ଝାରସୁଗୁଡ଼ା ଅଫିସ/ବ୍ରଜରାଜନଗର,୨ା୨(ଡି.ଏନ୍.ଏ.): ଝାରସୁଗୁଡ଼ା ଜିଲା ବ୍ରଜରାଜନଗର ଥାନା ଅଧୀନ ଇଟାଭଟା ଝରନ୍ପଡାରେ ଏକ ଅଭାବନୀୟ ଘଟଣା ଘଟିଛି। ପଡ଼ାର ଟିକେଶ୍ୱର ଦେବାଙ୍ଗନ(୪୫)ଙ୍କ ପରିବାର ଲୋକେ ଶୋଇଥିବାବେଳେ ଘରେ ନିଆଁ ଲାଗିଯାଇଥିଲା। ଅଗ୍ନିକାଣ୍ଡରେ ଟିକେଶ୍ୱରଙ୍କ ଶରୀରର ୩୦ ପ୍ରତିଶତ, ପୋଡି ଯାଇଥିବା ବେଳେ ସ୍ତ୍ରୀ ସୁଶିଳା ଦେବଙ୍ଗନ(୩୨)ଙ୍କ ୯୦ ପ୍ରତିଶତ ଓ ପୁଅ ବୀର ଦେବାଙ୍ଗନ(୧୨)ଙ୍କ ୬୦ ପ୍ରତିଶତ ପୋଡିଯାଇଥିଲା। ଗୁରୁତର ଅବସ୍ଥାରେ ସମସ୍ତଙ୍କୁ ପ୍ରଥମେ ଜିଲା ମୁଖ୍ୟ ଚିକିତ୍ସାଳୟ ଓ ପରେ ବୁର୍ଲା ବଡମେଡିକାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ଗୁରୁବାର ସୁଶିଳାଙ୍କ ମୃତ୍ୟୁ ଘଟିଛି। ଆହତ ବାପପୁଅଙ୍କୁ ଚିକିତ୍ସା ପାଇଁ ଛତିଶଗଡ଼ର କୋର୍ବାକୁ ପଠାଯାଇଛି। ଏ ନେଇ ଟିକେଶ୍ୱରଙ୍କ ପଡୋଶୀ ବଂଶୀ ମହରାଙ୍କ ଅଭିଯୋଗକୁ ଭିତ୍ତିକରି ପୋଲିସ୍ ବ୍ରଜରାଜନଗର ଥାନାରେ ଏକ ମାମଲା(ନଂ.୩୭/୨୩) ରୁଜୁ ହୋଇଛି।
ଅଭିଯୋଗ ମୁତାବକ, ଟିକେଶ୍ୱର ପରିବାର ଲୋକଙ୍କ ସହିତ ଘରେ ରାତିରେ ଶୋଇଥିବା ବେଳେ କେହି ଦୁର୍ବୃତ୍ତ ନିଆଁ ଲଗାଇ ଦେଇଥିବା ସନ୍ଦେହ କରାଯାଉଛି। ହେଲେ କିଏ ଓ କାହିଁକି ଏଭଳି କାଣ୍ଡ କରିଛି ତାହା ଜଣାପଡି ନାହିଁ। ଏନେଇ ତଦନ୍ତ ଜାରି ରହିଛି ବୋଲି ଥାନା ଆଇଆଇସି ଧବଳେଶ୍ୱର ସାହୁ କହିଛନ୍ତି। ସୂଚନାଯୋଗ୍ୟ, ଟିକେଶ୍ୱରଙ୍କ ପ୍ରକୃତ ଘର ଛତିଶଗଡ଼ ହୋଇଥିବା ବେଳେ ବହୁବର୍ଷ ହେଲା ଏଠାରେ ପରିବାର ସହ ରହିଆସୁଛନ୍ତି। ବୁଧବାର ରାତି ପ୍ରାୟ ୩ଟାରେ ଘର ଭିତରେ ନିଆଁ ଲାଗିବାରୁ ଜୀବନ ବିକଳରେ ଟିକେଶ୍ୱର ଅର୍ଦ୍ଧଦଗ୍ଧ ଅବସ୍ଥାରେ ଘରର କବାଟ ଖୋଲି ବାହାରକୁ ଆସି ଚିତ୍କାର କରିଥିଲେ। ପାଖପଡୋଶୀ ଉଠି ପରିବାର ଲୋକଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ।