥିଲେ। ଫଳରେ ସେ ଶାଶୁଘର ଲୋକଙ୍କ ନାମରେ ମୋକଦ୍ଦମା ରୁଜୁ କରିଥିଲେ। ଏହି ମାମଲା ଏବେ କୋର୍ଟରେ ବିଚାରାଧୀନ ଅଛି। ହେଲେ ସୋମବାର ତାଙ୍କ ସ୍ବାମୀ ପିଲିଭିଟ୍ ଅଞ୍ଚଳର ଜଣେ ଝିଅଙ୍କୁ ବିବାହ କରୁଥିବା ସେ ଜାଣିବାକୁ ପାଇଥିଲେ। ପରେ ସେ ଏନେଇ ପୁରନପୁର ଥାନାକୁ ଜଣାଇଥିଲେ। ପୋଲିସ ସହ ସେ ବିବାହ ମଣ୍ଡପରେ ପହଞ୍ଚିଥିଲେ। ଛାଡ଼ପତ୍ର ନ ହୋଇ ବି ସ୍ବାମୀ ଲୁଚିଛପି ଦ୍ୱିତୀୟ ବିବାହ କରିବାକୁ ଚେଷ୍ଟା କରିଥିବା ସେ ଅଭିଯୋଗ ଆଣିଥିଲେ। ସେଠାରୁ ପୋଲିସ ବର ବେଶରେ ଥିବା ଆଶିଷଙ୍କୁ ଥାନାକୁ ଆଣିଥିଲା। ଏବେ ତାଙ୍କୁ ପଚରାଉଚରା କରାଯାଉଛି। ତେବେ ପୋଲିସ ପହଞ୍ଚିବା ପୂର୍ବରୁ ଦ୍ୱିତୀୟ ବିବାହ ସମ୍ପର୍ଣ୍ଣ ହୋଇଥିବା ନେଇ ଚର୍ଚ୍ଚା ହେଉଛି।
