ସାଧାରଣତଃ ପରିସ୍କାର ପରିଚ୍ଛନ୍ନ ରହିବା ପାଇଁ ନିର୍ଦ୍ଦିଷ୍ଟ ସମୟରେ ଲୋକେ ନଖ କାଟନ୍ତି। କେହି କେହି ଫ୍ୟାଶନ ପାଇଁ ଅଳ୍ପ ନଖ ବଢ଼ାଇଥାନ୍ତି। ଏହା ଅତି ବେଶିରେ ୨-୩ ଇଞ୍ଚ ହୋଇଥାଏ। ଯଦି କାହା ନଖର ଲମ୍ବ ୧୨ ଇଞ୍ଚ ତେବେ ଶୁଣିଲେ ନିଶ୍ଚିତ ଆଶ୍ଚର୍ଯ୍ୟ ଲାଗେ।
ଆମେରିକାର ୫୯ ବର୍ଷୀୟା କାର୍ଡେଲିଆ ଆଡାମସ ନାମକ ଜଣେ ମହିଳା ଗତ ୩୦ ବର୍ଷ ଧରି ନଖ ନ କାଟି ରଖିଛନ୍ତି। ଏହି ନଖକୁ ନେଇ ସେ ଏବେ ଚର୍ଚ୍ଚାରେ। କାର୍ଡେଲିଆ ପିଲାଦିନେ ତାଙ୍କ ମା’ଙ୍କ ନଖକୁ ବହୁତ ଭଲ ପାଉଥିଲେ। ଯାହା ପରେ ସେ ମଧ୍ୟ ନଖ ବଢ଼ାଇବାକୁ ସ୍ଥିର କରିଥିଲେ। ୧୯୮୯ ପରଠାରୁ ସେ ଆଉ ନଖ କାଟି ନାହାନ୍ତି। ବର୍ତ୍ତମାନ ସେ ତାଙ୍କର ଅଦ୍ଭୁତ ଚେହେରା ଯୋଗୁ ଲୋକଙ୍କ ଦୃଷ୍ଟି ଆକର୍ଷଣର କେନ୍ଦ୍ରବିନ୍ଦୁ ପାଲଟିଛନ୍ତି। ସେ ବି ନଖ ରଖି ଏହାକୁ ବହୁତ ଏନ୍ଜୟ କରନ୍ତି।
କାର୍ଡେଲିଆଙ୍କ ନଖଗୁଡ଼ିକ ୧୬ ଇଞ୍ଚ ଥିଲା। ପରେ ସେ ୧୨ ଇଞ୍ଚରେ କାଟିବା ପରେ ଏହାକୁ ସମାନ ଲମ୍ବରେ ରଖିଥିଲେ। ସେ କେବଳ ଏହି ଲମ୍ବା ନଖରେ ନିଜର ଦୈନନ୍ଦିନ କାର୍ଯ୍ୟ କରନ୍ତି। ଅବଶ୍ୟ, କାର୍ଡେଲିଆ ଏପରି କାର୍ଯ୍ୟ କରିବାରେ ଅସୁବିଧାର ସମ୍ମୁଖୀନ ହୁଅନ୍ତି। ତେଣୁ ସେ ଆଙ୍ଗୁଠିର ଟିପରେ ଅନେକ କିଛି କରିଥାନ୍ତି।
କାର୍ଡେଲିଆ ତାଙ୍କର ଅନନ୍ୟ ଲୁକ୍ ପାଇଁ ସୋସିଆଲ ମିଡିଆରେ ବହୁ ଲୋକପ୍ରିୟତା ହାସଲ କରିଛନ୍ତି। ଲୋକମାନେ ତାଙ୍କର ଏହି ନଖଗୁଡ଼ିକ ସହିତ କାମ କରିବା ଦେଖି ମଜା ଉଠାଇଥାନ୍ତି। ବିଶେଷକରି ତାଙ୍କ ହାତ ଧୋଇବା ଭିଡିଓ ୧୭ ମିଲିୟନରୁ ଅଧିକ ଲାଇକ୍ ପାଇଛି। ୟୁଜରମାନେ କାର୍ଡେଲିଆଙ୍କୁ ସେ କିପରି ଖାଆନ୍ତି, କପରି ଶୁଅନ୍ତି ବୋଲି ପଚାରନ୍ତି। ସେ ନଖରେ ପେଣ୍ଟିଂ କରିବାକୁ ବହୁତ ଭଲ ପାଆନ୍ତି ବୋଲି କୁହନ୍ତି।